КъБР-м и Правительствэм и УнафэщI Мусуков Алий иригъэкIуэкIащ республикэм и районхэм я Iэтащхьэхэр тхьэмахуэм зэ къыздрагъэблагъэ зэIущIэр.
Абы къыщащтащ КъБР-м и Правительствэмрэ «Роскадастр» федеральнэ IэнатIэмрэ зэрызэдэлэжьэнум теухуа унафэр. КъБР-м ЗыгъэпсэхупIэхэмрэ туризмэмкIэ и министр ЩоджэнцIыкIу Мурат къыщыпсалъэм къыхигъэщащ Къэбэрдей-Балъкъэрыр «Земля для туризма» Iуэхум хэтын папщIэ дэфтэрыр зэрагъэхьэзырар.
ЗэхъуэкIыныгъэхэр халъхьащ «Экономикэ зыужьыныгъэрэ щIэныгъэ экономикэрэ», «Къэбэрдей-Балъкъэр Республикэм жылагъуэ проектхэмрэ къэрал цIыхубэ политикэмрэ зэрыщагъэзащIэр», «Къэралым и Iуэху бгъэдыхьэкIэхэм зегъэужьыным теухуауэ», «Къэбэрдей-Балъкъэр Республикэм и щэнхабзэ» къэрал программэхэм я паспортхэм.
ЗэIущIэм къыщащтащ «КъБР-м ФинансхэмкIэ и министерствэм и Положенэм зэхъуэкIыныгъэхэр хэлъхьэным и IуэхукIэ» КъБР-м и Правительствэм и унафэм и проектыр. Апхуэдэуи КъБР-м Мэкъумэш IэнатIэмкIэ и министерствэмрэ республикэм ветеринариемкIэ и IэнатIэмрэ я коллегиехэм хэтхэм зэхъуэкIыныгъэхэр халъхьащ.
Республикэ унафэщIхэр арэзы техъуащ КъБР-м и Правительствэм и гъэтIылъыгъэ фондым щыщкIэ Лэскэн ЕтIуанэ къуажэм 2024 гъэм зэрызыщIагъэкъуэнур КъБР-м Ухуэныгъэмрэ псэупIэ-коммунальнэ IэнатIэмкIэ и министерствэм етыным теухуа унафэм и проектым. КъБР-м ухуэныгъэмрэ псэупIэ-коммунальнэ IэнатIэмкIэ и министр Бэрбэч Алим зэрыжиIамкIэ, зи гугъу ящI дэIэпыкъуныгъэр сом мин 948-рэ мэхъу, ар трагъэкIуэдэнущ къуажэм псыр къыщыщIаш щIыпIэр щыухуэным. Министрым жиIащ къуажэдэсхэм псым теухуауэ я Iуэхур абы нэхъ тынш зэращищIынур.
