Тхьэмахуэм къриубыда зэхьэзэхуэхэр

Къэбэрдей-Балъкъэрым и гуп нэхъыщхьэм хэту 2023 - 2024 гъэхэм щIымахуэ чемпионатым щыджэгуным щIэбэнхэм я зэIущIэхэр «ДыгъафIэ къалэм» и стадионым щызэхэтащ.

Къарэгъэш и «Инал» командэр япэ гупым бжьыпэр щызыубыда Шэджэм 2-нэ и «Къундетейм» IущIати, топджэгум дихьэххэр ягъэзэшакъым: тIури зыр-зым ебгъэрыкIуэ зэпыту джэгуахэщ икIи зэхэту гъуэм топибл дагъэкIащ. Бжыгъэр 5:2-уэ «Иналым» текIуэныгъэр къихьауэ зэIущIэр иухащ. ЕтIуанэ зэIущIэм ерыщу щызэпэщIэтащ Къэбэрдей-Балъкъэр мэкъумэш университетым и командэмрэ Кэнжэ и «Локомотивымрэ». Мыбдеж зэпэщIэтахэм я гъуэр нэхъ быдэу яхъумащ. ЗэIущIэм хухаха зэманыр яхурикъуакъым, хэт нэхъ лъэщми зэхагъэкIын папщIэ. Апхуэдэу щыхъум, зэхьэзэхуэм и хабзэм къызэригъэувым тету, метр 11 тезырыр гъэзэщIэнымкIэ зэпеуащ. Кэнжэдэсхэм я кIэныр нэхъ къикIащ икIи бжыгъэр 4:2-уэ текIуэныгъэр зыIэрагъэхьащ.

Иджыри футболым теухуауэ.

Зи ныбжьыр илъэс 35-рэ нэхъ мынэхъыщIэхэм я республикэ чемпионатым и кIэух зэIущIэм япэ увыпIэм щIэбэнуэ Бахъсэн и «Бахъсэн» командэмрэ «Псыгуэнсумрэ» щызэIущIати, 5:1 бжыгъэшхуэкIэ бахъсэндэсхэм текIуэныгъэ къахьащ икIи Къэбэрдей-Балъкъэрым и чемпион хъуахэщ.
 

Ди бэнакIуитIым я ехъулIэныгъэ

Бгырыпх ящIэлъу зэбэнынымкIэ Урысейм и Кубокым махуищкIэ щIалэхэри хъыджэбзхэри щIэбэнащ. Ар щекIуэкIащ Тэтэрстаным и Елабугэ къалэм. Абы хэтащ спортсмен 280-м щIигъу. Ахэр щIыналъэ 25-м къикIат. БэнакIуэхэр гупитIу гуэшауэ зэпэщIэтащ. Къэбэрдей-Балъкъэрым икIахэм щыщу тIум етIуанэ увыпIэр къахьри, дыжьын медаль къратащ. Килограмм 75-рэ зи хьэлъагъ гупым Темыржан Шамил къыщыхэжаныкIащ, 90 зи хьэлъагъхэм я деж ехъулIэныгъэ щызиIар Деваев Казбекщ. Зи цIэ къитIуа спортсменитIри Урысейм и командэ къыхэхам хэту Дунейпсо Кубокым щIэбэнынущ. Ар мы гъэм щызэхэтынущ Екатеринбург.

ДзюдомкIэ диIа зэфIэкIыр

Урысейм пашэныгъэ къыщыхьыным теухуауэ Екатеринбург къалэм щызэпеуащ зи ныбжькIэ илъэс 23-рэ нэхъыбэ мыхъу дзюдоистхэр. Мыбы щIалэуи хъыджэбзуи спортсмен 570-рэ хэтащ, щIыналъэ 59-м къикIауэ. Гуп пщыкIуплIу ягуэшат зэхьэзэхуэм хэтахэр. Ди республикэм икIахэу цIыхуищым ещанэ увыпIэр яубыдащ. Ахэр Къуныжь Роланрэ Абазэ Астемыррэ (кг 90 зи хьэлъагъхэм я деж), Байсиев Таулан (кг 81-рэ) сымэщ. 

СтIолыщхьэ теннисымкIи дыхуэмыхукъым

Налшык щекIуэкIащ стIолыщхьэ теннисымкIэ Кавказ Ищхъэрэм пашэныгъэ къыщыхьыным теухуауэ ныбжьыщIэхэм я зэпеуэ. Ди республикэм нэмыщI абы хэтащ Дагъыстэным, Ставрополь крайм, Осетие Ищхъэрэ - Аланием къикIа спортсменхэр. ЕхъулIэныгъэ яIэу хэтащ ди щIалэгъуалэр. Япэ увыпIэр Сундиевэ Елизаветэ, етIуанэр Котовэ Анастасиерэ Серогин Даниилрэ, ещанэр Лавринович Аурикрэ Гуэнокъуэ Тимуррэ къахьащ.Ахэр хэтынущ мазэ дызыхуэкIуэм Архангельск щызэхэтыну урысейпсо зэхьэзэхуэм.

Хьэщпакъ Хьэбий и текIуэныгъэ

Дагъыстэным и Хасавюрт къалэм спорт зэхьэзэхуэшхуэ щызэхэтащ. Ар теухуауэ щытащ Кавказ Ищхъэрэм бэнэкIэ хуитымкIэ пашэныгъэ къыщыхьыным. Спортсмен 300 къызэкIуэлIа зэпеуэм Къэбэрдей-Балъкъэрым икIауэ 16 хэтащ. ЗэкIэлъыпыту текIуэныгъитху къихьри, япэ увыпIэр иубыдащ ди бэнакIуэ цIэрыIуэ, спортым и мастер, иужь илъэсхэм зи ехъулIэныгъэшхуэхэмкIэ дызыгъэгуфIэ Хьэщпакъ Хьэбий. Ар зыхэтар зи хьэлъагъкIэ килограмм 92-рэ хъухэрщ. ЩIалэм и гъэсакIуэр ЛампIэжь Мулидщ. Иджы Хьэщпакъыр хэтынущ Урысейм и чемпионатым, мэкъуауэгъуэм и 13-19-хэм Каспийск къалэ щекIуэкIынум.
 

 

Спортыр щIэпхъаджащIэхэм япэщIэтщ

 «Налшык» спорт IуэхущIапIэм каратемкIэ республикэпсо зэхьэзэхуэ щекIуэкIащ спортсмен 210-рэ хэту. «Спортыр терроризмэм пэщIэтщ» - аращ абы и къыхуеджэныгъэу щытар. Мыбы зэфIэкI щызиIахэр Урысейм и чемпионатым хэтынущ. 

 

ШАФИЙ Аслъэн.
Поделиться: