Театр гъуазджэм хуэлажьэ

ЩоджэнцIыкIу Алий и цIэр зезыхьэ Къэбэрдей къэрал драмэ театрым и артисткэ, Кавказ Ищхъэрэм и лъэпкъ драмэ театрхэм я «Ипщэ утыку-I00» VI дунейпсо фестивалым «ЦIыхубз роль нэхъыфI» щIыхьыцIэр зыхуигъэфэща Гуэщокъуэ Регинэ театр гъуазджэм хэлъхьэныгъэфI хуэзыщIхэм ящыщщ.

Регинэ зэрыцIыкIурэ творчествэр и хамэкъым - и анэм классикэ, лъэпкъ къафэхэмкIэ гупжьейхэм ишащ, къыдэкIуэтея нэужьи IэщIыб хуэщIакъым иджыри сабийуэ Iэпэгъу хуэхъуа гъуазджэмрэ щэнхабзэмрэ. Курыт еджапIэ нэужьым Кавказ Ищхъэрэм ГъуазджэхэмкIэ и къэрал институтым щIэтIысхьащ. 2013 гъэм ар къиухри, Москва пэмыжыжьэу щыIэ Жуковскэ къалэм и «Стрела» театрым лэжьэн щыщIидзащ икIи абы хэту УФ-м и Театр лэжьакIуэхэм я зэгухьэныгъэм и IэщIагъэм щыхигъэхъуэну игъэкIуащ Калягин Александр и цIэр зезыхьэ дунейпсо театрым и гъэмахуэ школым. А школыр къиухри, щалъхуа Налшык къалэм къигъэзэжащ. Горький Максим и цIэр зезыхьэ Урыс къэрал драмэ театрымрэ НыбжьыщIэ театрымрэ ирагъэблэгъащ. Илъэс зыбжанэкIэ а IуэхущIапIэхэм щылэжьа нэужь, Къэбэрдей-Балъкъэр къэрал аграрнэ университетым творчествэмрэ нэгузыужь IуэхухэмкIэ и центрым и унафэщI IэнатIэр къыщыхуагъэлъагъуэм арэзы хъуащ икIи нобэр къыздэсым пэрытщ. Абы къыдэкIуэу, илъэситIкIэ узэIэбэкIыжмэ, ЩоджэнцIыкIу Алий и цIэр зезыхьэ Къэбэрдей къэрал драмэ театрым и спектакль еплъыну кIуауэ, IуэхущIапIэм и унафэщI икIи и режиссёр Фырэ Руслан зэрымыщIэкIэ хуэзащ икIи театрым щылэжьэну иригъэблэгъащ. Куэдрэ мыгупсысэу Регинэ зэрыарэзыр жиIащ икIи апхуэдэу хыхьэжа хъуащ езым пэгъунэгъу театр лэжьыгъэм. 
Регинэ лIыхъужь нэхъыщхьэхэм я ролхэр нэхъыбэу къыхуагъэфащэ, ауэ утыку кърихьэну нэхъ фIэгъэщIэгъуэнщ хьэл-щэн мыхъумыщIэхэр зыхэлъ лIыхъужьхэм я образхэр. ЦIыху къызэрыгуэкIхэм нэхърэ хьэл гугъусыгъу зиIэхэм Гуэщокъуэр нэхъ дахьэх, ахэр нэхъ кууужу зэрызэхищIыкIыным, ябгъэдэлъ щхьэхуэныгъэхэр театреплъхэм я фIэщ хъууэ къызэригъэлъэгъуэным хущIокъу. 
- Осетие Ищхъэрэ - Алание республикэм и режиссёр щIалэ Джалиев Къазбэч игъэува «Чёрное и белое» спектаклыр мы гъэм япэу дгъэлъэгъуащ. Абы Анджолинэ и ролыр щызгъэзэщIащ. КъыкIэлъыкIуэу, Фырэ Руслан игъэувыну зи ужь ихьа «Черкесская Жизель» спектаклым делэжьын щIэддзат, ауэ ди, жагъуэ зэрыхъунщи, иджыри хунэмысу дунейм ехыжащ. Балеринэ цIэрыIуэ, тхакIуэ, скульптор, актрисэ, адыгэ лъэпкъым къыхэкIа бзылъхугъэ дахэ Щамырзэ Моникэ (Черинэ Людмилэ) и гъащIэмрэ и лэжьыгъэмрэ зыхуэдар сценэм къыщигъэлъэгъуэжыныр Фырэ Руслан и хъуэпсапIэ къудейуэ къэнэжынкIэ сышынат, арщхьэкIэ хъыбарыфI къытIэрыхьащ Санкт-Петербург щылажьэ ди хэкуэгъу Къалэ Мурат а спектаклыр игъэувыну къызэрыкIуэжым теухуауэ, - жеIэ Регинэ. - КъызэрыщIэкIымкIэ, Руслан ролхэр къыттригуэшэну хунэсат икIи а лэжьыгъэм и роль нэхъыщхьэр – Щамырзэ Моникэ ейр къызэрысхуигъэфэщар къызжаIащ. Апхуэдизу дуней псом цIэрыIуэ щыхъуа ди лъэпкъэгъу бзылъхугъэм и ролыр бгъэзэщIэныр жэуаплыныгъэ ин зыпылъ Iуэхут икIи сынасыпыфIэу зыкъэслъытэжынт Руслан а ролым ехьэлIа и гугъапIэхэр къызэхъулIамэ, къызигъэза дзыхьыр схуэгъэпэжамэ… А лэжьыгъэхэм сфIэфIу сыщыджэгуащ. 
Регинэ и лэжьэгъухэр къызэрымыкIуэу зэрыцIыхуфIыр, щапхъэ зытрах хьэл-щэнхэр зэрадилъагъур и гуапэщ. Абы зэрыжиIэмкIэ, нэхъыжьхэр дапщэщи хьэзырщ лэжьыгъэм ехьэлIа сыт хуэдэ упщIэмкIи дэIэпыкъуэгъу хъуну. ФIыщIэ лей хуэфащэу къелъытэ сыт щыгъуи и чэнджэщэгъу лъапIэ ЖьакIэмыхъу КIунэ. Спектакль нэужьхэм темыпыIэжу поплъэ и лэжьыгъэр къызэрыщыхъуам теухуауэ КIунэ къыжриIэну псалъэхэм икIи ахэр зэрызыхилъхьэным хущIокъу.