Музыкэ театрыр – илъэс 55-рэ!

IуэхущIапIэм и уэрэджыIакIуэхэр

Сэ сырогушхуэ дунейм щыпсэу лъэпкъхэм дахэмышыпсыхьыжу ди макъамэхэр дгъэIуну, ди бзэкIэ уэрэд жытIэну, лэжьыгъэ гъуэзэджэхэр щыдгъэувыну Музыкэ театр дызэриIэм. Дэ дылъэпкъышхуэкъым, адыгэхэм нэхърэ куэдкIэ нэхъыбэ хъухэми, щIыналъэ нэхъ ин исхэми щыщу ди театрым хуэдэ зимыIэхэр куэдыкIейщ. Иджыри зэ жызоIэри, си щхьэр лъагэу сегъэлъагъуж мы ди IуэхущIапIэ уардэм, абы сызэрыщылэжьэфын талант сызэриIэм сринасыпыфIэщ.

          Дэ фIыщIэшхуэ хуэтщIу ди гум идгъэлъыпхъэщ Ансимов Георгий, ди егъэджакIуэшхуэм. Аращ ди театрым япэ дыдэу щагъэлъэгъуа «Севастопольский вальсыр» зи нэIэм щIэту ягъэувауэ щытар. ИужькIэ зэчий зиIэу къыхэжаныкI закъуэтIакъуэр дыкъыхишыурэ абы и классым дыщригъэджащ. Япэу абы иригъэджахэм ящыщщ Мэкъуауэ Хьэсэн. ИужькIэ абы и классым сэ сыщIэсащ, сяужькIэ – Къумыкъу Мухьэдинрэ Бэлахъуэ Анитэрэ. Ар сигу нэхъри къыщIэкIыжар мастер-классхэр димыIэу зэрымыхъунурщ. Апхуэдэ цIыхушхуэхэр къытхэмыхьэмэ, ди зэфIэкIыр ямыгъэунэхумэ, дэри абыхэм дадэплъейуэ щIэ гуэрхэр къэдмыщIэмэ, сыт хуэдэ щIэныгъэ, зэфIэкI димыIэми дыщIэтIысыкIынущ. Зэман-зэманкIэрэ зэчийр «зэщIэгъэплъэн» хуейщ. Мис абы ехьэлIауэ Ансимовым хуабжьу лэжьыгъэшхуэ ищIащ.

         Сыт и уасэт Мэкъуауэ Мулид, ПащIэ Ахьмэд, Дэбагъуэ Хьэсэн сымэ я зэфIэкIыр театрым далъэгъуну?! Апхуэдэкъэ илъэс куэд хъуауэ ди IуэхущIапIэм щылажьэ Белоцерковская Динэ, Морозовэ Наталье сымэ. 

         Театрыр зы Iэпкълъэпкъщ, зы ансамблщ. НэхъыфIщ, нэхъ Iейщ жыпIэу бгуэш хъунукъым. Зым хэмылъыр адрейм хэлъу, зызыщIагъакъуэу зэдэлэжьэныр театрым щIэлъ хабзэхэм ящыщ зыщ. Апхуэдэхэщ Бэгъуэтыж Светланэ, Бесчокъуэ Майе, Таукеновэ Галинэ, Къалэбэч Иринэ, Сидаренкэ Любэ, Асадулаевэ Любовь, Азэмэт Наталье, Шэрджэс Iэсият, Нежинэ Маринэ, Мэмбэт Мадинэ, Мэз Джульеттэ. ЦIыхухъухэм Жылокъуэ Мухьэмэдин, си гъусэу зы махуэм театрым къэзыгъэзэжауэ щыта Хъупсырджэн Албэч, зэфIэкIышхуэ зиIэ КъуийцIыкIу Валерэ, дызэрыгушхуэ Батыр Мухьэдин. Тенор партиер Куэт Къанщобийрэ ШэджыхьэщIэ Аслъэнбийрэ зэдагуэшу илъэс куэдкIэ сценэм итащ, иужькIэ а макъ лIэужьыгъуэр димыIэу Къумыкъу Мухьэдин къэкIуэжауэ щытащ. Спектаклхэм лIыхъужь нэхъыщхьэ ролыр нэхъ щызыгъэзащIэхэм ящыщщ Ташло Алий, сыт и лъэныкъуэкIи зэфIэкI зиIэ, куэд дыдэкIэ дызыщыгугъ артистщ ар.

ГъуазджэмкIэ Кавказ Ищхъэрэ институтым солист къыщIегъэкI, ауэ иужьрей илъэси I0-I2-м уэрэджыIакIуэхэу Нежинэ Маринэ, Къардэн Радик, Гуазэ Тимур, Мэмбэт Мадинэ, Мэз Джульеттэ сымэ фIэкIа къыдимытами, а IуэхущIапIэм дыхуэарэзыщ. ФIыкIэ дызыщыгугъ, куэд зыхузэфIэкIыну щIалэгъуалэщ Гуртуевэ Лейлэ, Абанокъуэхэ Рустамрэ Эльмирэрэ, Щоджэн СэIихьэт, Гергокаевэ Хьэлимэт, Холамханов Къайсын, ЦокIыл Азэмэт, нэгъуэщIхэри. 

         Наршаовэ Шэхэдат, Ерчэн Ларисэ, Къуэдзокъуэ Людэ, Къуныжь Алим сымэ ягъэзащIэ «характернэ роль» жыхуэтIэхэр хэмыту зы спектали театрым щекIуэкIыркъым. Псоми я цIэ къисIуэфакъым сэ, шэч хэмылъу,  ауэ къыхэзгъэщыну сызыхуейр зыщ: солистхэр цIыху 30-м нэс дохъури, псори фIыуэ дызэхущытщ.  Ди театрым щылажьэхэр зигури, зи псэри етауэ зи талантыр лъэпкъым хуэзыгъэлажьэ цIыху гупщ. Псори дызытегузэвыхьыр зы Iуэхущ – улахуэр зэрымащIэм и зэранкIэ цIыхухэр ди IэщIагъэм зэрыхуемыджэрщ, IэщIагъэлIхэр къызэрыдэмэщIэкIырщи, а унафэр зи IэмыщIэ илъхэм абы гулъытэ хэха хуащIыну дыщогугъ.