Зи Iуэху дэкI щIыналъэхэм хабжэ

ЩIыналъэ зыужьыныгъэмкIэ правительствэ комиссэм хэтхэм  я зэIущIэ мэрем кIуам иригъэкIуэкIащ УФ-м и Пра­вительствэм и УнафэщIым и къуэдзэ Хуснуллин Марат. Абы щытепсэлъыхьащ лъэпкъ, федеральнэ проектхэр гъэзэщIа зэрыхъумрэ абы и лъэныкъуэкIэ хэгъэгухэм зыIэрагъэхьа ехъулIэныгъэхэмрэ.

Къэбэрдей-Балъкъэрыр къапщтэмэ, илъэсым ипэм зэ­рыщIидзам хуэдэу еужьэрэкIыу йолэжь зыхуигъэувыжа къалэнхэм, набдзэгубдзаплъэу кIэлъоплъ лэжьыгъэр зэре­кIуэкIым.
«Къалэхэр зэIузэпэщ щIыныр» къэрал проектымкIэ зи Iуэхур нэхъ дэкI щIыналъэхэм ящыщщ Къэбэрдей-Балъкъэрыр, псэупIэ, инфраструктурэ, гъуэгу ухуэныгъэмкIэ къыкIэры­хуркъым.
ЗэIущIэм зыщытепсэлъыхьахэм я гугъу щищIым, республикэ унафэщIым къыхигъэщащ мы гъэм «ФIагъ лъагэ зиIэ гъуэгу шынагъуэншэхэр» лъэпкъ проектымкIэ километри 100 зэры­зэра­гъэ­пэщыжар, километр 40-м уэздыгъэхэр зэрыщагъэувар, километри 5-м гъуэгу Iуфэхэр зэрыщагъэбыдар икIи ды­щIигъуащ лъэс лъагъуэ зэпрыкIыпIэ 16-р иджырей лъэпкъ мардэхэм изагъэу зыхуей зэры­хуагъазэр. КъБР-м и Iэтащхьэм ищIа унафэм тету, гулъытэ нэхъыбэ зыхуащIыр социаль­нэ IуэхущIапIэхэмрэ школхэмрэ здэщыт щIы­пIэхэрщ. Апхуэдэ зэпрыкIыпIэ 11 къуажэ зэмылIэужьыгъуэхэм щащIащ мы гъэм.
Гъуэгум ехьэлIа лэжьыгъэхэр нэгъуэщI программэхэмрэ проектхэмкIи йокIуэкI. Нэхъ ин дыдэу зэлэжьхэм ящыщщ Шэджэм ЕтIуанэ - Булунгу, Прохладнэ лъэныкъуэкIэ кIуэ Налшык дэжыпIэр. Апхуэдэуи Май, Дзэлыкъуэ,Iуащхьэмахуэ щIыналъэхэм гъуэгухэр щызэрагъэпэщыж, Налшык къалэ лэжьыгъэшхуэ щокIуэкI. Къэрал, щIыналъэ, щIыпIэ гъуэгуу зыхуей хуагъазэ псори зэхэплъхьэмэ, километри 178-рэ хьэзыр ящIынущ.
Ди республикэр яхэхуащ япэ медицинэ дэIэпыкъуныгъэ цIыхухэм щрат IэнатIэр егъэфIэкIуэным теухуа программэр и чэзум зыгъэ­защIэ щIыналъэхэм я бжыгъэм. 2022 гъэм а программэм щIыналъэ поликлиникэ 13 хагъэхьат. Абы къищынэмы­щIауэ, Налшык щызэ­рагъэпэщыж Республикэ сабий клиникэ сымаджэщыр, сабий поликлиникэр, къалэ поликлиникэ инымрэ онкологие диспансерымрэ яухуэ, Эльбрус къуажэ цIыкIум участковэ сымаджэщ щащI.