Щтырыгъуу екIуэкI мы махуэхэм Къэбэрдей-Балъкъэрым и гъуэгухэм ткIийуэ я нэIэ тетынущ.
Куэд щIауэ диIакъым мы гъэм хуэдэу бжьыхьэ кIыхьрэ дахэрэ, ауэ къэса щIымахуэми езым и хабзэ иIэжщ; дыгъэгъазэм и япэ махуэхэм зэуэ уэс пIащIэр кърипхъыхри, хуабэу дунейр зэрекIуэкIа псори игъэзэкIуэж хуэдэ, зэуэ щIыр къэщтащ. Налшык къалэ администрацэм гъуэгухэмкIэ къалэр зэIузэпэщ щIынымкIэ и Дапартаментымрэ подряднэ организацэхэмрэ я IэщIагъэлIхэр жэщ-махуэ ямыIэу республикэм и гъуэгу нэхъыщхъэхэм щоплъыр.
Иджыпсту Iуэхум пэрытщ коммунальнэ службэхэм я лэжьакIуэу цIыху 300-м, спецтехникэу 25-м нэблагъэ. Абыхэм гъуэгухэм пшахъуэ, щыгъу тракIутэ. Апхуэдэу щосакъ къалэм и лъэс зекIуапIэ нэхъ инхэми.
Мы махуэхэм дунейм и щытыкIэм зэрызихъуэжым елъытауэ, абыхэм къадэIэпыкъунущ КъБР-м Транспортымрэ гъуэгу хозяйствэмкIэ и министерствэри «Горзеленхоз» IуэхущIапIэри. Гъуэгухэм я мызакъуэу, ахэр кIэлъыплъын хуейщ унэ куэду зэхэт фэтэрхэм я унащхьэхэм ирищIэкI Iумылхэми. Куэдрэ къохъу къэтIэсхъа мылыр зэуэ къехуэхыу, лъэс зекIуапIэхэм я курыкупсэм къыщытехуэ. Апхуэдэу шынагъуэ хъуащ балкон къэщIыхьахэм я унащхьэхэри: зэрыфлъагъущи, псоми хагъэхъуащ, уеблэмэ лъэс зекIуапIэхэм къащхьэщытыпэ яхэту. Ар зейхэм, цIыхур къэмыхъейуэ, мардэм темытыж я балконыщхьэхэм фIищIа мылыр къыпаудыныр фIэщщIыгъуейщ. Къанэр зи гугъу тщIа службэхэм я нэIэ тетынырщ.
