Дэрэжэгъуэ къыхэзылъхьэр

Мастэрэ Iуданэрэ игъэIэкIуэлъэкIуэф зэрыхъуу дэн щIидзащ Батыр Зерэ. ЩэкI бзыхьэхуэ къыIэрыхьамэ, зэрыджэгу и гуащэхэм фэилъхьэгъуэ зэмылIэужьыгъуэхэр яхуидынут. Апхуэдэ зыхузэфIэкIым и ныбжьыр илъэси 4 хъуурэ арат. Езы бзылъхугъэм нобэ и нэгу къыхущIэгъэхьэжыркъым зыгуэр имыду зы махуи дэкIауэ. 

- Си анэр зэпымыууэ тегузэвыхьырт, мастэр зыщIыпIэ деж къыщызгъанэмэ, ар зыгуэрым къыхэуэнкIэ зэрыхъунум. Арагъэнт 
 а «IэщIагъэр» сыцIыкIу щIыкIэ зыхызигъэнэну иужь щIитар, - жеIэ Зерэ. - АрщхьэкIэ диплом плъыжьитI къэсхьу илъэси 8-кIэ а Iуэхум срилэжьэжа нэужь, мамэ зыкъиумысыжащ: «Сыту фIыуэ абы щыгъуэм дэныр пIэпызмыударэт!» - жиIэри. Пэжыр жыпIэмэ, сэ къызгурыIуэркъым, я лэжьыгъэр фIыуэ ямылъагъуми, абы махуэ къэс кIуэхэр. Сэ сыт щыгъуи сщIэрт дэрбзэр сызэрыхъунур икIи си мурадыр хуэмурэ зэзгъэхъулIащ. Лэжьэн щIэздза нэужьи, си гукъыдэжым абы нэхъри хигъэхъуа мыхъумэ, къыхэсха IэщIагъэм зэи сыхущIегъуэжакъым.
Узыпэрыт IэнатIэр гурэ псэкIэ къыхэпхамэ, абы нэхъ уохъулIэ, тыншу уролажьэ. Зерэ щIэныгъэ зэриIэм шэч къытепхьэнукъым, сыт хуэдэ IэмалыщIэри псынщIэу къепхъуатэри. Абы къиухащ Налшык дэта, Иджырей модэмкIэ лицейр (иджы Промышленность псынщIэмкIэ колледжыр). Ар къызэриухрэ илъэс 15 хъуауэ и IэщIагъэм иролажьэ.
ЕджапIэр къыщиухам лъэпкъ фащэхэр иду ар илъэсиплIкIэ щылэжьащ ХьэцIыкIу Мадинэ и IуэхущIапIэм. ИужькIэ Налшык къыщызэIуахауэ щыта тырку фабрикэ иным («Борэн-текстиль» зыфIащам) ирагъэблэгъащ, къыщIагъэкIым и фIагъыр къипщытэу щылэжьэну. Зерэ и Iэзагъэм щIэх дыдэу гу лъитэри, IуэхущIапIэм и унафэщIым бзылъхугъэр конструктор-дизайнер ищIащ, Москва къалэм ирагъашэ хьэпшып лIэужьыгъуэщIэхэмкIэ жэуап ихьу. 
Иужьым Батырым езым и лъэжьапIэ IэнатIэ къызэIуихыжащ. Зыгъэпсэхугъуэ махуэ имыIэу дэн щIидзащ. Пщэдджыжьым къыщыщIэдзауэ пщыхьэщхьэ хъуху цIыхухэм яхуэдэрт, абы и ужьыжкIэ езым и IэдакъэщIэкIхэм елэжьырт - лъэпкъ фащэхэмрэ ныпхэмрэ, фэилъхьэгъуэ дахэхэм, саугъэт хьэпшыпхэм, нэгъуэщI куэдми. 
Апхуэдэу илъэсиплIкIэ и щхьэм хуэлэжьа нэужь, Зерэ зэрызиужьын хуейм егупсысри, а Iуэхум и ужь ихьащ. Москва къалэм кIуа нэужь, ар ирагъэблэгъащ «Белое золото» фIэщыгъэм щIэту лажьэ цехым. Абы илъэс ныкъуэкIэ щылэжьащ, итIанэ дизайнер ныбжьыщIэхэм модэмкIэ я унэм кIуащ. 
- Абы сыщыIэу, Сергеенкэ Ульянэ и дизайнер IуэхущIапIэм къращIыкIащ, лэжьакIуэ срагъэблагъэу. Сэ сыщыгъуазэт Сергеенкэм и лэжьэкIэм, къапщтэмэ, ар дуней псом къыщацIыху урысей дизайнерщ. Абы къыхэкIыу си гуапи хъуауэ, ауэ икIи абы сыдэлэжьэну схузэфIэкIынрэ схузэфIэмыкIынрэ сымыщIэу сыкIуат, си дэфтэрхэр схьыри. Иджы IуэхущIапIэм цIыхуи 150-рэ дыщызэдолажьэ. Дэтхэнэ дэрбзэрри, дыщэкIыр и IэдакъэщIэкIым зэрелэжьым хуэдэу, набдзэгубдзаплъэу и Iуэхум йоувалIэ. Мыбдеж икъукIэ къысщхьэпэн куэд къыщысщIащ, Iуэху бгъэдыхьэкIэм нэхъыбэж хэсщIыкI хъуурэ макIуэ, - къыддогуашэ дэрбзэр бзылъхугъэр. 
Зерэ зэлэжь фэилъхьэгъуэхэр къызэрыгуэкIкъым. Ар щылажьэ IуэхущIапIэр яхуодэ ди къэралым, дуней псом щыцIэрыIуэ цIыхухэмрэ пащтыхьыпхъухэмрэ. Абыхэм къыщIагъэкI фэилъхьэгъуэхэр илъэсым тIэу щагъэлъагъуэ Модэ Иным и тхьэмахуэ Париж щекIуэкIым.
Дэтхэнэ дизайнерри хущIокъу дунейм щIэуэ къытехьэр и IэщIагъэм хипщэну, абы щыгъуэми езым и хъэтIыр ихъумэжыну. Зери и IэдакъэщIэкIхэм сыт щыгъуи щIэщыгъуэ гуэр яхелъхьэ, мурадхэри и куэдщи, зыгуэр IэщIэмыхун щхьэкIэ, «дунейм къытригъэхьэну» зыхуей фэилъхьэгъуэхэр иритхэу зы блокнот зэпымыууэ иIыгъщ. «Дэрэжэгъуэ къысхэзылъхьэхэр» аращ абы и япэ напэкIуэцIым тетыр. 
Батыр Зерэ и IэдакъэщIэкIхэм щыщ щигъэлъэгъуауэ щытащ республикэм и щIалэгъуалэ зэгухьэныгъэхэм 20I5 гъэм Налшык къалэм къыщызэригъэпэща выставкэм. Дэрбзэр бзылъхугъэм и мурадщ къыщалъхуа щIыналъэм къигъэзэжмэ, и IуэхущIапIэр къызэIуихыжыну, и IэдакъэщIэкIхэр игъэлъэгъуэну. 
«Сыхуейт дизайнер ныбжьыщIэхэм ятещIыхьауэ гупжьей е зэгухьэныгъэ щхьэхуэ ди республикэм къыщызэIусхыну. Апхуэдэ зэфIэкI зиIэ хъыджэбз цIыкIухэр куэду дызэриIэм и щыхьэтщ Интернетым къралъхьэ я IэдакъэщIэкIхэр. КъызэхъулIэмэ, си зэфIэкIкIэ абыхэм садэIэпыкъуну сыхуейт, сыщIохъуэпс мы IэщIагъэм ирилажьэхэм я IэдакъэщIэкIхэмкIэ Къэбэрдей-Балъкъэрыр дэнэ щIыпIи къыщрагъэцIыхуным», - дыщIегъу Зерэ.
 

 

БАГЪЭТЫР Луизэ.
Поделиться: