Спорт

Мэзкуу областым хыхьэ Мытищи къалэм щекIуэкIащ УФ-м и еджакIуэхэм самбэмкIэ я 8-нэ Гъэмахуэ спартакиадэ. Абы щызэпеуащ ди къэралым и щIыналъэхэм ящыщу 51-м я спортсмен 200-м нэхърэ нэхъыбэ, я ныбжькIэ илъэс 16-м щIимыгъуауэ.
Къэбэрдей-Балъкъэрым и лIыкIуэ, Бахъсэн къалэм и спорт еджапIэм и гъэсэн Къудей Беслъэн килограмм 64-рэ зи хьэлъагъхэм я деж дыщэ медаль къыщихьащ. Ди щIалэм зэIущIитху щригъэкIуэкIат зэхьэзэхуэми, щым щытекIуащ абыхэм хухаха зэманхэр и кIэм нимыгъэсу. 
Къудей Беслъэн и тренерхэр ПшынащIэ Муратрэ Къарэмышэ СулътIанрэщ. 
 

Мэзкуу областым и Звенигород къалэм щекIуэ­кIащ спорт гимнастикэмкIэ дуней псом и чемпион Стретович Иван и саугъэтхэр къэхьыным хуэунэтIа зэхьэзэхуэ. ­КИФЩI-мрэ Къэбэрдей-Балъкъэрым­рэ я щIыхьыр яIэту зэпеуэм хэтащ Бахъ­сэн къалэм олимпиадэм хэтыфыну зы­щыгугъ сабий зэчиифIэ­хэм щадэ­лажьэ спорт еджа­пIэм и гъэсэнхэр икIи ехъулIэныгъэ хъарзынэ­хэр абы щызыIэрагъэ­хьащ.

Щхьэлыкъуэ и Кубокыр дзюдомкIэ къэхьыным хуэунэтIа щIыналъэ зэхьэзэхуэ а къуажэм щекIуэкIащ. Абы щызэпеуащ Къэбэрдей-Балъкъэрым, Адыгейм, Къэрэшей-Шэрджэсым я бэнакIуэ ныбжьыщIэхэу, 2014 - 2015 гъэхэм къалъхуа­хэр, псори зэхэту команди 9 хъууэ.
Удэзыхьэхыу икIи гъэ­щIэгъуэну екIуэкIа зэпеуэ­хэм къарикIуахэр зэхалъ­хьэжа нэужь наIуэ къызэрыхъуамкIэ, япэ увыпIэр ихьащ Щхьэлыкъуэ къуа­жэм Олимп джэгухэм я призер Тау Хьэсэнбий и цIэр зэрихьэу дэт спорт школым и командэм. 

Спорт хъыбархэр

СССР-м самбэмкIэ спортым и мастер, а  спорт лIэужьыгъуэмкIэ Тэрч районым и япэ тренеру щыта Пэнагуэ Казбек и фэеплъ ­урысейпсо зэхьэзэхуэ «Тэрч-Олимп» спорт комп­лексым щекIуэкIащ. Абы щызэпеуащ ди къэ­ралым и щIыналъэхэм ящыщу 20-м я спортсмену 120-м нэблагъэ, езыхэр гупи 8-уэ гуэшауэ. Зэхьэзэхуэм и судья нэхъыщхьэу ­щы­тащ Ярославль областым щыщ, урысейпсо категорие зиIэ судья Кербунов Александр.

Дагъыстэным и къалащхьэ Мэхъэчкъалэ и Кубокыр шабзэкIэ нэщанэ еуэнымкIэ къэ­хьы­ным хуэунэтIауэ екIуэкIа зэхьэзэхуэм Къэ­бэр­дей-Балъкъэрым и спортсменкэ Кулюшинэ Янэ япэ увыпIэр щиубыдащ. Саугъэтхэр игъэуващ а къалэм и Iэтащхьэ Салавов Жамболэт.

2026 гъэм и накъыгъэм къриубыдэу Бахъсэн къалэм и спортсменхэр зэхьэзэхуэ куэдым хэтащ икIи ехъулIэныгъэ хъарзынэхэр абыхэм щаIащ.
ЖыпIэнурамэ, Урысей Федерацэм панкратионымкIэ пашэныгъэр къыщыхьыным хуэунэтIауэ Марий-Эл республикэм и къалащхьэ Йошкар-Ола щекIуэкIа зэхьэзэхуэм Быф Жэмал и цIэр зезыхьэ спорт еджапIэм и гъэсэн Жамолов Аслъэн килограмм 54-рэ зи хьэлъагъхэм я деж япэ увыпIэр щиубыдащ. Абы и къуэш Данияр етIуанэ щыхъуащ килограмм 50 зи хьэлъагъ гупым я деж. ЩIалэхэр зыхэтар илъэс 15 - 17 зи ныбжь спортсменхэм я зэхьэзэхуэрщ, я тренерыр Щоджэн Артурщ.

Урысей Федерацэм иджырей пятиборьемкIэ пашэныгъэр къы­­щыхьыным хуэунэтIа зэхьэ­зэхуэ Киров къалэм щекIуэ-кIащ. Абы щызэпеуащ ди къэ­ралым и щIыналъэхэм ящыщу 21-м я спортсмену 300-м щIигъу.

Къэбэрдей-Балъкъэрым щы­щу зэхьэзэхуэм хэтащ Хьэкъул Тимур икIи илъэс 12 - 14 зи ныбжь спортсменхэм я деж домбеякъ медаль къыщихьащ. 
Псы есынымкIэ метри 100 зи кIыхьагъ гъуэгуанэр зэпычыным зы дакъикъэщ тригъэкIуэдар ди щIалэм. Къыщызэдэжэм зы ки­лометр зи кIыхьагъ гъуэгуанэр абы къызэринэкIащ дакъикъи 2-рэ секунд 51-м къриубыдэу.
Хьэкъул Тимур и тренерыр Зенин Игорщ.

Олимпиадэм хыхьэ тхэквондо лIэужьыгъуэмкIэ (ВТФ) дунейпсо зэхьэзэхуэ «President Cup» фIэ­щыгъэр зэрихьэу щекIуэкIащ Германием и Нюрнберг къалэм и «КИА Метрополь» спорт комп­лексым. Абы щагъэджэгуащ Олимп джэгухэм къызэрыхах ­рейтинг баллхэр.