ХьэрычэтыщIэхэм зыщIагъакъуэ

Къэбэрдей-Балъкъэрым хьэрычэт мыинымрэ курытымрэ я IэнатIэхэм (МСП) щыпэрытхэм зэрыхудачых кредит ахъшэхэр етынымкIэ республикэм щыIэ банкхэм лэжьыгъэ пыухыкIа ирагъэкIуэкI. Урысейм и Лъэпкъ банкым и къудамэу КъБР-м щыIэм иджыблагъэ къызэритамкIэ, 2023 гъэм хьэрычэт IэнатIэ мыинымрэ курытымрэ сом мелард 16,0 банкхэм иратащ, абы щыщу сом меларди 4,9-р уней IуэхущIапIэхэм.

2024 гъэм щIышылэм и 1-м ирихьэлIэу республикэм и МСП-м и кредит портфелыр сом мелард 21,3-рэ хъуащ, абы щыщу уней IуэхущIапIэхэм яйр – сом меларди 5. Абы къыдэкIуэу, хьэрычэт IэнатIэ мыинымрэ курытымрэ, щыIэ хабзэм тету, «кредит каникул» жыхуаIэхэм хуэдэхэри хуагъэув. Абы и фIыгъэкIэ, мазэ къэс ахъшэр щыхалъхьэжын хуей пIалъэр мазих хуэдизкIэ хуагъэIэпхъуэ, я лэжьыгъэм зыпэмыплъа Iуэхугъуэ мыщхьэпэ къыхэкIамэ, ар ягъэзэкIуэжыфын хуэдэу. 
Хьэрычэт IэнатIэ мыинымрэ курытымрэ зэрыхудачых кредит ахъшэхэр етынымкIэ нэхъ жыджэру Iуэхум хэтщ Сбербанкыр, ВТБ-р, «ФК Открытие» банкыр, Промсвязьбанкыр, Совкомбанкыр. 
Урысей Федерацэм Экономикэ зыужьыныгъэмкIэ и министерствэм зэхигъэува, апхуэдэ щIыхуэ лIэужьыгъуэ МСП-м етыным хуэунэтIа «1764» программэм ипкъ иткIэ 2023 гъэм республикэм хьэрычэт IэнатIэ мыинымрэ курытымрэ щылажьэхэм кредит зэгурыIуэныгъэу 55-рэ иращIылIащ, псори зэхэту сом мелуан 750,7-рэ я уасэу.