Къэралым и къэкIуэнур зэлъыта

Нартан къуажэм щыпсэухэри УФ-м и Президентым и хэхыныгъэхэм жыджэру хэтащ. Курыт еджапIэ №1-м къыщызэIуаха хэхыпIэ №315-м (цIыху мини 3-м нэблагъэ къызэщIэзыубыдэм) цIыхухэм жыджэру Iэ щаIэтащ.

ХэхыпIэм и къэпщытакIуэ гупым хэтащ абы и унафэщI Ехъутэныдж Мадинэ, и къуэдзэ Дол Аслъэн, Сэкрэк Мадинэ, Бжэмбей Альбинэ, Ало Аслъэн, Думэныщ Марьянэ, ПащIэ ФатIимэт сымэ. Полицэм и лейтенант нэхъыжь Сындыку Наурбэчи хэхыпIэм щылэжьащ. Абыхэм я нэIэ тетащ хэхыныгъэм и хабзэм теухуа хъыбарегъащIэ стендхэр гъэхьэзырыным, IэIэтыр хабзэм тету къызэгъэпэщыным, абы Iуэху зэIумыбз къыщымыгъэхъуным, хэхакIуэхэм я упщIэхэм жэуап етыным. КъыжыIапхъэщ, хэхыпIэм емыкIуэлIэфа, зи еплъыкIэ къэзыгъэлъэгъуэну щIэхъуэпс, ауэ зи узыншагъэм къимыхьхэм, ныкъуэдыкъуэхэм, нэхъыжьыфIхэм я деж кIуэурэ Iэ зэрырагъэIэтар.

IэIэтым и щхьэгъусэм щIыгъуу екIуэлIа нартандэс Ныр Саидэ жиIащ дапщэщи хуэдэу, УФ-м и Президентым и хэхыныгъэхэм мыхьэнэшхуэ зэраIэр, абы хэтыныр псоми зэракъалэныр, дызыхуэкIуэ илъэсихым къэралым и псэукIэнур, цIыхубэм я пщэдейр, щIыналъэм и зэIузэпэщыныгъэр, унэтIыныгъэ куэдым я зыужьыныгъэр абы зэрелъытар. КъищынэмыщIауэ, гъатхэпэм и 15 - 17-хэм Нартан къуажэм ЩэнхабзэмкIэ и унэмрэ къуажэм и курыт еджапIэ №2-мрэ къыщызэрагъэпэща хэхыпIэхэр хабзэм тету, Iуэхур ныкъусаныгъэншэу щылэжьащ.