УнафэщI гумызагъэ

22 марта, 2023 - 13:20
Нобэрей гъащIэм я IуэхущIафэкIэ жыджэру хэт цIыхубзхэм ящыщщ медицинэ щIэныгъэхэмкIэ кандидат, КъБКъУ-м и медколледжым 2004 гъэ лъандэрэ и унафэщI Пщыбий Светланэ. Бзылъхугъэр хэтщ КъБР-м и Парламентым ЕгъэджэныгъэмкIэ, щIэныгъэмрэ щIалэгъуалэм я IуэхухэмкIэ, ЛэжьыгъэмкIэ, социальнэ политикэмрэ узыншагъэр хъумэнымкIэ и комитетхэми. 
Пщыбийм Новгород Ищхъэрэ къалэм дохутыр-терапевту лэжьэн щыщIидзауэ щытащ. 1987 гъэм щегъэжьауэ Налшык къалэм дэIэпыкъуныгъэ псынщIэмкIэ и станцым и бригадэм дохутыру хэтащ, иужькIэ Тэрч къалэм и сымаджэщ нэхъыщхьэм дэIэпыкъуныгъэ псынщIэмкIэ и къудамэм и унафэщIу лэжьащ. 
1997 гъэм ар КъБР-м Узыншагъэр хъумэнымкIэ и министерствэм и IэщIагъэлI нэхъыщхьэ ящI, 2003 гъэм КъБР-м ШынагъуэншагъэмкIэ и Советым и аппаратым ягъакIуэ. КъБКъУ-м и медколледжращ къыкIэлъыкIуэу IэнатIэ хуэхъуари, ехъулIэныгъэ куэд къыдэкIуащ абы и лэжьэкIэм. 
Светланэ къыщыхэжаныкIащ «Урысейм щIэныгъэ курыт езыт и еджапIэ нэхъыфIи 100» урысейпсо зэхьэзэхуэм «2007 гъэм и унафэщI» и Iыхьэм. Абы къыхуагъэфэщащ КъБКъУ-м, КъБР-м Узыншагъэр хъумэнымкIэ и министерствэм, КъБР-м и Парламентым, УФ-м Егъэджэныгъэмрэ щIэныгъэмкIэ и министерствэм я щIыхь тхылъхэр, «Урысей зэкъуэт» политикэ партым и Къэбэрдей-Балъкъэр щIыналъэ къудамэм и фIыщIэ тхылъыр, «И IэщIагъэм зэрыхуэпэжым папщIэ» бгъэхэIу дамыгъэр. КъищынэмыщIауэ, Пщыбийр хэтщ Налшык къалэм къэрал кIуэцI IуэхухэмкIэ и управленэм дэлажьэ Жылагъуэ советым.
Светланэ и Iуэху бгъэдыхьэкIэр щапхъэ яхуохъу и лэжьакIуэ псоми. Абы гулъытэ хэха хуещI егъэджакIуэхэмрэ студентхэмрэ зэкъуэту, зэрылъытэу зэрызэдигъэлэжьэнум. И зэман щымысхьу, и къару емыблэжу и лэжьыгъэм зэрыбгъэдэтым и фIыгъэкIэ бзылъхугъэм еджапIэр Урысейм щынэхъыфI колледжхэм ядигъэгъуэгурыкIуэн лъокI. Абы и щыхьэтщ еджапIэм зыIэригъэхьа ехъулIэныгъэхэр: иужьрей илъэсхэм колледжым къыщIигъэкIа цIыху 200-м щIигъум я щIэныгъэм щыпащащ Къэбэрдей-Балъкъэр къэрал университетым. Абыхэм яхэтщ медколледжым къэзыгъэзэжу лэжьэн щIэзыдзахэр. КъищынэмыщIауэ, еджапIэр жыджэру ядолажьэ Ипщэ федеральнэ щIыналъэм щыIэ колледжхэм. ЩIалэгъуалэм щIэныгъэ етыным и мызакъуэу, абы я гъэсэныгъэр зэрекIуэкIми Пщыбийр езэш имыIэу кIэлъоплъ.
2017 гъэм медколледжыр ехъулIэныгъэ иIэу хэтащ «XXI лIэщIыгъуэм и еджапIэ IэнатIэ. Пашэхэм я зэпеуэ» урысейпсо зэхьэзэхуэм. 
Апхуэдэ IуэхуфIхэр зи унафэм щIэту къызэзыгъэпэщ Пщыбий Светланэ 2014 гъэм «Илъэсым и цIыхубз» цIэ лъапIэр къыхуагъэфэщащ, 20I6 гъэм КъБР-м егъэджэныгъэмкIэ щIыхь зиIэ и лэжьакIуэ хъуащ. 
2017 гъэм «IэщIагъэлI ныбжьыщIэхэр» щIыналъэ зэхьэзэхуэр къызэгъэпэщынымрэ егъэкIуэкIынымрэ хэлъхьэныгъэ зэрыхуищIам, республикэм лъы тын Iуэхур щегъэфIэкIуэным и зэфIэкI зэрыхилъхьам папщIэ, «Волонтёры-медики» къудамэхэм зегъэужьыным зэрыхэлIыфIыхьым ипкъ иткIэ Пщыбийм щIыхь тхылъхэр мызэ-мытIэу къратащ. 
Светланэ ехъулIэныгъэ щиIэщ щIэныгъэ-къэхутэныгъэ лэжьыгъэми, жыджэру хэтщ анэхэмрэ сабийхэмрэ я хуитыныгъэхэр хъумэнымрэ абыхэм защIэгъэкъуэнымкIэ Советым. Апхуэдэ IуэхущIафэхэр лъабжьэ яхуохъу Светланэ и лэжьэгъухэм пщIэ къыхуащIыным, и чэнджэщ щIэдэIуным. 
 
 
БАГЪЭТЫР Луизэ.
  • 16 просмотров
Поделиться: