Бажэмрэ джэджьеймрэ

Таурыхъ

Пщэдджыжь дыгъэм мэз дахэшхуэр къыдэушащ. Абы уэрэдкIэ щызэпеуэу щIадзащ бзу цIыкIухэм. Ауэрэ, мэзыр зэрыщыту къызэщIэушэри, щхьэж и Iуэху пэрыхьэжащ. Псом яужь и гъуэм къипщащ бажэ кIэлъэфыр. Хущхьэ щатэурэ ар хыхьащ мэз нэжэгужэм. Ауэ щежэх псы цIыкIум хэфауэ къыщыIукIыжым, абы дахэу зыщызыгъазэ бдзэжьейм гу лъитащ. ЗанщIэуи и гурыIупсыр къэжащ – пщэдджыжьышхэ хъарзынэт. Хопхъуэ псым. АрщхьэкIэ дэнэт, а дахэу зэрызигъазэм хуэдэурэ, IусыкIыжащ. Бажэми абы и Iуэху зэрихуэжакъым – дыгъуэпшыхь ищIа мурадыр игу къэкIыжат. Унагъуэ джэд пшэр ишхмэ нэхъыфIтэкъэ?! Мэзым къыщIэкIщ, зыкъиплъыхьщ – зыниплъыхьри, къуажэмкIэ иунэтIащ. И щыпэкIуэу къыщIэкIынтэкъым, пщIантIэм зыдигъахуэри, джэдэщми зыщIигъэхуэжащ. Ар къыщалъагъум, джэдхэр зэбгрылъащ. Плъэмэ, джэдкъуртыр зытелъэтыкIа абгъуэм джэдыкIэр изщ. ЖьэкIэ зы къипхъуэта къудейуэ, хьэхэр къыщытеуэм, къыщIэIащ. Зэрыхъуари имыщIэу, и гъуэм нэсыжмэ, джэдыкIэр зэрыпсэууэ и жьэм жьэдэлъщ. Ауэ егъэтIылъри, и щIыб къегъазэ. ЗыщIодэIукI. Къаху хуэдэкъым и лъэужь лъэпкъ. Ауэ сыт а теуIуэр? ЖыгыуIуи хуэдэкъым… ТогужьейкIри, джэдыкIэр егъэпщкIу. ХуеплъэкIыжмэ, - джэджьей цIыкIу къопщ джэдыкIэм. МэгуфIэ бажэр, лы сиIэщ, жеIэри. АрщхьэкIэ, сыт хэлът абы пшхыну? Бажэм мурад ещI, къыдэкIуэтейуэ тIэкIу нэхъ пшэр хъуху, абы и гугъу имыщIыну.
Джэджьейм хэхъуэу щIедзэ. Бажэм ар егугъуу игъашхэрт, удзыпэ цIынэ цIыкIухэр къыхуихьырт, жыгыжь пхъафэхэр къыхуигъэтIылъырти, хьэпIацIэ цIыкIухэм иригъэуIурт, жэщкIэрэ и кIэ бацэ щабэм хигъэлъырт. Ауэми гугъу дехьрэт ар абы, ауэ дехьрэт! Къэхъурт жэщкIэрэ щымыжей – шынэрт ипIытIынкIэ…
Апхуэдэурэ, мази - мазитIи кIуаи, бажэм джэджьейр ишхын Iуэху зэримыхуэж мэхъу. Дауэ ишхыжынт апхуэдиз бэлыхь зыдишэчар?! Абыи и закъуэтэкъым. Есат, ныбжьэгъу къыхуэхъуат. Иджы абы щIэпсэуни зыхуэпсэни иIэ хъуауэ къыщыхъужырт. Пщэдджыжь гуэрым бажэр, зэрихабзэу, жьыIуэу къэтэджри ежьащ пщэдджыжьышхэ лъыхъуэну. ШэджагъуэхуэкIуэ хъуауэ къэсыжмэ, джэдыр бгъуэтмэ къащтэ. Куэдрэ къилъыхъуащ ар бажэм, игъуэтакъым. ЗдэмыкIуа къигъэнакъым ихъуреягъым. И лъакъуэхэм ямыIыгъыж щыхъум, тIысри гъащ, мэзыр къигъэдаIуэу. Сыт хуэдиз бэлыхь дишэчат абы, и жей игъэныкъуэу, дахэ-дахэу мышхэу мэзми хуиту къыщимыкIухьыжу… IукIэ ипIат.
Абы лъандэрэ зэмани дэкIыжащ, ауэ жаIэ джэд гъэхъуным гугъуехьу пыщIар зыгъэунэхуа бажэр зэи цIыхухэм емыдыгъуэжауэ.