ЩоджэнцIыкIу Алий и цIэр зезыхьэ Кэбэрдей къэрал драмэ театрым иджыблагъэ щрагъэкIуэкIащ тхакIуэ, усакIуэ, журналист Хьэх Сэфарбий къызэралъхурэ илъэс 85-рэ зэрырикъум теухуа фэеплъ зэпеуэ.
КъБР-м Егъэджэныгъэмрэ щIэныгъэмкIэ и министерствэм курыт еджапIэ щIэсхэм папщIэ къызэригъэпэща зэхьэзэхуэм щIыналъэм и къуажэхэмрэ къалэхэмрэ ящыщу школакIуэ 20-м нэблагъэ къыхыхьат.
Лъэпкъ литературэм, журналистикэм хэлъхьэныгъэ ин хуэзыщIа, илъэс 20-м щIигъу-кIэ «Шыхулъагъуэ» литературэ хасэм и унафэщIу лэжьа Хьэхыр куэдым гъуэгугъэлъагъуэ яхуэхъуащ. Ар езыр къытхэмытыжми, и IэдакъэщIэкIхэм и IуэхущIафэ дахэм къызэрыпащэм я щыхьэтщ мы пшыхьыр.
Iуэхур жэрдэм ищIу къызэзыгъэпэщар КъБР-м егъэджэныгъэмрэ щIэныгъэмкIэ и министерствэм Лъэпкъыбзэхэр егъэджынымкIэ и къудамэм и унафэщI Мыз Залинэщ. Абы зэIущIэр къыщызэIуихым жиIащ Хьэхым игъэлажьэу щыта литературэ хасэм езыри зэрыхэтар. Лъэпкъ литературэм, тхэным гу хуэзыщIа щIэблэщIэм Сэфарбий сэбэп зэрахуэхъуам теухуауэ къэпсэлъащ Мызыр.
Зэпеуэм и къэпщытакIуэ гупым хэтащ КъБР-м и радиом и лэжьакIуэ, тхакIуэ Мыз Ахьмэд, КъБР-м щIыхь зиIэ и артист Тхьэщыгъуей Жаннэ, «Илъэсым и егъэджакIуэ» урысейпсо зэпеуэм лъэпкъыбзэхэмкIэ Iыхьэм ещанэ увы-пIэр къыщызыхьа Махуэ Маринэ (Налшык къалэ дэт курыт еджапIэ №33, №1-хэм адыгэбзэмрэ литературэмкIэ щрегъаджэ), «Япэ итхэм я урысейпсо зэщIэхъееныгъэм» и щIыналъэ къудамэм и аппаратым хэт Дзэгъащтэ Азэмэт, «Адыгэ псалъэ» газетым и лэжьакIуэ, тхакIуэ Къаныкъуэ Анфисэ сымэ.
5 - 11-нэ классхэм щIэс ныбжьыщIэхэм артист Iэзагъ къагъэлъагъуэу, зи гугъу ящIыр къазэрыгурыIуэр, псэкIэ зэрызыхащIэр наIуэу, къеджащ Хьэх Сэфарбий и IэдакъэщIэкI усэхэмрэ и тхыгъэхэм къыхаха пычыгъуэхэмрэ. А цIыкIухэм уахэплъэныр гухэхъуэт. Адыгэ щIэблэм я анэдэлъхубзэр Iумпэм ящIу, абыкIэ мыпсалъэу жызыIэхэм езгъэлъэгъуарэт мыхэр. Ахэр абы ирипсалъэ къудейкъым, атIэ ирогупсысэ, ироджэгу, иропагэ. Ар иплъагъуэрт дэтхэнэми и нэгум. Лъэпкъ насыпыр къыщежьэр щIэблэм и дежмэ, адыгэр дынасыпыфIэщ. А цIыкIухэм къахэкIащ Сэфарбий усэ хузэхэзылъхьахэри и IэдакъэщIэкIхэм папщIэ псалъэ гуапэ хужызыIахэри. Псэуху щIэблэр зыунэтIу къэгъуэгурыкIуа Хьэхыр абыхэм яхэплъэну куэд нэхърэ нэхъыфIти.
- Зэпеуэм хэта ныбжьыщIэхэм япэ увыпIэр зыхуэмыфащэ яхэткъым, ахэр къыхаха пычыгъуэхэм, усэхэм гур хагъахъуэу къеджащ, - жиIащ Мыз Залинэ. Абы и псалъэхэм пищэу егъэджакIуэхэм фIыщIэ псалъэкIэ захуигъэзащ Махуэ Маринэ.
Зэпеуэм хэтахэр ныбжькIэ гуэшауэ щытати, 5 - 8-нэ классхэм щIэсхэм я деж япэ увыпIэр Пекъу Къантемыр къыщихьащ (Шэджэм ЕтIуанэ дэт курыт еджапIэ, 8-нэ класс), етIуанэ увыпIэр Бэгъуэт Мухьэмэдрэ (Шэджэм дэт курыт еджапIэ, 5-нэ класс) Багъэтыр Зурианэрэ (Къубэ-Тэбэ къуажэ дэт курыт еджапIэ №1, 6-нэ класс) зэхуагуэшащ, ещанэ увыпIэр КIущ Данитэрэ (Ар- уан къуажэм дэт курыт еджапIэ, 6-нэ класс) Сэхъурокъуэ Лянэрэ (Старэ Шэрэдж дэт курыт еджапIэ №1, 5-нэ класс) хуагъэфэщащ. Нэхъыжь классхэм щеджэхэм я зэпеуэм япэ щы хъуащ Кушмэзокъуэ Лянэ (Дыгулыбгъуей дэт курыт еджапIэ №9, 10-нэ класс), етIуанэр Нэгъуей Элинэщ (Прохладнэ къалэ дэт лицей №3, 9-нэ класс), ещанэ хъуар Хьэгъэс Данэщ (Плановскэ къуажэ дэт курыт еджапIэ №2, 10-нэ класс).
- Дэ фIыуэ тлъагъуу диIа Хьэх Сэфарбий теухуа пшыхьым ди гуапэу дыхэтащ, - жиIащ Дзэгъащтэ Азэмэт псалъэ щратым. - НэхъыжьыфIу, адэ пэлъытэу къытщхьэщытащ ар. ГушыIэр и Iэпэгъут, ауэ щыхъукIи, абы и гушыIэм щIагъыбзэ дахэ щIэлът. ТхакIуэм дежкIэ нэхъыщхьэр и IэдакъэщIэкIхэр щIэблэм къащтэнырщ. Быдэу си фIэщ мэхъу Хьэхым и тхыгъэхэм я щIэупщIэр кIуэ пэтми нэхъ ин хъуну, щIэныгъэ лэжьыгъэ куэд траухуэну. «КъатIыху си лъабжьэр сохъу нэхъ ин!» - Сэфарбий и усэм хэт а сатырым хуэдэу, и тхыгъэхэр яджыху абыхэм я куууагъыр нэхъыфIу къыдгурыIуэну къызолъытэ.
- «Шыхулъагъуэ» литературэ хасэм хэтахэм ящыщу Хьэхым гъуэгу тримыгъэуварэ ар «зыкIэщIэрымыIарэ» къытхэткъым, - жеIэ Къаныкъуэ Анфисэ. - НыбжьыщIэ цIыкIухэм мы зэIущIэр лъапэ махуэ яхуэхъуну, абы и фIыгъэкIэ лъэпкъ литературэм, усыгъэм нэхъыбэу дихьэхыну сахуохъуахъуэ. Ахэр зыгъэхьэзыра егъэджакIуэхэм я фIыщIэр дгъэкIуэдынкIэ Iэмал иIэкъым. Анэдэлъхубзэр щытIэщIэху зэманым мыпхуэдэ щIэблэ уахэплъэныр гухэхъуэщ. ФефIэкIуэну! - захуигъэзащ Анфисэ къызэхуэсахэм.
Зэпеуэм хэтахэмрэ абыхэм я егъэджакIуэхэмрэ щIыхь, фIыщIэ тхылъхэмрэ фэеплъ саугъэтхэмрэ иратащ.
«Шыхулъагъуэ» литературэ хасэм хэтхэр тыгъэ щхьэхуэкIэ яхуэупсащ я усэ къеджэкIэкIэ езыхэм ягу нэхъ ирихьа ныбжьыщIэхэм.
Сурэтхэр Къарей Элинэ трихащ.
