Ухуэныгъэ гъэщIэгъуэнхэм йолэжь

Шыпш Жаннэ къиухащ Налшык къалэм дэт гимназие №29-р. ИужькIэ ар Ипщэ федеральнэ университетым, Архитектурэмрэ гъуазджэхэмкIэ Академием (Ростов къалэм) щеджащ, архитектурэ IэщIагъэ зригъэгъуэтащ. Жаннэ и диплом лэжьыгъэр зытриухуауэ щытар, къат куэду зэтет унэм и проектыр, къыхахауэ щытащ Дон Iуфэ Iус Ростов къыщызэрагъэпэща выставкэм щагъэлъэгъуэну.

- IуэхущIапIэм и проектым сыщелэжьым къалэн нэхъыщхьэу зыхуэзгъэувыжар пэш кIуэцIхэр зэгъэзэхуауэ къызэгъэпэщыным и закъуэтэкъым, атIэ гулъытэшхуэ хуэсщIат япэ къатищыр зыми емыщхь сабийхэм зыщрагъэужь IуэхущIапIэу къызэрагъэсэбэпыфынум, - жеIэ Жаннэ. 
ЛэжьыгъэмкIэ хъыджэбзым и мурадащ зи зыужьыныгъэм ныкъусаныгъэ иIэ сабийхэм гулъытэ нэхъыбэ хуащIыным цIыхубэр къыхуриджэну.
ЕджапIэ нэхъыщхьэр къиуха нэужь, Шыпшыр Прагэ дэт Чехие Техникэ университетым и магистратурэм и щIэныгъэм щыпищащ. Щеджэ зэманым ар Дубай стажировкэ ягъэкIуащ икIи и япэ проектыр триухуауэ щытащ хьэхэмрэ джэдухэмрэ папщIэ отель-резортым и ухуэныгъэм и проектыр гъэхьэзырыным. КъыкIэлъыкIуэ илъэситхум Жаннэ щылэжьащ «Zebra Projects» британ компанием. Абы ар щелэжьащ Next, Mothercare, Victorias Secret, Hamleys, Topshop Topman, Monsoon бренд цIэрыIуэхэм дизайн проектхэр яхуэщIыным. 
ИужькIэ Шыпшым езым IэщIагъэлI гуп зэщIигъэуIуэри, елэжьын щIидзащ электрокъарур мащIэу къыщыбгъэсэбэпыфыну таунхаусхэм. Жаннэ и проектхэр щагъэзэщIащ Урысейми Хьэрып Эмират Зэгуэтхэми. Иджыпстуи абы и гупыр и гъусэу дунейпсо проектхэм йолэжь.
2020 гъэм абы Налшык къалэм къыщызэIуихащ архитектурэ ухуэныгъэхэм я проектхэр зэращIым студентхэмрэ IэщIагъэлIхэмрэ щыхигъэгъуазэ, «Архитектурэ Хаб» зыфIища платформэр. Абы екIуалIэхэр мы зэманым йолэжь ныкъуэдыкъуэхэм я узыншагъэр щрагъэфIакIуэ центрым и проектым.