ЗэхъуэкIыныгъэфIхэм щыгугъыу

Налшык къалэм и хэхыпIэхэм щыпащэ УФ-м и Президентым и хэхыныгъэхэм. Курыт еджапIэ №28-м къыщызэрагъэпэща хэхыпIэ №180-м и кIэлъыплъакIуэ гупым и унафэщI Iэщын Светланэ къызэрыджиIамкIэ, дунейр зэрымыуэфIми емылъытауэ, Iуэхум цIыхухэр жыджэру хэтщ. Мы хэхыпIэм цIыху мини 2-м щIигъу къызэщIеубыдэ. Къэбгъэлъагъуэмэ, япэ махуэм абы и процент 50-м щIигъу IэIэтым хэтащ.

Дзэ Iуэху хэхам къулыкъу щызыщIахэри IэIэтым жыджэру хэтащ. Къыхэгъэщыпхъэщ, мы курыт еджапIэм и еджакIуэхэмрэ абыхэм я адэ-анэхэмрэ дзэ Iуэху хэхам къулыкъу щызыщIэхэр зыхуеину хьэпшыпхэр ягъэхьэзырурэ зэрырагъашэр. ХэхыпIэм ныбжьыщIэхэм концертхэмрэ мастер-классхэмрэ щатащ, дзэ Iуэху хэхам къулыкъу щызыщIэхэм, хэхакIуэхэм папщIэ.

КъБР-м и Жылагъуэ палатэм къыбгъэдэкI кIэлъыплъакIуэ Баевэ Наталье къызэрыджиIамкIэ, хэхыпIэр къызыхуэтыншэу къызэрагъэпэщащ, пщэдджыжьым щыщIэдзауэ абы цIыхушхуэ къокIуалIэр. НэхъыжьыIуэхэри IэIэтым куэду хэтщ, къэралым зэхъуэкIыныгъэфIхэр къыщыхъуным, мамырыгъэм, ефlэкlуэныгъэм, зыужьыныгъэм щыгугъыу. Хабзэншагъэ къэмыхъуу, наIуэу Iуэхур йокIуэкI. Псом хуэмыдэу хэхакIуэхэм ягу ирихьащ хэхыпIэм концерт гукъинэж зэрыщрагъэкIуэкIыр.