IэщIагъэлIхэм я щIэныгъэм хагъахъуэ

Прохладнэ щIыналъэм хыхьэ къуажэхэм щIыпIэ унафэр щызэрахьэ я IуэхущIапIэхэм щылажьэ IэщIагъэлIхэм я щIэныгъэм щыхагъахъуэ курсхэр Бэрбэч ХьэтIутIэ и цIэр зезыхьэ Къэбэрдей-Балъкъэр къэрал университетым иджыблагъэ щрагъэкIуэкIащ.

«КъулыкъущIапIэхэмрэ щIыналъэ унафэщIхэмрэ Iуэхугъуэ пыухыкIахэм тегъэпсыхьа жылагъуэ зэгухьэныгъэхэм япыщIауэ зэрыщытыну щIыкIэмрэ а IэнатIэм Iулъхьэм епха щыщIэныгъэхэр къызэрыщызэпыудыпхъэмрэ» зи фIэщыгъэ курсхэм къуажибгъум я IэщIагъэлIхэр хэтащ, лэжьыгъэ гъэщIэгъуэни кърахьэлIащ.
Жэпуэгъуэ мазэм екIуэкIа курсхэр КъБР-м Лъэпкъ Iуэхухэмрэ жылагъуэ пэхуэщIэхэмкIэ и министерствэм зэхилъхьа программэхэм тету къызэрагъэпэщащ, ахэр зыгъэзэщIари щIэныгъэ и лъэныкъуэкIэ лъабжьэ иратыжу егъэджэныгъэ курсхэм хэзыпщари КъБКъУ-м и лэжьакIуэхэрщ.
КъБКъУ-м и егъэджакIуэ Шыбзыхъуэ Ренатэ я пашэу КъалэкIыхь щIыналъэм хыхьэ къуажибгъум я IэщIагъэлIхэм зыщагъэгъуэзащ къулыкъущIапIэхэр жылагъуэ икIи дин зэгухьэныгъэхэм зэрадэлэжьэну щIыкIэм теухуауэ щыIэ щIэныгъэм, жылагъуэ зэгухьэныгъэхэр зытетыпхъэ къэрал хабзэхэр зэпкърахащ, къэрал икIи щIыналъэ къулыкъущIапIэхэм я дежкIэ а зэгухьэныгъэхэм яIэ мыхьэнэмрэ щаубыд увыпIэмрэ хэлъ щхьэхуэныгъэхэр зрагъэщIащ. Апхуэдэу курсхэм хэта IэщIагъэлIхэм Iэмал яIащ КъБР-м лъэпкъ Iуэхухэмрэ жылагъуэ пэхуэщIэхэмрэ и министр КIурашын Анзор IущIэну, зыгъэпIейтей е гуитIщхьитI зыщI IуэхугъуэхэмкIэ пкърыупщIыхьыну.
Курсхэм хэтахэм зэрыжаIэмкIэ, кърата щIэныгъэхэр къахуэщхьэпэнущ езыхэм щIыпIэхэм щрагъэкIуэкI лэжьыгъэр убзыхунымкIэ, нэхъ нахуэ щIынымкIэ. ЦIыхуш куэд зыдэс къуажэхэм хасэхэр, зэгухьэныгъэхэр, зэщIэхъееныгъэхэр я1эщ. Абыхэм драгъэкIуэкI лэжьыгъэр зы жыпхъэм игъэувэн и лъэныкъуэкIэ курсхэр дэIэпыкъуныгъэшхуэ зэрыхъуар абы хэтахэм зэакъылэгъуу жаIащ.
КъБР-м Лъэпкъ Iуэхухэмрэ жылагъуэ пэхуэщIэхэмкIэ и министерствэм къыхилъхьа жэрдэмыр игъуэу зэрыщытыр, курсхэм къришэлIа IэщIагъэлIхэм щIэныгъэ хъарзынэ зэраIэр къыжаIащ икIи щIэх-щIэхыурэ мыпхуэдэ зэхуэсхэр ирагъэкIуэкIыну, къэрал хабзэхэм ягъуэт зэхъуэкIыныгъэхэм щагъэгъуэзэну, дэтхэнэ зы щытыкIэри зыубзыху хабзэр гъащIэм къыхэха щапхъэкIэ хузэпкърахыу дерсхэр къратыну зэрафIэигъуэри къыхагъэщащ.