Урысей Федерацэм щIэуэ къыхагъэхьэжа щIыналъэхэми зыхуей хуэзэу щокIуэкI президент хэхыныгъэхэр. Къэбэрдей-Балъкъэр Республикэм и нэIэ щIэту зэрагъэпэщыж Херсон областым щыIащ ди лIыкIуэхэр. КъБР-м и Iэтащхьэ КIуэкIуэ Казбек и унафэкIэ, Херсон хэгъэгум и Скадовскэ районым кIуа гупым я пашэ, КъБР-м и Правительствэм и УнафэщIым и къуэдзэ – КъБР-м и министр Къуэшрокъуэ Залым жиIащ: «Тхыдэ и лъэныкъуэкIэ уриплъэжмэ, япэм щыIа щытыкIэр зэфIэувэжу аращ. Дэ зэкъуэш лъэпкъхэм ижь-ижьыж лъандэрэ тхыдэ гъуэгуанэ къызэдэткIуащ. Иджыри мыр дищIщ, иджыри зыр зым дыдэIэпыкъужу дызэдэпсэун хуейщ. Нобэ екIуэкI хэхыныгъэхэм жыджэру дыщIыхэтыр щытыкIэ гугъу ихуа, зэман гугъу хэхуа ди къэралыр лъэ быдэкIэ щызыгъэтын пашэфI дыхуейщи аращ. Дэ нобэ Херсон щIыналъэм щыпсэухэм дабгъурыту Iэ доIэт ди Хэкум и къэкIуэнур фIы хъун щхьэкIэ».
Апхуэдэу къуэш хэгъэгум Iэ щиIэтащ «РИА КъБР» хъыбарегъащIэ агентствэм и унафэщI Аттаев Анзор.
Хэхыныгъэ махуэхэр херсондэсхэм дагъэлъапIэну абы еблэгъащ щэнхабзэм и лэжьакIуэхэр, КъБР-м щэнхабзэмкIэ и министр Къумахуэ Мухьэдин я пашэу. ИкIи «Кабардинка», «Балкария», «Терские казаки» къэфакIуэ ансамблхэм, Къэбэрдей-Балъкъэр Республикэм щIыхь зиIэ и артистхэу Гуазэ Тимур, Теппев Алим, Къэрал музыкэ театрым и солист Макаев Астемыр сымэ Скадовск къыщызэIуаха хэхыпIэхэр ягъэдэхащ, Iэ зыIэтхэм я гукъыдэжыр къыхуаIэтащ. Херсон щIыналъэм щыпсэухэм а махуэхэм УФ-м и Президентыр къызэрыхахам, ди уэрэджыIакIуэхэмрэ къэфакIуэхэмрэ я нэгу зэрызрагъэужьам къыдэкIуэу, ди щэнхабзэр зэрагъэцIыхуащ, лъэпкъ хъугъуэфIыгъуэхэм зыщагъэгъуэзащ. Абы куэдкIэ нэхъ зэгъунэгъу дищIащ, шэч хэмылъу.
КъБР-м и Iэтащхьэм, Парламентым, Правительствэм къабгъэдэкIыу скадовскдэсхэм ехъуэхъуащ Къумахуэ Мухьэдин. «Хэхыныгъэхэм епха махуэшхуэхэм щхьэкIэ сынывохъуэхъу, зэIузэпэщыныгъэрэ мамырыгъэрэ фиIэну. Фэ иджы япэу фIэту аращ ди къэралым и Президентыр къыхэхыным теухуауэ. Быдэу си фIэщ мэхъу нобэ тчы лъэбакъуэм куэдкIэ дызэрыщыгуфIыкIыжынур, мыгувэу ди артистхэр зыхэт зы концертышхухэм иджыри дызэрыщызэхуэзэнур», - жиIащ Къумахуэм.
ХэгъэгущIэм исхэр хуабжьу щыгуфIыкIащ ди артистхэм ята концертым икIи Скадовск щIыпIэм и Iэтащхьэ Дудкэ Александр фIыщIэ къахуищIащ, я гуфIэгъуэр зэрыдаIэтам папщIэ.
КъБР-м щэнхабзэмкIэ и министр Къумахуэ Мухьэдини Iэ щиIэтар хэхыныгъэхэм ирихьэлIэу здэщыIа щIыпIэрщ.
- Сэ Урысей Федерацэм и къалэ куэдым Iэ щысIэтыну къысхуихуащ, Москва, Санкт-Петербург, сыкъыщалъхуа Налшык, ауэ Херсон хэгъэгум иджы япэу сыщрихьэлIауэ аращ мы Iуэхуми, си гуапэу си къуэшхэмрэ си шыпхъухэмрэ я гъусэу хэхыныгъэхэм сыхэтщ.
Иджы етIуанэу сыкъокIуэ Скадовск къалэми, фIы и лъэныкъуэкIэ зэрызихъуэжар нэрылъагъущ. Нобэ лIыщхьэ щыпкъэ къыхэтхыфмэ, дяпэкIэ нэхъыфIыжу Херсон щIыналъэми, къэрал псоми зэрызиужьынум шэч хэлъкъым, - жиIащ щэнхабзэмкIэ министрым.
Хэгъэгум Iэ щаIэтащ Скадовскэ, Голопристанскэ округхэм щылажьэ, КъБР-м икIа аварийнэ бригадэм хэтхэм, ухуакIуэхэм. «Аварийнэ бригадэм хэтхэм щIыналъитIым псэупIэ-коммунальнэ IэнатIэм епха ныкъусаныгъэхэр щызэрагъэпэщыж. Дэ мыбы дыщыIэнущ гъэплъыгъуэ пIалъэр иухыху, икIи отопленэмрэ котельнэхэмрэ зэи зэрызэпыдмыгъэуным, тэмэму лажьэу зэтеублэжыным иужь дитынущ», - жиIащ Кадыров Альберт.
Фигу къэдгъэкIыжынщи, 2022 гъэм и бадзэуэгъуэм КъБР-м и Iэтащхьэ КIуэкIуэ Казбек Херсон областым щыIащ икIи абы щыгъуэм зэращIылIа зэгурыIуэныгъэм ипкъ иткIэ, гуманитар дэIэпыкъуныгъэкIэ, социальнэ IуэхущIапIэхэр зэфIэгъэувэжынымкIэ ди республикэр сэбэп хъунущ. КъищынэмыщIауэ, ныбжьыщIэхэр илъэс къэс Налшык и зыгъэпсэхупIэхэм кърагъэблэгъэнущ.
