Щэнхабзэмрэ спортымрэ я фестиваль

Шэшэн республикэм и Грознэ къалэм дыгъуасэ къыщызэIуахащ Кавказым ис лъэпкъхэм я ебланэ щэнхабзэ, спорт фестивалыр. ФокIадэм и 23 - 25-хэм екIуэкIыну зэхыхьэ гуапэм зэ­хуи­шэсащ музейхэм я лэ­жьа­кIуэхэр, артистхэр, декоративно-прикладной гъуазджэм и IэпщIэлъапщIэхэр. Апхуэдэу абы зыкъыщагъэлъагъуэ Лэс­кэн, Шэрэдж, Прохладнэ щIыналъэхэм я лIыкIуэхэм. Ар къы­зэрагъэпэщащ УФ-м ЩэнхабзэмкIэ, СпортымкIэ и министерствэхэм, Урысейм ис лъэпкъхэм я щэнхабзэ хъугъуэфIыгъуэхэм я гъэу мы илъэсыр зэрагъэувам хыхьэу.
 
Фестивалым хэтщ Урысейм и хэгъэгу 14-м щыщ цIыху 600-м нэблагъэ. Зэхыхьэр щаублэм концерт ятащ Кавказ Ищхъэ­рэмрэ Ипщэ фе­деральнэ щIыналъэмрэ я уэрэ­джыIакIуэхэмрэ къэфакIуэхэмрэ - «Вайнах», «Заманхо», «Башлам», «Нохчо», «Молодость Дагестана», «Ингушетия», «Балкария», «Алан», «Ставрополье», «Чёрное море», «Криница», «Тюльпан», «Ислъэмей» ансамблхэм.
ЦIыхуи 180-м щIигъу зыхэт зэ­хыхьэшхуэм Къэбэрдей-Балъ­къэ­рым и лIыкIуэхэми лъэпкъ пщIантIэхэр щагъэуващ. Абы щагъэлъагъуэ декоративно-прик­ладной гъуазджэмкIэ лэжьыгъэхэмрэ лъэпкъ шхыныгъуэ­хэмрэ. Зэхуэсым хэтхэмрэ абы и хьэщIэхэмрэ Iэмал яIэщ лъэпкъ зэмылIэужьыгъуэхэм утыку щагъэлъагъуэ гъэщIэгъуэнхэм зыщагъэгъуэзэну.
Шахбулатов Аднан и цIэр зезыхьэ Шэшэн къэрал филармонием нобэ къы­щы­зэрагъэ­пэщынущ «Многонациональная Россия» урысейпсо лъэпкъ зэхыхьэр. Абы щрагъэ­кIуэкIынущ «Культурный код на­ро­дов России» зэIущIэр. Зэ­хыхьэм щытепсэлъыхьынущ Уры­сейм ис лъэпкъхэм я тхыдэ хъугъуэ­фIыгъуэхэмрэ щэнхабзэ лъапIэныгъэхэмрэ зэрахъумэ­жы­нум, ахэр зэрагъэбэгъуэнум.
Щэнхабзэ, спорт зэхыхьэшхуэм ирагъэблэгъащ гъуазджэмрэ цIыхубэ творчествэмрэ къэрал дэIэпыкъуныгъэ яIэнымкIэ департаментым и унафэщI Косаревэ Оксанэ, «Росконцерт» Iуэ­ху­щIапIэм и унафэщI Малышев Андрей, абы и къуэдзэ Кондратьевэ Светланэ, ЦIыхубэ творчествэмкIэ Поленов Василий и цIэр зезыхьэ къэрал унэм и унафэщI Пуртовэ Тамарэ, лъэпкъ творчествэ гупхэм я зэгухьэныгъэм и президент, «Лезгинка» академическэ къэрал къэфакIуэ ансамблым и унафэщI Магомедов Джамбулат, театрымрэ телевиденэмрэ я режиссёр Цветков Сергей сымэ, нэгъуэщIхэри.

ТЕКIУЖЬ Заретэ.
Поделиться: