Къэбэрдей-Балъкъэр Республикэм и Iэтащхьэ КIуэкIуэ Казбек иригъэкIуэкIащ Егъэджэныгъэ хэха щрагъэгъуэт, фейдэ къегъэщIыным емыпха «Iуащхьэмахуэ» корпоратив университет» IуэхущIапIэм и КIэлъыплъакIуэ советым хэтхэм я япэ зэIущIэр.
Советым и тхьэмадэу хаха КIуэкIуэ Казбек къыхигъэщащ корпоратив университетым и къалэн нэхъыщхьэр щIыналъэ, къэрал къулыкъущIапIэхэм щылажьэхэм я IэщIагъэм хэгъэхъуэныр зэрыарар. А Iуэхум къэралыр зэрыхуэныкъуэр ЩIыпIэ самоуправленэхэмкIэ УФ-м и Президентым деж щыIэ советым и зэIущIэм къыщигъэлъэгъуащ Путин Владимир.
«Iуэхур дызыхуэныкъуэщи, гъуэгу захуэм дызэрытетым шэч хэлъкъым, - жиIащ КIуэкIуэ Казбек. - Абы дызэрыт зэманым къытхуигъэув къалэнхэмрэ мардэщIэхэмрэ, Къэбэрдей-Балъкъэрым зиужьынымкIэ зыхуэдгъэувыжхэм, къэрал УнафэщIым ди пщэ кърилъхьэхэм пэлъэщын IэщIагъэлIхэр къыщIигъэкIынущ».
КIэлъыплъакIуэ советым хагъэхьащ УФ-м и Федеральнэ Зэхуэсым и Къэрал Думэм и депутатхэр, КъБР-м и Парламентым, Правительствэм хэтхэр, гъэзэщIакIуэ, щIыналъэ къулыкъущIапIэхэм щыIэхэр, еджапIэ нэхъыщхьэхэм щылажьэхэр, жылагъуэ зэгухьэныгъэхэм я лIыкIуэхэр. «Iуащхьэмахуэ» корпоратив университет» IуэхущIапIэм и къызэгъэпэщакIуэщ КъБР-м и Iэтащхьэм и Администрацэр, КъБР-м ЩIалэгъуалэм я IуэхухэмкIэ и министерствэмрэ Егъэджэныгъэмрэ щIэныгъэмкIэ и министерствэмрэ.
Советым и зэIущIэм хэтащ КъБР-м и Парламентым и УнафэщI Егоровэ Татьянэ, КъБР-м и Правительствэм и УнафэщI Мусуков Алий, УФ-м и Федеральнэ Зэхуэсым и Къэрал Думэм и депутатхэу Быф Анатолэ, Геккиев Заур, Родинэ Викторие, Щхьэгуэш Адэлбий, КъБР-м и Iэтащхьэм и Адиминистрацэм и УнафэщI Къуэдзокъуэ Мухьэмэд, Налшык къалэ администрацэм и Iэтащхьэ Ахъуэхъу Таймураз, КъБР-м и Iэтащхьэм и чэнджэщэгъу Миронов Николай, Къэбэрдей-Балъкъэр къэрал университетым и ректорым и къулыкъур пIалъэкIэ зыгъэзащIэ Алътуд Юрэ, КъБКъМА-м и ректор Апажэ Аслъэн, «Российское общество «Знание» урысейпсо жылагъуэ къэрал IуэхущIапIэм и унафэщIым и къуэдзэ Сериков Антон, Кавказ Ищхъэрэм ГъуазджэмкIэ и къэрал институтым и ректор Рахаев Анатолий, КъБР-м экономикэ зыужьыныгъэмкIэ и министр Рахаев Борис, абы и япэ къуэдзэ ТIымыжь Хъусен, КъБР-м ЗыужьыныгъэмкIэ и корпорацэм и унафэщI Чочаев Ахъмэт.
«Мэшыкъуэ» щIэныгъэ центрым унафэщIхэр зэрыщагъэхьэзыр программэм и гугъу ищIащ Сериков Антон: ««Iуащхьэмахуэ» корпоратив университет» проектыр Кавказ Ищхъэрэм щыяпэщ. Ар къыщIызэIуахар республикэм унафэщI къулыкъум пэрытыфынухэр ягъэхьэзырын папщIэщ. Абы папщIэ щIэн хуейхэр убзыхуауэ япэу утыку къизыхьар Къэбэрдей-Балъкъэррат».
Егъэджэныгъэ хэха щрагъэгъуэт, фейдэ къегъэщIыным емыпха «Iуащхьэмахуэ» корпоратив университет» IуэхущIапIэм и унафэщI Айбазовэ Тамарэ 2023 гъэм зэрылэжьэну яубзыхуа жыпхъэм къызэхуэсахэр щигъэгъуэзащ. «Хэгъэгум зыхуей хуэзэу щылэжьэну унафэщI гуп дгъэхьэзырын папщIэ Iуэхур зыIутыр къэтпщытэн хуейщ», - жиIащ абы. Университетым щеджэнухэр унэтIыныгъэ зыбжанэкIэ ягъэхьэзырынущ.
УнафэщIым къызэрыхигъэщамкIэ, иджыпсту нэхъыбэу зэлэжьынухэм ящыщщ Украинэм щекIуэкI дзэ Iуэху хэхам хэтхэм я сабийхэм папщIэ къызэрагъэпэща «ЛIыхъужьхэм я бынхэр» проектым хэтынухэм защIэгъэкъуэныр. Япэ егъэджэныгъэ Iуэхур щекIуэкIынур «Мэшыкъуэ» центрращ, иужькIэ Къэбэрдей-Балъкъэрым къыщызэрагъэпэщынущ.