«Кабардинка» къэрал академическэ ансамблым къикIуа гъуэгуанэ дахэм псори щыгъуазэщ. ГъэщIэгъуэныщэщ гупыр хамэхэм къазэрыщыхъуу щытар. Абы щыхьэт тохъуэ здэщыIа къэралхэм я газет-журналхэм къытрадза тхыгъэхэр. Абыхэм ящыщ зэддзэкIащи, ди гуапэу фи пащхьэ идолъхьэ.
«Либиан Мэйл» (Триполи):
- Дауэ хъуми, Урысей Ипщэм и къуршхэм я хьэуа къабзэм зы къару гуэр хэлъщ абы щыпсэухэм гъащIэм гурыфIыгъуэ хригъэлъагъуэу, къэфэным, уэрэд жыIэным зэпымыууэ я гур хуигъэжану. ЦIыху 47-рэ хъууэ Триполи къеблэгъа «Кабардинка»-м хэт щIалэгъуалэм ику иту я ныбжьыр илъэс 20 ирикъуу аращ, нэхъыщIэ дыдэр I6 хъуа къудейщ... ЩIалэхэм къызыхэкIа лъэпкъым хуэфащэу заIыгъщ, къару мыкIуэщI ядыболъагъу. Хъыджэбзхэр дахэ дыдэщ: щхьэцыгъуэ ухуэнахэмрэ я Iэпкълъэпкъ псыгъуэмрэ уатхьэкъу... Телъыджэщ. Мыбыхэм я концертхэр гуфIэгъуэшхуэщ. КъэфакIуэ гупыр зэ зылъэгъуам ар щыгъупщэнукъым. Дэтхэнэ къэфакIуэри артист нэсщ, нэхъыбэу бгъэщIагъуэр лъакъуэхэр зэрызэблахым и псынщIагъэрщ. Ар плъэгъун хуейщ. «Къуршыбгъэ», «ЛIыжь къафэ», нэгъуэщI куэдми ди псэр ятхьэкъуащ. Абыхэм къытебгъэзэжурэ Iэджэрэ уеплъыфынущ.
«Экзаминер» (Лонсестон. Австралие):
- «Кабардинка»-м и къэфакIуэхэм зэуэ дахьэхащ Лонсестоным и «Принцесс» театрым къекIуэлIахэр... Ар сыт хуэдэ дахагъэ абыхэм ялъэгъуар! Фащэхэм я дахагъэм, хъыджэбзхэм я зыIыгъыкIэмрэ щауэхэр зэрыуардэмрэ цIыхухэм ягъэщIагъуэрт, къафэхэм къытрагъэзэжыну щIэлъэIурт. КъэфакIуэхэм я лIыгъэмрэ хахуагъэмрэ гушыIэ зэрыхалъхьэжыфми гу лъыботэ. Гъуазджэ лъагэ гъуэтыгъуейхэм хуэдэщ ар.
«Меркурий» (Лонсестон):
- Тасманием (Австралием и штатщ. - «Б.Л.») зэи имылъэгъуа концертщ «Кабардинка»-м утыку кърихьар. «ИслъэмейкIэ» къыщIэзыдза гупыр пшыхьыр екIуэкIыхункIэ цIыхухэр къызэрыдихьэхыным пылъащ. Концерт пэшым къекIуэлIахэми зыгъэпсэхупIэ яIакъым: гъуазджэ къызэрымыкIуэм дихьэхахэр япIэ изагъэртэкъым, пIейтейт, Iэгуауэшхуэ яIэтт. Гукъинэ абыхэм ящыхъуахэм щыщщ гушыIэ къафэхэр... «Кабардинка»-м лъэпкъ къэфэкIэ къигъэлъагъуам и куууагъыр къэплъытэмэ, ар балетым хуэкIуэу къыщIэкIынущ...
«Кларин» (Аргентинэ):
- «Кабардинка»-р къызэрыфэм димыхьэхын щыIэу фIэщ щIыгъуейщ. Хьэлэмэтщ - щIалэхэр я Iэпкълъэпкъ псомкIэ, уеблэмэ нэкIи къофэ. ПсынщIэу, жану ягъэзащIэ къафэхэм удрагъэхьэх. ЦIыхубзхэми я зыIыгъыкIэм щхьэхуэу утепсэлъыхь хъунущ. Нэхъ щэныфIэу щытыхункIэ, нэхъ гурыхьыж мэхъу ахэр... Абыхэм къащыпс фащэхэр нэхъ дахэж зыщIыр, къызэрытщыхъумкIэ, я лъэпкъым папщIэ пагэу ар абыхэм зэрызэрахьэрщ.
«Ла Пренса» (Никарагуа), Руис Горацио:
- Дарио Рубэн и цIэр зезыхьэ цIыхубэ театрым цIыхушхуэ «Кабардинка» гупым зэрыщызэхуишэсыфар къэплъытэмэ, жыпIэ хъунущ Манагуэ зэхэщэхам щыпсэухэм иджыри дунейпсо гъуазджэр къафIэIуэхуу. Ансамблым и спектаклхэм хуэдэхэрщ дунейм и концерт гъэлъэгъуапIэ нэхъ инхэр зыхузэIуахын хуейр, ахэрщ къалэ зэхэкъутахэм псэщIэ яхэзылъхьэжынур. «Кабардинка»-м еплъыр щIыдихьэхыфыр цIыхухъумрэ цIыхубзымрэ я хьэл-щэныр къафэкIэ екIуу къызэриIуэтэфырщ. ЩIалэр сыт щыгъуи псынщIэщ икIи IэкIуэлъакIуэщ, апхуэдэ щIыкIэкIэ абы къегъэлъагъуэ и зэфIэкIымрэ къарумрэ. Пщащэхэри Iущщ, утыкур зыгъэдахэщ. Сыт и уасэ къэфакIуэ цIыхубзхэм ягъэзащIэ «Хъыджэбз къафэм» и закъуэ?! А лъэпкъ къафэр гупым я ехъулIэныгъэу убж хъунущ. Зэхуэдэпсу утыкум щес хъыджэбзхэр мелыIыч пэлъытэщ. ЦIыхухъухэм щхьэхуэу утемыпсэлъыхьу къыпхуэгъэнэнкъым. Ахэр гъуазджэм и лъагапIэфIым лъоIэс, «Iуащхьэм тету» къыщыфэкIэ. ФIыцIэ зэфэзэщкIэ хуэпа щIалэхэм а къафэр, дэпкIей-къелъых хэмыту, зэпIэзэрыту ягъэзащIэ. Къыхэгъэщыпхъэщ зи гугъу тщIы къафитIым фIэкI «Кабардинка»-м имыIэми, абы и концертхэр къызэрехъулIэнур.
«Ла Пренса», Альварадо Мрио Альфало:
- Никарагуа япэу зыкъыщызыгъэлъагъуэ совет артистхэм гулъытэ зыхуагъэщIыр. Абыхэм ягъэлъагъуэ гъуазджэм сыт хуэдэ къэралми пщIэ щиIэнущ.
Лъэпкъ фащэм пщIэшхуэ зэрыхуащIыр зыхыуигъэщIэну «Кабардинка»-м къохъулIэ. КъэфакIуэхэм ягъэзащIэм лъагъуныгъэ, пагагъэ, уардагъэ хэлъщ. ЩIалэхэм я жыджэрагъым пэщIэтщ щабэу къафэ хъыджэбз лантIэхэр. Ахэр зэгъусэу къыщызэдэфэкIэ, уи нэгу къыщIагъэхьэ бгырыс цIыхубзхэмрэ лIыхъужьхэмрэ я зы дуней.
«Ла Пренса»:
- Бэрэбанэм, бжьамийм, пшынэм я зэщIэжьыуэр зокIупс. КъэфакIуэхэм я нэгум къощ хахуагъэмрэ я лэжьыгъэм хуаIэ лъагъуныгъэмрэ. Хъыджэбзхэр гуащэ къупщхьэм хуэдэщ, къэфакIуэ щауэхэри къуданщ... «Кабардинка»-м удехьэх, гукъыдэж къуетыр, лъагащэу артистхэр зэрыдэлъейм укъегъэуIэбжь... Ансамблым и спектаклыр къыщIедзэ IуэрыIуатэм ухэзышэ «ИслъэмеймкIэ». Абы кIэлъокIуэ зым нэхърэ адрейр нэхъ дахэжу къафэ хьэлэмэтхэр. Абы еплъхэр псысэ гъуэзэджэм къыщыхутами ярейщ.
ЩIалэхэм я лIыгъэр къызыхэщ къафэр зэрахъуэкI фIыуэ зэрылъагъухэм я къафэкIэ. ИужькIэ, макъамэ щабэр къамэ зауэ къафэм хуокIуэж. Сэхэм IэкIуэлъакIуэу пхъэбгъум зыхезыгъасэ щIалэр икIи къофэ. «Кабардинка»-м и концертыр IэгуауэшхуэкIэ цIыхухэм яIэтащ.
«Эль соль де Мехико» (Мехико):
- «Кабардинка»-р гуп гъуэзэджэщ. «Ислъэмей», «Къафэ», «Мэлыхъуэ къафэ», «Абдзэх», нэгъуэщI къафэхэми къыбжаIэ Совет Союзым къикIахэм IуэрыIуатэ къулей къазэрыдэгъуэгурыкIуэр.
