Жылагъуэ

Къащыгугъхэм зыщIагъакъуэ

УФ-м и Президент Путин Владимир мазаем и пэм «Хэкум и хъумакIуэхэр» фондым и лэжьыгъэр зытещIы­хьахэм зригъэубгъуащ. Иджы абы хузэфIэкIынущ езым  и ахъшэкIэ иджырей мардэхэм тету къыдагъэкI протезхэмкIэ СВО-м хэтахэр къызэригъэпэщыну. Нэхъ ипэкIэ  и къалэну щытар а Iуэхум тещIыхьауэ Урысейм и Социальнэ фондым щыхьэт зэрытехъуэ электрон тхылъыр къыщыдахынымкIэ щIэгъэгъуэн яхуэхъунырт. 

Километритху зэрагъэпэщыж

Гъуэгу хозяйствэмкIэ «Кавказ» федеральнэ IуэхущIапIэм къызэрыхилъхьауэ, 2024 гъэм къриубыдэу, Налшык къалэ Идар Темрыкъуэ и цIэр зезыхьэ и уэрамым и машинэ зэб­лэкIыпIэу 4-м щыщу Р-217 «Кавказ» федеральнэ автомобиль зекIуапIэм и 450-нэ километрым къы­щыщIэдзауэ 455-нэм нэсыр къызыхуэтышэу зэрагъэпэщыжынущ. А Iыхьэр хохьэ Налшык и кхъухьлъатэ тедзапIэм хуэзышэм. 

Гъавэм къыхэхъуэ зэпытщ

Къэбэрдей-Балъкъэрым и мэкъумэшыщIэхэм хьэцэ­пэ­цэрэ джэш хъурейуэ псори зэхэту иужьрей илъэситхум Iуа­хыжам процент 25-кIэ хэхъуащ. Нэгъабэ и закъуэ гъавэу кърахьэлIэжам хуэдиз зэи къайхъулIакъым - тонн мелуан 1,421-рэ. 2022 гъэм хьэцэпэцэу Iуахыжам нэхърэ ар процент 14-м нэблагъэкIэ нэхъыбэщ.

Егъэджэныгъэм зэрызрагъэужьыр

КъБР-м и Правительствэм щекIуэкIащ егъэджэныгъэм зегъэужьынымкIэ 2030 гъэ пщIондэ ящIапхъэхэмрэ Егъэ­джэныгъэмрэ щIэныгъэмкIэ министерствэм 2023 гъэм къри­убыдэу илэжьахэр къапщытэжынымрэ ятеухуа зэIущIэ. 

КъыщIагъэкIым щIрагъэгъу

2023 гъэм Къэбэрдей-Балъкъэрым ерыскъыхэкIыу къыщыщIагъэкIам и промышленнэ индексыр проценти 100,9-рэ, псыхэкIым - проценти 121-рэ хъуащ. Ап­хуэдэ хъыбархэр иджыблагъэ зэбгригъэхащ Кавказ Ищхъэрэм СтатистикэмкIэ и управленэм.

IэнатIэщIэ къызэрагъэпэщ

Республикэм и Наркологие, Психоневрологие диспансерхэр зэхагъэхьэжри, Психиатриемрэ наркологиемкIэ клиникэ центр къызэрагъэпэщащ. IэнатIэм зэрызрагъэужьам цIыхухэр а унэтIыныгъэхэмкIэ зыхуэныкъуэ Iуэхутхьэбзэхэр яхуэщIэнымкIэ щыIэ щытыкIэр иригъэфIэкIуащ. 

ЩIэныгъэм гъунэ иIэкъым

Бэрбэч ХьэтIутIэ и цIэр зезыхьэ Къэбэрдей-Балъкъэр къэрал университетым ЗыужьыныгъэмкIэ и утыкум («Точка кипения») Iуэхугъуэ гъэщIэгъуэн щекIуэкIащ. «Сбербанк»-м и лэжьакIуэхэм я жэрдэмкIэ къызэрагъэпэща а Iуэхур теухуат щIалэгъуалэм хьэрычэтыщIэ IэнатIэхэр къызэрызэIуахыфыну щIыкIэм, къыщегъэжьэн хуейм, зэрызаужьыну щIыкIэхэм.

Я зэфIэкIхэр утыку кърахьэ

«Урысей» дунейпсо гъэлъэгъуэныгъэ-форумым къыщызэрагъэпэща Узыншагъэм и махуэм утыку къыщрахьащ ди къэралым и хэгъэгухэм узыншагъэр хъумэн IэнатIэм щаIэ зэфIэкIхэр, IэщIагъэлIхэр я щIэныгъэкIэ, лэжьыгъэ и пIалъэкIэ щызэхъуэжащ. Зэхыхьэр къызэIуахащ Урысей Федерацэм узыншагъэр хъумэнымкIэ и министр Мурашкэ Михаил, ФедерацэмкIэ Советым и вице-спикер Святенкэ Иннэ, УФ-м Промышленностымрэ сатумкIэ и министрым и къуэдзэ Приезжевэ Екатеринэ сымэ.

Дзэлыкъуэ кIэртIофыр зыми хэбгъэгъуэщэнукъым

Дзэлыкъуэ щIыналъэм къыщагъэкI кIэртIофым сыт щыгъуи щIэупщIэ иIащ икIи ноби апхуэдэщ. Ар къэралым и щIыналъэ куэдым фIы дыдэу къыщацIыху. Совет Союзым и зэманым кIэртIоф жылапхъэщIэхэр къэзыгъэкIа щIэныгъэлIхэм я фIыгъэ куэд хэлъащ а Iуэхум. Иджыпсту абыхэм я лэжьыгъэм пищэу Дзэлыкъуэ щIыналъэм щыIэщ «Дзэлыкъуэ кIэртIоф» IуэхущIапIэр.

Абы нобэкIэ кIэртIоф лIэужьыгъуэу 12 къегъэкI. Абыхэм яхэтщ цIыхухэм фIыуэ яцIыхуа, ягу дыхьа «Самбэ», «Зумбэ», «Тангэ», «Сальсэ», «Регги» кIэртIоф «къэфакIуэ» гупыр.

Хэкум и къыщхьэщыжакIуэт

Ди къэралышхуэм и тхыдэм и напэкIуэцIхъэм мымащIэу хэтщ  абы и цIыхухэр гъэунэхуныгъэ  щытыкIэ ткIийхэм щиува  лъэхъэнэхэр. Апхуэдэхэщ, къапщтэмэ, лIэщIыгъуэ блэкIам и нэхъ къэхъукъащIэ гужьеигъуэ дыдэхэм халъыта, 194I-1945 гъэхэм екIуэкIа Хэку зауэшхуэр, ди къэрал гъунапкъэхэр яхъумэу хамэ щIыналъэхэм щрагъэкIуэкIа дзэ Iуэхугъуэхэр,  гъунэгъу щIыпIэм   мы зэманым щекIуэкIхэр, нэгъуэщIхэри. Абыхэм ящыщ дэтхэнэми къэмыланджэжу хэтащ ди щIалэхэр, лIыгъэрэ хахуагъэрэ къагъэлъагъуэу.

Страницы

Подписка на RSS - Жылагъуэ