ЗэIущIэхэр

КъБР-м и Iэтащхьэ КIуэкIуэ Казбекрэ КъБР-м узыншагъэр хъумэнымкIэ и министр Къалэбатэ Рустамрэ Правительствэм и Унэм щызэхуэзащ. Ахэр тепсэлъыхьащ узыншагъэр хъумэн IэнатIэм и зыужьыныгъэмрэ медицинэ IуэхущIапIэхэм я лэжьыгъэмрэ. 

УФ-м и Президент Путин Владимир иригъэкIуэкIа Къэ­рал советым и зэIущIэм ­КъБР-м и Iэтащхьэ КIуэкIуэ Казбек хэтащ.

КъБР-м и Iэтащхьэ КIуэкIуэ Казбек Iэ щIидзащ УФ-м и Президенту Путин Владимир Владимир и къуэр 2024 гъэм екIуэкIыну хэхыныгъэхэм зэрызыкъыщигъэлъэгъуамкIэ зэрыарэзым щыхьэт техъуэ дэфтэрым.

ЦIыхум и хуитыныгъэхэр хъумэнымкIэ КъБР-м и Уполномоченнэ советым и зэхуэсым щытепсэлъыхьащ IуэхугъуитIым: Урысей Федерацэм цIыхум и хуитыныгъэмкIэ и уполномоченнэхэм я советым «ЩIалэгъуа­лэм я хуитыныгъэхэр хъумэным теухуауэ» яIа зэIущIэм кърикIуахэм, 2023 гъэм ЦIыхум и ­хуитыныгъэхэр къызэгъэпэщынымкIэ КъБР-м и Уполномоченнэ советым илэжьахэм. 

УФ-м и Правительствэм и УнафэщI Мишустин Михаил иригъэкIуэкIащ Пра­ви­тельст­­­вэм хэтхэм я зэIущIэ. Абы къу­лыкъущIэм щыжиIащ автомобиль гъуэгухэр зыхуей хуа­гъэзэн щхьэкIэ мы илъэсым иджыри сом мелуан 570-рэ къызэры­хуаутIыпщынур. Апхуэдэ ахъ­шэ зратыну хэгъэгуи 5-м хэхуащ Къэбэрдей-Балъ­къэрри. 

КъБР-м и Парламентым и УнафэщI Егоровэ Татьянэ дыгъэгъазэм и 22-м зэ­хуищIыжащ республикэм и хабзэубзыху орган нэхъыщхьэм и бжьыхьэ лэжьэ­гъуэр. Иужьрей зэIущIэм депутатхэм етIуанэ еджэгъуэу къыщащтащ ­«КъБР-м и бюджетыр 2024 гъэм, 2025 - 2026 гъэхэм ятещIыхьауэ» КъБР-м и законым и проектыр.

Ди республикэм и Iэтащхьэ КIуэкIуэ Казбек лэжьыгъэ IуэхукIэ яхуэзащ КъБР-м егъэджэныгъэмрэ щIэныгъэмкIэ и министр Езауэ Анзоррэ КъБР-м и Iэтащхьэм и чэнджэщэгъу Миронов Николайрэ. Ахэр тепсэлъыхьащ «ЛIыхъужь­хэм я бынхэр» республикэ проектыр щIыналъэм зэ­ры­щагъэзащIэм. 

Урысей Федерацэм и Президент Путин Владимир пресс-конференц-теленэтын занщIэ жыпхъэм иту сыхьэти 4-рэ дакъикъи 4-кIэ цIыхухэм епсэлъащ. А зэманым къриубыдэу къэрал унафэщIым упщIэ 67-м жэуап яритащ.

Пресс-конфернцэр щекIуэкI пэшым, щхьэж и унэм, лэжьапIэм щIэсу УФ-м и Президент Путин Владимир упщIэ езытахэм яхэтащ фронтым щыIэхэм я видео-зыхуэгъэзэныгъэри.

Дуней псом щыщыIэ щытыкIэм, Урысей Федерацэм абы щиубыд увыпIэм, Евросоюзыр къызэрытхущытым Путин Владимир щытепсэлъыхьым къыхигъэщащ  зэхущытыкIэфIыр ди закъуэкIэ ухуа зэрымыхъунур, ар зэпызыудахэм ди къэралыр къуэгъэнапIэм къуагъэувэну иужь зэритыр.