Жыг хадэщIэ къызэIуах

Бэрбэч ХьэтIутIэ и цIэр зе­зыхьэ Къэбэрдей-Балъкъэр къэ­рал университетым иджыб­лагъэ цIыхухэм зыщагъэпсэху, я нэгу зыщрагъэужь, уэршэрыпIэ яхуэхъун жыг хадэщIэ къыщызэIуахащ. Абы теухуа зэIущIэм ирырагъэхьэлIащ ­УФ-м и Президентым Донбас­сыр хъумэным хуэунэтIауэ иригъэкIуэкI дзэ операцэ хэхар зэрыдаIыгъымкIэ пэкIур.

Зэхыхьэм кърихьэлIащ Налшык къалэм щIыпIэ унафэр щызехьэнымкIэ и IуэхущIапIэм и унафэщIым и къуэдзэ Хур Тимур, КъБКъУ-м и егъэджакIуэхэр, еджа­кIуэхэр, жылагъуэ лэжьа­кIуэхэр. ЗэIущIэр къыщызэIуихым, Хур Тимур Къэбэрдей-Балъкъэр Республикэр илъэси 100 зэрырикъумрэ ЩIэныгъэмрэ я махуэмкIэ къызэхуэсахэм ехъуэхъуа нэужь, къэралыгъуэм и махуэм ирихьэлIэу КъБР-м и Iэтащхьэм и унафэкIэ къалэм хиубыдэ цIыху зэхуэсыпIибл къызэ­ры­зэрагъэпэщар къы­хи­гъэщащ. «КъБКъУ-р ди щIыналъэм и цIэр жы­жьэ зыгъэIу IуэхущIапIэхэм ящыщщ. Абы и теплъэр ди щIыпIэм и дамыгъэхэм языхэзщ. «ПсэупIэмрэ псэукIэ зэIузэ­пэ­щымрэ» къэрал программэм ипкъ иткIэ, дэ Iэмал дгъуэтащ университетым и гупэ къит мэз тIэкIур зэIузэпэщ тщIыжыну, цIыхухэр хуиту щызэхэзекIуэ, я нэгу зыщрагъэужь, уэршэрыпIэ яхуэхъу щIыпIэу дгъэпсыну. ЩIалэгъуалэм я зэIущIапIэ хъуну дызыщыгугъ мы жыг хадэ цIыкIури ди къалэм щыгъ фащэ дахэм и зы тхыпхъэ зэрыхъунум шэч къы­тетхьэркъым», – жиIащ Ху­рым.
КъБКъУ-м и студент зэгухьэныгъэм щыщ Хуторская Елизаветэ псалъэр щратым къыхигъэщащ УФ-м и Президентым Донбассыр хъумэным хуэунэтIауэ иригъэкIуэкI дзэ операцэ хэхар зэ­рыдаIыгъымкIэ пэкIур жыг хадэр къызэIухыным теухуа зэхыхьэм зэрырагъэхьэлIари. «Ди гур ящIоуз псэзэпылъхьэпIэ ихуа цIыхухэм, мамырыгъэр Донбасс щIыналъэм щIэх щызэфIэувэ­жынуи догугъэ. Ди еджапIэр егъэджакIуэхэр щагъэхьэзыр, Луганск къалэм дэт къэрал университетым жыджэру долажьэ. Куэд щIакъым «ШыщхьэуIум  и ныбжьыщIэхэр-2022» зи ­фIэ­щыгъэ щIэныгъэ-егъэ­джэны­гъэ проек­тым абы къикIа щIалэ­гъуалэр жану зэрыхэтрэ, я зэ­фIэкI­хэр зэрыщагъэлъа­гъуэрэ. Дыщогугъ щытыкIэр зэ­пIэзэрыт хъужыну, ди щIалэ­гъуалэри адэкIи мамыру псэуну», – жиIащ Хуторская Елизаве­тэ.
КъБР-м щIыхь зиIэ и артист Текуев Амур гуапэу захуигъэзащ зэIу­щIэм кърихьэлIа ныбжьы­щIэхэм. «Ди къэралыгъуэр илъэси 100 ирокъу. ФщIэрэ мы махуэшхуэм нэхъыщхьэ дыдэу хэлъыр? Ар лъэпкъыбэу зэхэт ди щIыналъэм мамырыгъэр щытепщэу, дызэгурыIуэу дызэры­зэдэпсэуращ. Лъэпкъ Iей щыIэкъым, щыIэр цIыху Iейщ. ДяпэкIэ къэкIуэну дунейр зейр фэращи, ди нэхъыжьхэм къытхуагъэна дахагъэр фхъумэ, Iущыгъэ зыхэвгъэлъ, лъэданэ ина сыт хуэдэ Iуэхугъуэри псалъэрэ чэнджэщкIэ зэрызэфIэфхын акъыл зивгъэIэ. Ди пашэм гъуэгу захуэ ­дегъэлъагъури, дэдвгъэIыгъ, ­ды­къуэвгъэт», – жиIащ Текуев Амур.

 

ТРАМЭ Батырджэрий.
Поделиться: