ЕгъэджакIуэхэм я къэхутэныгъэхэр

ГъуазджэхэмкIэ Кавказ Ищхъэрэ къэрал институтым ЩIэныгъэм и махуэм ирихьэлIэу щагъэлъагъуэ абы и егъэджакIуэхэмрэ лэжьакIуэхэмрэ я щIэныгъэ лэжьыгъэхэр. Ар къызэрагъэпэщащ хабзэ хъуауэ къэралым и щIэныгъэ, егъэджэныгъэ, щэнхабзэ IуэхущIапIэхэм щрагъэкIуэкI урысейпсо Iуэхум хыхьэу.

Институтым щIэныгъэ лэжьыгъэхэмкIэ и проректор Эфендиев ФуIэд жиIащ ЩIэныгъэм и урысейпсо махуэм, мазаем и 8-м, ирихьэлIэу выставкэ купщIафIэ къызэрызэрагъэпэщар. Абы хагъэхьащ искусствоведхэм, музыкантхэм, къэфакIуэхэм, режиссёрхэм, литераторхэм, нэгъуэщI IэщIагъэлIхэм я Iэдакъэ къыщIэкIа щIэныгъэ тхыгъэхэр, диссертацэхэр, тхылъхэр, нэгъуэщIхэри.

- Псом хуэмыдэу дызэрыгушхуэщ ди лэжьэгъухэм  я ехъулIэныгъэхэр. Къэбгъэлъагъуэмэ, институтым и ректор, профессор Рахаев Анатолийрэ оркестр IэмэпсымэхэмкIэ кафедрэм и унафэщI, профессор Гринченкэ Галинэрэ «Илъэсым и егъэджакIуэ-2022» II международнэ къэхутэныгъэ зэпеуэм я лауреат  хъуащ. Ар къызэригъэпэщащ «Новая наука» международнэ центрым (Карелие Республикэ, Петрозаводск къалэ), - жиIащ Эфендиевым.

 ГъуазджэхэмкIэ Кавказ Ищхъэрэ институтым выставкэр щекIуэкI махуэхэм ирихьэлIэу, Шэшэн Республикэм и Iэтащхьэ Кадыров Рамзан и унафэкIэ, ШР-м щэнхабзэмкIэ и министрым и дэIэпыкъуэгъу, Шэшэным щIыхь зиIэ и артист Мажидов Аднан Рахаев Анатолий къритыжащ «Шэшэн Республикэм гъуазджэхэмкIэ щIыхь зиIэ и лэжьакIуэ» къэрал дамыгъэ лъапIэр.

- Къэбэрдей-Балъкъэрым и цIыхухэм фIыщIэ фхуэфащэщ Шэшэн Республикэм и тхыдэ напэкIуэцI гугъухэм, абы щекIуэкI зауэм зи щхьэ къыхэзыха  цIыхухэм  фазэрыдэIэпыкъуам папщIэ, - жиIащ Мажидов Аднан. -  Шэшэн Республикэм и гъуазджэ, щэнхабзэ гъащIэр зэфIэгъэувэжынымрэ абы зегъэужьынымрэ Рахаевым хэлъхьэныгъэфIхэр хуищIащ. 2000 гъэхэм ди республикэм и театр факультетхэм я студентхэм, си унафэм щIэта «Вайнах» къэрал къэфакIуэ ансамблым  и нэIэ зэрытригъэтар, гъунэгъу щIыналъэм исхэм къытхуащIа гулъытэр уасэншэщ. Лэжьэгъухэм, ныбжьэгъухэм ди зэхуаку дэлъ зэпыщIэныгъэр дгъэбыдэну ди мурадщ.  

Рахаев Анатолий и псалъэм къыхигъэщащ а дамыгъэр еджапIэм жэуаплыныгъэ ин пылъу зи лэжьыгъэм пэрыт и егъэджакIуэ псоми я зэхуэдэ ехъулIэныгъэу къызэрилъытэр икIи Шэшэн Республикэм и Iэтащхьэм фIыщIэ хуищIащ я лэжьыгъэм и пщIэр къызэрилъытам папщIэ. Апхуэдэу Рахаевым и гуапэу жиIащ дияпэкIи Кавказ Ищхъэрэм щыпсэу лъэпкъхэм я щэнхабзэмрэ гъуазджэмрэ хъумэным, зегъэужьыным я зэфIэкI зэрырихьэлIэну.

Мазаем и пэхэм щIымахуэ зыгъэпсэхугъуэхэр зэрырихьэлIэм къыхэкIыу, къыкIэлъыкIуэ егъэджэныгъэ семестрым «Знание» зэгухьэныгъэм и гъусэу къызэрагъэпэщынущ зэIущIэхэр, Нобель и саугъэтыр зыхуагъэфэща урыс щIэныгъэлIхэм теухуа дерсхэр.