ЦIыхубз щIалэжь

гушыIэ

Етхуанэ Iыхьэ  

7

Хабзэхъумэр махуэ къэс жыхуаIэм хуэдэу ялъагъурт егъэджакIуэхэми, псори Зубер къыщыгуфIыкIащ. Езым «фызгъэгувэнукъым» жиIэурэ утыкум ихьэри, «Iущыцэ» журналыр къызэгуихащ. Борэн Iущыцэ и цIэр зэракIэщIэтыр имылъагъу зищIри, тхыгъэм и цIэм къеджэм, ар зи IэдакъэщIэкIым щIэупщIэурэ, Зубер журналым и кIэм нэс ирикIуащ.

- «ИугъащIэ гъэмахуэм» тхыгъэр зейр хэт?

- Сэращ! - Гений и Iэр еIэт.

- «Бжыгъэхэм епха хъыбархэр»?

- Сэ! - Синэ къотэджри мэтIысыж.

Iущыцэ зыри жимыIэу щыст, Зубер зыщIэупщIэ тхыгъэхэм ядигъуаIауэ хуигъэфащэу. Зубери зыхуейр арат.

- Мы тхыгъэхэр зи Iэдакъэ къыщIэкIахэр участкэм фынекIуалIэ, зыгуэрхэм дыщIэупщIэнущи.

- Сэри сынэкIуэн хуей? - Iущыцэ гуфIэкIэ щыгъупщэжащ.

- Зи тхыгъэ итхэращ сызыхуейр. Уэ уи цIэр псори ящхьэщыпхын папщIэ зэрыкIэщIэптхар къызжаIащ. Ауэ…

- Ардыдэращ зэрыщытри! Сэ стха зыри иткъым а журналым!

ЕкIуэкIыр видеокIэ езыгъэтх Зубер абдежым и куэзыр щIэхуахэр къызыкъуех:

- ПечатымкIэ министерствэм къабыл ищIащ иджыри къэс фи ахъшэкIэ къыдэвгъэкIа «Iущыцэ» журналыр! ДяпэкIэ текIуэдэну мылъкур бюджетым къыфхухагъэкIынущ. Мы иужьрейм зи тхыгъэ къытехуахэм ахъшэ къратыжынущи, зытхар зэхэзгъэкIыну унафэ къысхуащIауэ арат.

 Псори щым хъуащ. Мы щытыкIэм къызэрелын Iэмалу егъэджакIуэхэм къахуэнэр тIу къудейт. Е зыгуэр къэтэджу, «дыгушыIащ, псори зытхар Iущыцэщ» жиIэн. Е ахъшэр къыIахыу, иужькIэ Iущыцэ иратыжын. Ар фIыуэ къызыгурыIуэ Зубер щIалэ губзыгъэти, напэмрэ ахъшэмрэ я зэхуакум диубыдауэ арат егъэджакIуэ гупыр. Журналым бгъэдыхьэпIэ къызэрыхуамыгъэнэжынур къызыгурыIуа Iущыцэ ищIэнури жиIэнури ищIэртэкъым. Ягъэкъуаншэу хабзэм ирашэлIамэ, пцIы гуэрхэр иупсынкIи хъунт. Ауэ Зубер напэтехыр щытхъум кIуэцIишыхьри, пэжым и архъуанэм ириубыдат зэрыколлективу. ИтIани, дакъикъипщI ипэкIэ зэгъусэу дыхьэшха егъэджакIуэхэр апхуэдэ дыдэу гущIэгъуншэтэкъым, я директорым и напэ текIмэ, езыхэр ехъулIауэ къафIэщIын хуэдэу. Арати, коллективым нэхъыжь дыдэу яхэт Хьэрф и Iэр къиIэтащ:

- Сэ псалъитI жысIэнщ, хъунумэ? Журналыр дэ гупым тфIэфIу къыдэдгъэкIыу аращ. Ар печатымкIэ министерствэм дяпэкIэ къыдигъэкIынумэ, дыхамыгъэIэбэжыххэнри хэлъщ. Ауэ зигу къэкIари, къызыфIэIуэхуари, пхызыгъэкIари Iущыцэщи, ар журналым и редактору къэвгъанэмэ, ди гуапэ хъунут. Ар уи унафэщIхэм тхулъэгъэIэсыж.

Iущыцэ и нэпсхэм къызэпижыхьакъым. ИкIи къэгубжьакъым. КоллективыфI игъэсэфат. Борш гъэвэнкIи къытекIуэн щыIэтэкъым.

Iуэху зэхэзэрыхьар Iэуэлъауэншэу зэхахыжащ, егъэджакIуэхэм я пщIи я улахуи кIэрымыхуу. Iущыцэ мазитI-щыкIэ ягъэлажьэри… ПечатымкIэ министерствэм драшеящ, сабийхэм папщIэ къыдагъэкI газетхэмрэ журналхэмрэ я унафэр IэщIэлъу.