Дахагъэм и дохутыр

Дунейпсо тхыдэм къызэрихутамкIэ, япэ дыдэу сэхусэплъыр къыщежьар ди лъэхъэнэм ипэжкIэщ, илъэс мини 4 - 5-кIэ узэ­IэбэкIыжмэ. А зэман жыжьэм псэуа бзылъхугъэхэм зэрахьэрт Iупэлэ, Iэбжьанэлэ, нэр зэрыщIаш къэрэндащ зэмыфэгъухэр, напэр щабэ зыщI кремхэр, дыхумэ гуакIуэхэр, нэгъуэщIхэри. ЗэрыжаIэмкIи, абы лъандэрэ сэхусэплъым и зэхэлъыкIэм зэрызихъуэжа щыIэкъым. ЦIыхубзыр сыт хуэдэ лъэхъэнэ щыпсэуами цIыхубзщ – зигъэдэхэнущ. 

Ди гуапэ зэрыхъунщи, нобэ Iэмал зэмылIэужьыгъуэхэр къэу­нэхуащ, зэманым илъэсипщI-тIощIкIэ кърагъэгъэзэжу, дахагъэр ирахъумэу. Дэри ди щIыналъэм щыкуэдщ визажистхэр, косметологхэр, иужьрей Iэмэпсымэхэм ирилажьэкIэрэ, дахагъэр къэзыгъэщIэрэщIэж дохутыр Iэзэхэр. Абыхэм ящыщщ «Медичи» IуэхущIапIэм и къызэгъэпэщакIуэ, унафэщI, дохутыр-дерматокосметолог Багъэтыр Марьянэ. 
2001 гъэм Дыгулыбгъуей къуажэм дэт курыт еджапIэ №4-р фIы и фIыжкIэ къиухащ Марьянэ икIи Къэбэрдей-Балъкъэр къэрал университетым медицинэмкIэ и къудамэм щIэтIысхьащ. Абы и адэ – Багъэтыр Руслан – республикэм щыцIэрыIуэу травматолог лъэрызехьэт, и анэ Маринэ медсестра IэщIагъэм хуеджати, езыри, Iэмал имыIэу, дохутыр хъун хуейуэ ишэщIат. 
- Си адэр дохутырти, абыхэм я нэгу щIэкIыр, гугъуехьу яшэчыр, я лэжьыгъэм унагъуэм къы­зэ­рытричыр фIыуэ ищIэжырти, сэри дохутыр сыхъунущ щы­жыс­Iам, къысхуидауэ щытакъым. ­Къудамэ зэмылIэужьыгъуэхэр, Iэ­щIагъэ зэхуэмыдэхэр къысхуигъэлъэгъуат, ауэ сыерыщти, жыс­­Iам сыхутекIакъым. Абде­жым си адэм къызжиIащ: «Дохутыр ухъуну щыбукъуэдиякIэ, зэгъащIэ абы жэуаплыныгъэу пы­лъымрэ щыуагъэ къыпIэ­щIэщIэ зэрымыхъунумрэ. Ар мыдрей псоми хуэмыдэжу, лэжьыгъэ ­гугъущи, уэ езым уи акъыл, уи ­къару, уи щIэныгъэ мыхъумэ, сэ укъыс­щымыгугъ!». Си адэр ще­джэм къытекIуэн зы цIыху щIэсакъым и курсым. Уеблэмэ апхуэдизу фIыуэ зэреджэм папщIэ, зыхуей дыдэ унэтIыныгъэмкIэ, и псэм фIэфIу къыхих къалэм ординатурэм пщIэншэу щеджэну хуит къащIауэ щытащ. Апхуэдэу, Ленинград травматологиемкIэ и ординатурэм щIэтIысхьат. Сэ сыкъыщалъхуари а къалэращ. Арати, си адэм и щIыхьымрэ и цIэмрэ къэзгъэщIэхъу хъунутэкъым, къыс­хуимыдэурэ медицинэм зеспщытати, си бгыр щIэс­къузэри, еджэн щIэздзащ. Мыбдеж къыхэгъэщыпхъэщи, зэрыжиIауэ, зымащIэкIи къыздэIэпыкъуакъым, сэ езым стыжа экзаменхэмкIэ сыщIэхуауэ арат еджа­пIэм. 
- Дерматокосметологиер дауэ къызэрыхэпхар ?
- ИпэжыпIэкIэ, дерматокосметологием сыщIэхъуэпсу зестакъым. Я теплъэр зигу иримы­хьыжхэм я ныкъусаныгъэхэр згъэ­зэкIуэжу, пластикэ хирург сыхъуну сыхъуапсэу щIэздзащ 7 - 8-нэ классхэм сыщIэсу. Абы фIэкIа си щхьэм илътэкъым. Ар къызэхъулIэн папщIэ, езы хирургием ухуеджэн хуейт япэщIыкIэ. КIэнцIэлий Лиуан абыкIэ дри­гъаджэрти: «Пщащэхэр медицинэм щIэкIуэн щыIэкъым! Абы фишх хэлъкъым. Мыбы хъыджэбзу щеджэм я нэхъыбэр я анэхэм къыщIагъэтIысхьауэ аращ, я уасэр драгъэуейуэ, иужькIэ уна­гъуэфI иратын папщIэ», - жиIэурэ къыддэгушыIэрт. Ауэ сэ медицинэм сыщIыхыхьар сщIэжырти, къызэрызгъэзэн щыIэтэкъым. Ещанэ курсым ирихьэлIэу Санкт-Петербург зезгъэдзыжу, абы си еджэныр щыпысщэну си гуращэт. Ауэ, си адэр зэшэзэпIэу къы­зэIыхьэри, къахуемыгъэлу дунейм ехыжащ а лъэхъэнэ дыдэм ирихьэлIэу. Арати, хирургиер фIэмыфIу, къыхэсха унэтIыныгъэр и гум дэмыхьэу зэрыщытам щхьэ­кIэ, ерыщагъыр езгъэ­кIуэтэкIри, дерматологием зестыжащ.  А зырат косметологием и лъагъуэм сытезышэфынур… ЦIыхум и нэкIум телъ ныкъусаныгъэхэр игъэзэкIуэжу абы и гукъыдэжым зыкъезыгъэIэтыж, на­сыпыфIэ зыщI IэщIагъэм. Ап­хуэдэу, дерматокосметолог сы­хъуащ. 
- СызэрыщыгъуазэмкIэ, Мос­к­ва ущылэжьащ, Марьянэ. Абы утезгъэпсэлъыхьынут. 
- ЗэрыжысIащи, си адэр пасэу тщхьэщыкIат, си дэлъхум сэрэ зыхуей дыхуэгъэзэн, ди еджэныр нэдгъэсын хуейти, ди анэм къалэнышхуэхэр и пщэ къыдэхуащ. Сэ абы зыкъытезгъэхьэлъэфынутэкъым. Ауэ щыхъум, 6-нэ курсым сыщIэсу, косметологиемкIэ курсхэр къэзухри, косметологыу лэ­жьэн щIэздзащ. ЕджапIэмрэ лэ­жьапIэмрэ зэдэсхьырт. Интернатурэмрэ ординатурэмрэ къэ­зухри, къалащхьэм сыкIуащ си еджэным щыпысщэну. Абыи ­дохутыр косметологиемкIэ курс­хэм сыщIэсурэ сылажьэрт. Пэ­жыр пэжщ, хуабжьу гугъу сехьащ­. Арами, сызэрыерыщт. Мос­ква илъэситIкIэ сыщылэжьауэ, Барвихэ дэт СПА-IуэхущIапIэ лъэрызехьэ гуэрым сыуващ. Илъэс бжыгъэкIэ еджапIэмрэ лэжьыгъэмрэ зэрызэдэсхьам гугъу сы­зэрыригъэхьар зырикIт, абы сыувын папщIэ сыкъызэрапщытам елъытауэ! ЗэкIэлъхьэужьу гъэу­нэхупIи 5-кIэ сыкъапщытащ. Псори къызыхэкIыжар – а IуэхущIапIэм дэтхэнэри щIагъэхьэу, хэт хуейми кIуэфу щыттэкъым. Абы нэхъыбэу еблагъэр Урысейм ди артист пэрытхэр, къулыкъущIэ­хэм я щхьэгъусэхэр, я бынхэр, цIыху цIэрыIуэ дыдэхэрат. Абы къыхэкIкIэ, жумыIапхъэ жумыIэу, уи бзэр быдэу, уи IэщIагъэм ухуэIэзэу, уIэщабэ-Iущабэу, укъабзэлъабзэу, екIуу ухуэпауэ, уи щхьэцыр зыхуей хуэгъэзауэ ущытын хуейт. ЛэжьакIуэхэр псори щIыпIэ хэха дыщызэхуэсырт, центрым и машинэ къигъакIуэрти, зэщIыгъуу лэжьапIэм драшалIэрт. АдэкIэ аэропортым укъызэ­рыщаплъыхьым хуэдэу гъущI къызэралъыхъуэмкIэ дызэпаплъыхьырт, Iэпкълъэпкъым фа­дэ пкърытрэ пкърымытрэ къащIэну Iэмэпсымэ гуэрым драгъапщэрт, ди хьэпшыпи, ахъши, телефони дгъэтIылъырт. КIэщIу жыпIэмэ, лэжьыгъэм дыпэрыувэн ипэ къихуэу дыщIащыкIырт.  Ипэхэм сфIэфI дыдэу сыщы­лэжьащ абы. Махуэм цIыху зытIу къакIуэу арат. Ауэ ахэр апхуэдизкIэ цIыху цIэрыIуэт, къынтIэшынтIэти, мытхьэусыхэжын папщIэ, утемыплъэкъукIыу зыхуей хуэгъэзэн хуейт, гулъытэ псори абы етауэ. ИужькIэ къызэхьэлъэкI ­хъуащ… ЛэжьапIэр щэхут, упсалъэу ядэххэртэкъым, блынхэр хужьыпсу, макъамэ щабэ зэпы­мычу къеуэу, хьэщIэ къынтIэ­шынтIэхэм уеубзэн, абы къуапэс, зэрызащI псори ебгъэнэхын ­хуейуэ. Илъэсрэ ныкъуэкIэ зезгъэзэгъащ. АдэкIэ Къэбэрдей-Балъкъэрым лэжьапIэ къыщыслъыхъуэу щIэздзащ, хэкум къэзгъэзэжыну сыхуейуэ. Гугъусыгъуу епхьэкIа махуэм и хьэлъэр пщхьэщызыхын анэм, унагъуэм ухуэчэму хамэщI ущыпсэуну тын­шкъым. Сыт хуэдиз мылъку къып­хэхъуэми IэфIкъым, уи щхьэм Iэ къыдэзылъэн, узыхэ­зы­щIыкIын анэ ущимыгъусэм деж. Арати, Налшык лэжьапIэ къы­щызгъуэтри, къэзгъэзэжащ.  Абдежым си нэр къэплъэжат.
- Дауи, Москварэ Налшыкрэ зэхуэдэкъым я дунейр…
- Пэжыр жысIэнщи, гъэрыпIэ сыкъикIыжауэ, хуитыныгъэ ­згъуэтыжауэ къысщыхъурт. Москва сыщыщыIам щыгъуэ пщэдджыжьым сыхьэти 7-м сыщIэ­кIыр­ти, жэщыбгым секIуэлIэжу арат, къару симыIэжу, сызэхэукIауэ, зыри сфIэмыIэфIыжу. Мыбдеж сыхьэт 17-м сыкъызэфIэкIырти, си щхьэ Iуэху зесхуэнуми, си ныбжьэгъу пщащэхэм сахуэзэнуми, си анэ сыдэIэпыкъунуми, зэман хъушэ тыгъэ къысхуащIам хуэдэу къысщыхъурт. ЛэжьапIэщIэ схуэхъуам сыщылэжьащ илъэсихкIэ. АдэкIэ хэгъэхъуэн, зыужьын, зыIэтын хуейщ жысIэщ, сытегушхуэри, мазэ хьэкъ есту зы пэш къасщтэри, сэ езым си клиникэ къызэIусхыжащ. Пэжщ, гугъуехьышхуэ пылъу, си иужь­рей къарумрэ зэхуэздзыса мылъкумрэ тызогъэкIуадэ жысIэу къызэхъулIащ ар, ауэ Iуэхум фIыуэ зызэтриублэри, псынщIэ дыдэу фейдэ къыпэкIуэу щIи­дзащ. ИлъэсихкIэ сыщылэжьа IуэхущIапIэм сыкъыщызыцIы­хуахэр си деж къэкIуэн щIадзащ, абыхэм нэгъуэщIхэри къыздашащ. 
- Абдежи укъыщыувыIа си гугъэкъым. Пэш цIыкIур клиникэ псо пщIащ, сызэрыщыгъуазэмкIэ.
- Пэжщ. Си деж къакIуэхэр нэхъыбэж зэрыхъум хуэдэу, дахагъэр егъэфIэкIуэнымкIэ цIыху­хэм къахыхьа модэми зиужьырт, техникэм къыхилъхьэ Iэмалы­щIэхэр я пIэ изагъэртэкъыми, фэтэр къэсщэхущ, сызэрыхуейуэ зэрезгъэхьэжри, дахагъэм и IуэхущIапIэ къызэIусхащ. НобэкIэ «Медичи»-м диIэ аппаратхэм хуэдэ Къэбэрдей-Балъкъэрым ит­къым, техникэм и иужьрей IэмэпсымэхэмкIэ дызэщIэузэдащ, си щIэныгъэми зэпымычу хызогъахъуэ. Дахагъэм и закъуэ мыхъуу, узыншагъэми срителъхьэщ сэ, дохутыр сыщыхъукIэ. 
- ЦIыхум къарууэ къыкъуэ­кIыфынум, гъащIэм ерыщу пэщIэт, псэуну хъуапсэм урищапхъэ дахэщи, ди гуапэщ адэкIи еб­гъэфIакIуэу, хэбгъахъуэу къы­пыпщэну, Марьянэ. 
- Узыншэ ухъу! Газетым къыс­хуэфщIа гулъытэр хуабжьу си ­гуапэщ!
 

Епсэлъар ФЫРЭ Анфисэщ.
Поделиться: