КъБР-м и Iэтащхьэ КIуэкIуэ Казбек Сталинград зауэшхуэм къыщытхьа текIуэныгъэм и махуэмкIэ республикэм исхэм ехъуэхъуащ

«Нобэ дэ ди къэралым и тхыдэм и пIалъэ гъуэзэджэр – нэмыцэ – фашист дзэхэр Сталинград зауэшхуэм зэрыщэзэтракъутэрэ илъэс 80 щрикъу махуэр догъэлъапIэ. Ар Хэку зауэшхуэм и зэхэуэ нэхъ ин дыдэу щытащ. ЗэпэщIэтыныгъэр екIуэкIащ 1942 гъэм бадзэуэгъуэм и 17-м щыщIэдзауэ 1943 гъэм мазаем и 2-м нэсыху. 
Сталинград зауэм дызэрыщытекIуам мыхьэнэшхуэ иIащ, сыту жыпIэмэ ЕтIуанэ дунейпсо зауэм абы кIэщIкIэ зыкъыдигъэзащ. А махуэхэм Волгэ Iуфэ щекIуэкIахэм елъытауэ щытащ ди къэралым, зэрыщыту дунейм тет псоми я къэкIуэнур. Къэралым адэкIи ебгъэрыкIуэн папщIэ Кавказыр мылъку хэкIыпIэ ящIыну фашистхэм яIэ мурадхэри абы и фIыщIэкIэ къехъулIакъым. Сталинград лъэныкъуэмкIэ къыщыхъуахэм я фIыгъэкIэ Кавказ Ищхъэрэм и ебгъэрыкIуэныгъэр ежьащ. ЩIышылэм и 11-м ирихьэлIэу Совет Армэм нэмыцэ-фашист зэрыпхъуакIуэхэм къаIэщIигъэкIыжащ Къэбэрдей-Балъкъэрыр, ди къэралым и Ищхъэрэм щыщ нэгъуэщI щIыналъэхэр.
ЦIэрыIуэ хъуа Сталинград зауэм Къэбэрдей-Балъкъэрым и къуэхэри хэтащ. Псори зыхущIэкъуа текIуэныгъэм папщIэ абыхэм ящыщ куэдым я псэр ятащ. Ди зауэлIхэр хахуэу бийм пэщIэтащ, дэтхэнэ щIы Iэпэбжьэри, дэтхэнэ зы унэри яхъумэу. Хэкум и къуэ пэжхэр я щIыналъэм, къэкIуэну щIэблэхэм я мамрыгъэм апхуэдэу щIэзэуащ. 
Дзэ Плъыжьым, Сталинград дэсахэм я лIыхъужьыгъэр къызэрымыкIуэ лIыгъэм, къызэфIэмыщIэж къарум я щапхъэщ. Дэ Сталинград зауэшхуэм и лIыхъужьхэм я фэеплъ лъапIэм ди щхьэр худогъэщхь. Абыхэм зэрахьа лIыгъэр Урысейм лъэпкъ куэду зэхэт и цIыхубэр зэкъуэзыгъэувэ щапхъэу сыт щыгъуи щытынщ», - къыщыгъэлъэгъуащ республикэм и Iэтащхьэм и тхыгъэм.

 

Поделиться: