Макъамэм дихьэха

ДжэгуакIуэм и макъамэр къэIуху, зы цIыху къеIусэну хуиттэкъым е ар зэпигъэуну зыми кърикуртэкъым. Апхуэдэ къару яIащ ижь-ижьыжым ди лъэпкъ макъамэ Iэмэпсымэхэм. А къарур щIэрыщIэу «къагъэбэуэж» жыпIэну, пшынэр зыгъэбзэрабзэ щIалэгъуалэр ди зэманым нэхъыбэ мэхъу. Абыхэм ящыщщ Къардэн Тимур.

ЩIалэр  Сафонов Василий и цIэр зезыхьэ Кавказ Ищхъэрэ къэрал филармонием и органисту, апхуэдэуи органнэ макъамэмкIэ и къудамэм и унафэщIу 2020 гъэ лъандэрэ мэлажьэ.

Макъамэ Iэмэпсымэхэм ар зэрыдахьэхым абы и анэм пасэу  гу лъитэри, Шэджэм Езанэ къуажэм дэт Музыкэ еджапIэм игъэкIуат.

- Е 5-нэ классым сыщеджэрт мамэ Музыкэ школым сыщишам, абдеж къыщыщIэдзауи пшынэм и макъамэм сыхэшэпсыхьыпауэ жыпIэ хъунущ. Ар и фIыщIэу къызолъытэ илъэситхукIэ гугъу зыкъыддезыгъэхьа ди гъэсакIуэ Щадз Ларисэ. А илъэсхэм Бах, Бетховен, Гайден сымэ я IэдакъэщIэкIхэр къэсцIыхуат, арщхьэкIэ иужькIэ сызытемыкIыжыну къыхэсхар, дауи, ди лъэпкъ пшыналъэхэрщ, - жеIэ Тимур.

         Курыт еджапIэр къиуха нэужь, 2012 гъэм Тимур щIэтIысхьащ Щэнхабзэмрэ гъуазджэмкIэ колледжым. Абы пшынауэ ныбжьыщIэм гъунэгъу къыщыхуэхъуащ икIи къыщыдэлэжьащ Санкт-Петербург консерваторэр къэзухыу Къэбэрдей-Балъкъэрым къэзыгъэзэжа, Кавказ Ищхъэрэм ГъуазджэхэмкIэ и институтым и профессор Шэрыб Валерэ. Шэрыбым и Iэзагъэмрэ щIалэгъуалэм щIэныгъэ зэрабгъэдилъхьэмрэ дихьэхауэ Тимур еджащ а илъэсхэм.

2007 гъэм Къардэн Тимур Налшык къалэ пшынэ еуэнымкIэ щекIуэкIа VI-нэ щIыналъэ зэхьэзэхуэм япэ увыпIэр къыщихьащ, «Петро-Павловские ассамблеи» дунейпсо зэпеуэми (Санкт-Петербург щекIуэкIащ) ар и зэфIэкI щеплъыжащ. «Ар си дежкIэ зэхьэзэхуэ къудейтэкъым. Пэжыр жыпIэмэ, апхуэдэ утыкушхуэ япэу сихьэу арати, къызэгугъуэкIари хэлът.  Ауэ согупсысыжри, дуней псом къикIыу апхуэдиз пшынауэ гъэщIэгъуэнхэр къызэкIуэлIа а зэпеуэр сэ дерсышхуэ схуэхъуат», - жеIэ Тимур.

         Колледжым и япэ курсым щеджэу пшынауэ ныбжьыщIэм «Играй, гармонь» республикэ зэхьэзэхуэм япэ увыпIэр щызыIэригъэхьащ, Къашыргъэ КIурацэ и фэеплъ зэпеуэми екIуу зыкъыщигъэлъагъуэри, пашэ щыхъуащ. УФ-м и Президентым ищIа Унафэм и фIыгъэкIэ, 2008 гъэм Къардэн Тимур яхэхуащ щIалэгъуалэ зэчиифIэхэм защIэгъэкъуэным теухуауэ ахъшэ саугъэт зыхуагъэфэщахэм. 20I2 гъэм абы етIуанэ увыпIэр къыщихьащ Лъэпкъ макъамэ Iэмэпсымэхэм еуэнымкIэ Сочэ къалэ щекIуэкIа дунейпсо зэпеуэм. Къигъэлъагъуэ ехъулIэныгъэхэм къыпэкIуэу, 2012, 2014 гъэхэм абы Къэбэрдей-Балъкъэрым и Iэтащхьэм и цIэкIэ ят стипендиер къыхуагъэфэщащ.

         2012-2016 гъэхэм Тимур и щIэныгъэм щыхигъэхъуащ Кавказ Ищхъэрэм ГъуазджэхэмкIэ и институтым. Зэреджэм хуэдэу, «Къуршым и бынхэр» сабий къэфакIуэ ансамблым пшынауэу лэжьэн щыщIидзащ. 2015 гъэм ар зы пIалъэкIэ щылэжьащ Зеикъуэ къуажэ дэт Сабий музыкэ еджапIэм ныбжьыщIэхэр пшынэм хуигъасэу. 

         Пшынауэ щIалэр хэтащ шыкIэпшынауэ Иуаз Зубер къызэригъэпэщауэ щыта «Бзабзэ» гупым. Ансамблым нэхъыбэу тегъэщIапIэ ищIыр лъэпкъ щIэиным щыщ пшыналъэхэмрэ къафэжьхэмрэщ. «Гупым сызэрыхэтам срогушхуэ, ди гъуазджэм и тхыдэм теухуауэ щIэ куэд къыщысщIащ.  Си щхьэкIэ сыкъапщтэмэ, иджырей макъамэхэр мыхъуу, сэ нэхъ сыдэзыхьэхыр ипэкIэ диIахэращ. Апхуэдэ куэд Зубер зэпымыууэ «къетIэщIыж», - жеIэ Тимур.

Къардэныр зыхэт лэжьыгъэхэм ящыщщ: «Дуэт- хит-парад» (Урысейм щIыхь зиIэ и артисткэ Бережная Светланэ и гъусэу), «Бах и его предшественники», «От барокко до современности», «Пять веков органной музыки», «Сквозь призму времени», «Вечное и прекрасное» (Сафоновым и цIэр зезыхьэ филармонием и хорым и гъусэу), «Рождественский сочельник» (хорымрэ филармонием и артистхэмрэ я гъусэу).

Ар цIыху цIэрыIуэ куэдым я мастер-класс гъэщIэгъуэнхэм хэтащ: Бережная Светланэ (Кисловодск), Йелемэ Тео (Голландие, Саратов 2019 гъэм), Шмит Алексей (Москва, Псков 2019 гъэм), Вексо Йохан (Франджы) Зарецкий Даниэль (Санкт-Петербург) сымэ ирагъэкIуэкIыу.

Къыхэгъэщыпхъэщ пшынауэр дирижёр цIэрыIуэхэми зэрадэлэжьар. Апхуэдэхэщ: Мыд Мадинэ (Налшык), Лэкъун Азэмэт (Налшык), Ботнис Димитрос (Москва), Кочнев Юрий (Саратов), Шахматьев Алим (Санкт-Петербург), Мухамеджановэ Алинэ (Кисловодск)).

2018 гъэм Тимур Киктэ Валерий и фэеплъу  органистхэм я дунейпсо зэхьэзэхуэ къызэрагъэпэщам (Кисловодск къалэм) еплъахэм я саугъэтыр къыщыхуагъэфэщащ. Глиэр Р.М. и цIэр зезыхьэ дунейпсо макъамэ зэпеуэм (Москва къалэм) тIэунейрэ лауреат щыхъуащ. 2020 гъэм Къардэным саугъэт нэхъыщхьэр къыщихьэхуащ Москва къалэм щекIуэкIа «АВИС» Езанэ дунейпсо макъамэ зэхьэзэхуэм.