Зи ныбжьыр илъэс 14 – 22-м ит хьэрычэтыщIэ ныбжьыщIэхэм я зэхьэзэхуэм и еханэ Iыхьэм щытекIуахэр «Си хьэрычэтыщIэ IэнатIэ» щIыналъэ центрым иджыблагъэ щагъэфIэжащ.
НыбжьыщIэхэм я зэхьэзэхуэм и еханэ Iыхьэм щытекIуащ Куп СулътIан, Джэрыджэ Ренат, Къуэдзокъуэ Росселлэ, Аттасауовэ Iэминат, Байдаев Алан, Сагиев Марат сымэ. Зи яужь ит Iуэхур ирагъэфIэкIуэн хуэдэу, зэхьэзэхуэм щытекIуа ныбжьыщIэхэм сом мин щэрыщэ къызэрахьам щыхьэт техъуэ тхылъхэр иратыжащ КъБР-м экономикэ зыужьыныгъэмкIэ и министрым и къуэдзэ Бэшорэ Рустамрэ «Си хьэрычэтыщIэ IэнатIэ» щIыналъэ центрым и унафэщI Дыду Мадинэрэ.
ГъэфIэж пшыхьым къриубыдэу екIуэкIа псалъэмакъым щIалэгъуалэр тепсэлъыхьыжащ зэхьэзэхуэм и хъыбарыр къызэращIа щIыкIэхэм, абы хыхьэн хуей щIэхъуа щхьэусыгъуэхэм, дяпэкIэ зи Iуэху зэрахуэнухэм, IэщIагъэрэ щIэныгъэрэ щызрагъэгъуэтыну щIыпIэм, нэгъуэщIхэми. Апхуэдэу абыхэм я насып къихьа ахъшэр зытрагъэкIуэдэнуми и гугъу ящIащ: хэти еджэныгъэм хилъхьэнущ, хэти унапIэр нищIысынущ, хэти кърихьэжьа хьэрычэтыщIэ IэнатIэм зригъэубгъунущ. Зи кIэн къикIыу зэхьэзэхуэм къыщыхэжаныкIахэм Бэшорэ Рустамрэ Дыду Мадинэрэ псалъэ дахэкIэ зыхуагъэзащ, дяпэкIи ехъулIэу, зыхыхьэ Iуэхум фIы къыхахыу, хьэрычэтыщIэ IэнатIэми зыщаузэщIу псэуну ехъуэхъуащ.
Фигу къэдгъэкIыжынщи, зэхьэзэхуэр къызэзыгъэпэщари езыгъэкIуэкIри Къэбэрдей-Балъкъэр Республикэм и Правительствэрщ, зыхуэунэтIари хьэрычэтыщIэ IэнатIэм щIалэгъуалэр къешэлIэнырщ. Зэхьэзэхуэм хэтыну хуитыр зи ныбжьыр илъэс 22-м щIимыгъуа ныбжьыщIэхэрщ.
Зэпеуэм хыхьэ хъунущ ищхьэкIэ къэдгъэлъэгъуа ныбжьым къитIасэу Урысейм зэпымыууэ щыпсэур, ар зэрыхьэрычэтыщIэмкIэ къэрал тхылъ иIэу лажьэмэ, щIыналъэ фондым и полисрэ КъБР-м медицинэ Iуэхутхьэбзэхэр къызэрыхуащIэ тхылъымрэ иIэмэ.
Зэхьэзэхуэр Iыхьэ куэду зэхэту мазэ къэс йокIуэкI. Ипэ ит зэпеуэгъуэм и Iуэху къыщимыкIамэ, къыкIэлъыкIуэхэм хыхьэ хъунущ.
Хьэрычэт щIэным пымыщIауэ, ауэ зэхьэзэхуэм хыхьэн хуейуэ ныбжьыщIэм гукъыдэж иIэмэ, япэщIыкIэ фIэкIыпIэ имыIэу зы Iуэху и ужь ихьэныр къэув Iуэхугъуэхэм ящыщщ. Аращ ебгъэфIэкIуэну икIи зебгъэубгъуну узэрыхэтым и шэсыпIэ хъури. Уи щхьэ узэрыхуэлэжьэжыр Iэмал зыбжанэкIэ къэбгъэлъагъуэ хъунущ: «Си хьэкъулэр» интернет напэкIуэцI зыщыптхи, Къэрал Iуэхутхьэбзэхэр щызэрагъакIуэ интернет утыкум ущиIэ напэкIуэцIым зыкъыщыбгъэлъагъуи хъунущ, КъБР-м цIыхухэм Iуэхутхьэбзэхэр щыхуащIэ щIыналъэ IуэхущIапIэхэм узэрыхьэрычэтыщIэмкIэ тхылъ щIэплъхьэ хъунущ. Абы къищынэмыщIауэ, «Си хьэрычэтыщIэ IэнатIэ» щIыналъэ центрым укIуэу абдеж зыщебгъэтхыу зэхьэзэхуэм ухыхьэнуи Iэмал щыIэщ. Центрым и хэщIапIэр Налшык къалэ дэтщ, Киров Сергей и цIэр зезыхьэ уэрамым и 224-нэ унэм хэтщ.
