Джылахъстэней джэгу

Сабий творчествэмкIэ IуэхущIапIэу Тэрч къалэ дэтым и жэрдэмкIэ иджыблагъэ «Джылахъстэней джэгу» фIэщыгъэм щIэт зэпеуэ гъэщIэгъуэн а щIыналъэм щекIуэкIащ. Абы хэтащ курыт еджапIэ I6-м щеджэ ныбжьыщIэхэр.

Илъэс зыбжанэ хъуауэ ирагъэкIуэкI зэпеуэм и къалэн нэхъыщхьэр ди лъэпкъым ижь-ижьыж лъандэрэ къыдекIуэкI хабзэ дахэхэр, КъБР-м щыпсэу лъэпкъхэм я тхыдэм щIэблэр щагъэгъуэзэнырщ, абы пщIэ хуащIу къэгъэтэджынырщ. А зэхыхьэр сэбэп мэхъу школакIуэ цIыкIухэм утыку итыкIэ ящIэу къэгъэхъунымкIи.

Зэпеуэм хэтащ 3 - 5-нэ классхэм щIэсхэр. Зы гупым цIыхуипщI нэхъыбэ хэтыну хуиттэкъым. Къыхэгъэщыпхъэщ абы щIыналъэм ит курыт еджапIэ къэс зы гуп зэрагъэкIуар.

Мы Iуэхур зыгъэдахэхэм ящыщщ абы хэта цIыкIухэр адыгэ фащэкIэ хуэпауэ зэрыщытар.

Гупхэм ягъэхьэзырыну я къалэнт лъэпкъ хабзэхэр (нэхъыжьым зэрыхущытыпхъэр, бзылъхугъэм хуащI пщIэр, сабийр зэрагъасэр, хьэщIэ къегъэблэгъэкIэр, нэгъуэщIхэри) зи лъабжьэ теплъэгъуэ цIыкIу.

Зэпеуэр екIуу иригъэкIуэкIащ Сабий творчествэмкIэ IуэхущIапIэм и лэжьакIуэ Ахъумашэ Марианнэ. КъэпщытакIуэ гупым хэтащ Сабий творчествэмкIэ IуэхущIапIэм щезыгъаджэхэу Урыс Х., Хьэмокъуэ М., ЩIыналъэм дэт ЩэнхабзэмкIэ унэм и методист Жылау Л. сымэ.

Адыгэ фащэкIэ хуэпа ныбжьыщIэ цIыкIухэм уахэплъэн къудейри гухэхъуэт. Абыхэм я адыгэбзэ дахэр сыт и уасэт!

НыбжьыщIэхэм я утыку итыкIэ, жьэнахуагъ елъытауэ, къэпщытакIуэ гупым Гран-прир хуагъэфэщащ Тамбовскэ къуажэм къикIа гупым. Япэ увыпIэр Астэмрей, Болэтей, Тэрч къалэ дэт №1 прогимназием къикIахэм иратащ. ЕтIуанэ хъуащ Красноармейскэ, Инарыкъуей, Ислъэмей къуажэм я гупхэр, ещанэ увыпIэр хуагъэфэщащ Тэрч къалэ дэт №2 курыт еджапIэм, №1 лицейм, Борыкъуей, Урожайнэ, Курп Ищхъэрэ, Дей къуажэхэм къикIахэм.

Зэпеуэм щытекIуа гупым адыгэшым и теплъэ зиIэ кубок зэIэпахыр иратащ, Тэрч щIыналъэм къыбгъэдэкIыу ахэр ягъэкIуэнущ «Си Къэбэрдей-Балъкъэр» зэпеуэм.

«Джылахъстэней джэгум» къыщыхэжаныкIахэр ЕгъэджэныгъэмкIэ управленэм щIыхь тхылърэ фэеплъ саугъэтхэмкIэ игъэлъэпIащ.