Унагъуэхэм зыщIагъакъуэ

КъБР-м и Парламентым и УнафэщI Егоровэ Татьянэ зи чэзу зэIущIэ иригъэкIуэкIащ. «Правительствэм хухах сы­хьэтым» хыхьэу, депутатхэр тепсэлъыхьащ Украинэм зи ­къалэнхэр щызыгъэзащIэхэм я унагъуэхэм зэрадэIэпыкъу Iэмалхэм.

Абы теухуауэ къэпсэлъа ­КъБР-м лэжьыгъэмрэ социаль­нэ дэIэпыкъуныгъэмкIэ и ми­нистр Асанов Алим зэрыжиIамкIэ, Украинэм зи къалэнхэр щызыгъэзащIэхэм я уна­гъуэхэм защIэгъэкъуэныр республикэм сыт и лъэныкъуэкIи къыщызэгъэпэщащ. Апхуэдэу, 2022 гъэм фокIадэм и 21-м ­УФ-м и Президентым «УФ-м дзэм еджэным теухуауэ» и унафэкIэ КъБР-м и дзэ комиссариатым ириджа ­зауэлIхэм яхуэгъэзауэ КъБР-м и ­Iэтащхьэм «ЗауэлIхэмрэ абыхэм я унагъуэхэмрэ зэрадэIэпыкъу Iэмалхэм дыщIагъухэм теу­хуауэ» и Унафэм тету, мазэ къэс сом мин 25-кIэ зыщIагъэкъуэну ягъэуващ. УIэгъэ, фэбжь зы­гъуэтахэм - сом мини 100-рэ сом мин 300-кIэ (уIэгъэ ягъуэтам и хьэ­лъагъым елъытауэ), зауэм хэкIуэдам и унагъуэм - сом зы мел­уан.
КъБР-м и Iэтащхьэм и унафэ­кIэ, унагъуэм иратын хуей дэIэ­пыкъуныгъэхэр зыхуэдизыр я хэхъуэхэм тещIыхьауэ щагъэбелджылыкIэ, Украинэм ще­кIуэкI Iуэхухэм къалэн щызыгъэзащIэхэм къахьыр халъхьэнукъым. А Iэмалыр хуэгъэзащ 2019 гъэм дыгъэгъазэм и 23-м «Ещанэ сабий, нэхъыбэ къызыхэхъуэ уна­гъуэхэм мазэ къэс зэрызы­щIагъакъуэм теухуауэ» КъБР-м и ЗаконымкIэ ят ахъшэм, «Уна­гъуэм, анэм, адэм, сабиигъуэр хъумэным теухуауэ» КъБР-м и Законым и Iыхьэ 17-1-м, егъэ­джэныгъэ IуэхущIапIэхэм сабийм къыщыхуащIэ Iуэхутхьэбзэхэм адэ-анэм трагъэкIуадэм и Iыхьэ етыжыным теухуауэ ­КъБР-м и Правительствэм 2016 гъэм дыгъэгъазэм и 6-м къыдигъэкIа унафэ №166-ПП-м.
Украинэм щекIуэкI Iуэхум хэтыну кIуахэм я унагъуэхэм зэры­зыщIагъакъуэр ирагъэ­фIэкIуэн мурадкIэ, социальнэ Iуэхутхьэбзэхэр къызэзыгъэ­пэщ IуэхущIапIэхэм я лэжьа­кIуэ­хэм унагъуэ­хэр къызэхакIухьащ, я псэукIэм, нэхъ зыхуэныкъуэм зыщагъэ­гъуа­зэу. 
Дзэ Iуэху хэхам хэтхэм я бынхэр гъэмахуэм зыгъэпсэ­ху­пIэхэм ягъакIуэ, апхуэдэуи медицинэ Iуэхутхьэбзэхэр «Радуга» сабий IуэхущIапIэм чэзум хэмыту щы­хуащIэ, щыгъынкIэ, ерыскъыкIэ зыщIагъакъуэ, нэгъуэщIхэмкIи доIэпыкъу. Сабий ныкъуэдыкъуэ зиIэхэм я хэхъуэхэр къамылъытэу, социальнэ Iуэхутхьэ­бзэхэр хуащIэ. КъищынэмыщIауэ, къулыкъу зыгъэзащIэм и щхьэгъусэр е лэжьэну хуитыныгъэ зиIэ и быным доIэпыкъу IэщIагъэ гуэр зрагъэгъуэтынымкIэ, IэнатIэ къахуэгъуэтынымкIэ, дэф­тэрхэр яхуэгъэхьэзырынымкIэ.
- Украинэм кIуэну ираджахэм псоми сом мин 50 иратащ. Абыхэм къыхуащэхуащ нэхъыбэу зыхуэныкъуэну хьэп­шыпхэмрэ ерыскъыхэкIхэмрэ (генераторхэр, кIапсэхэр, щIымахуэ щыгъынхэр, вакъэхэр, н.къ.). Къуа­жэ зыбжанэм я щIыпIэ адми­нистрацэхэм зауэлIхэм хурагъэшащ ахъшэрэ зыхуэныкъуэ хьэп­шыпхэмрэ, - жиIащ министрым.
Абы къызэрыхигъэщамкIэ, дзэм къулыкъу щызыщIэхэм я унагъуэхэм Iэмал яIэщ пщIэншэу кIуэну республикэм и щэнхабзэ IуэхущIапIэхэм. Библиотекэхэм Iуэхугъуэ къы­щызэрагъэ­пэщ­хэ­ми ахэр ирагъэблагъэ. Илъэ­сыщIэм ирихьэлIэу, Къэ­бэрдей-Балъкъэ­рым и артистхэр хэту ирагъэкIуэкIа нэгузыужь пшыхь­хэм апхуэдэ унагъуэхэр щыIащ. 
КъищынэмыщIауэ, дзэ къу­лыкъум ираджахэр фIагъ лъагэ зиIэ медицинэ дэIэпыкъуныгъэ хуей хъумэ, хуащIэ, я бынхэр къэрал спорт IуэхущIапIэ егъэтхынымкIэ, спорт щыгъын­хэмкIэ къызэрагъэпэ­щы­ным­кIэ зыщIагъакъуэ.
КъБР-м волонтёр Iуэхум зыщегъэужьынымкIэ ресурс центрым епхауэ #МЫВМЕСТЕ щIыналъэ штабыр мэлажьэ. Абы и къудамэхэр къалэ округхэмрэ муниципальнэ районхэмрэ щыIэщи, цIыхухэм сыт и лъэныкъуэкIи ядоIэпыкъу. 2023 гъэм щIы­шылэм и 11-м ирихьэлIэу щIы­налъэ штабым зыкъыхуа­гъэзащ дзэм къулыкъу щы­зыщIэхэм я унагъуэ 900-м. 
Асанов Алим къызэхуэсахэм ягу къигъэкIыжащ «Зелёный рынок» сату щIапIэм дзэм ираджахэм зэрыдэIэпыкъур щызэ­хуа­хьэс пэш къызэрыщызэIуахар.
ЗэIущIэм щытепсэлъыхьащ дзэм къулыкъу щызыщIэну кIуа­хэм я Iыхьлыхэм депутатхэм зыкъызэрыхуагъазэ Iуэхугъуэ­хэми: ятелъ кредитхэр пIалъэкIэ щхьэщахыным, псэупIэ-коммунальнэ IуэхутхьэбзэхэмкIэ я щIыхуэхэр нэхъ тыншу зэратыжыну Iэмалхэм, юридическэ дэIэпыкъуныгъэ ягъуэ­тыным, нэгъуэщIхэми ятеухуауэ.
УпщIэ зыбжанэкIэ зыхуагъэзащ КъБР-м и Дзэ комиссариатым и юридическэ къудамэм и унафэщI Гъуэныбэ Марьянэ.
Егоровэ Татьянэ депутатхэр къыхуриджащ закъыхуэзы­гъазэ цIыхухэм адэкIи жы­джэру ядэ­лэжьэну. 

* * *
Депутатхэр тепсэлъыхьащ «ЩIыуэпс, техногеннэ къэхъу­къащIэхэм цIыхухэмрэ щIыналъэхэмрэ ящыхъумэным теу­хуауэ» КъБР-м и Законым и Iы­-хьэ 9-мрэ 30-мрэ зэхъуэкIыны­гъэхэр хэлъхьэным и IуэхукIэ»,     «КъБР-м жьэн узыфэм пэщIэ­тыныр къыщызэгъэпэ­щыным теухуауэ» КъБР-м и Законым и Iыхьэ 6-мрэ 19-мрэ зэхъуэкIыныгъэхэр хэлъхьэным теухуауэ» ­КъБР-м и законхэм я проектхэм, нэгъуэщIхэми.

 

КъБР-м и Парламентым и пресс-IуэхущIапIэ.
Поделиться: