АдыгэбзэкIэ ятхам адыгэбзэкIэ тепсэлъыхьу

Ди щIыналъэм цIыху куэд ис къыщIэкIынкъым «Таурыхъищэ» тхылъым щIамыпIыкIауэ. Нэхъыжьымрэ нэхъыщIэмрэ кIапсэ быдэкIэ зэзыпх таурыхъхэмкIэ къыщIидзащ адыгэ филологиемкIэ магистр, тхыдэдж, жылагъуэ лэжьакIуэ ПщыхуэфI Равидэ а цIэ дыдэр зыфIища тхылъеджэ клубым и япэ зэIущIэр. 

Налшык тхылъ еджэнкIэ жыджэру цIыху нэхъыбэ зыдэс къалэ зэрыхъуам иужьрей зэманым куэдым гу лъатэ. Интернетым щIэныгъэншэ уещI, тхылъращ укъэзымыгъэпцIэжынур жызыIэхэм я псалъэхэр я тхьэкIумэм ихьэри, щIалэгъуалэр тхылъ тыкуэнхэм кIуэрей, зэджам щытепсэлъыхь зэIущIэхэр ирагъэкIуэкIрей хъуащи, абы ущымыгуфIыкIыпIэ иIэкъым. 

А гуфIэгъуэр тIуащIэ мэхъу, щытыкIэ мытыншым ит адыгэбзэр и Iэмэпсымэу Iуэху дахэр езышэжьам и хъыбар щызэхэпхкIэ. «Ди бзэр дджыну ди къалэнщ», - щыжаIэм деж си жагъуэ мэхъу, - жеIэ «Таурыхъищэ» клубым и къызэгъэпэщакIуэ Равидэ. – Ар зэбгъэщIэну уи къалэну аракъым, ди анэдэлъхубзэр фIыуэ щIэплъагъун щытыкIэми итщ, апхуэдиз фIагъи бгъэдэлъщ». 

Гъатхэпэм и 30-м клубым и япэ зэIущIэр щекIуэкIащ адыгэбзэ щызрагъащIэ «Зерат» еджапIэм иIыгъ унэм. Мы IуэхущIапIэми дыщытепсэлъыхьын гъуэтыгъуэ дихуэну дыщогугъ, сыту жыпIэмэ, иджыри къэс адыгэбзэр мыадыгэхэм щрагъэдж еджапIэ хэха диIакъым, «Зерат»-м а лъэбакъуэ гугъур ичащ. Абы и мурадхэри къызэдащтауэ, тхылъеджэ клубым йокIуалIэ адыгэбзэм иджыри хуэмышэрыуэхэри икIи таурыхъым и мыхьэнэм, абы узыхуиущийм теухуауэ я еплъыкIэмкIэ адрейхэм ядогуашэ. 

«Сыт таурыхъхэр нэхъ къыщIыхэсхар? Сыт мы таурыхъхэр ди быным, цIыхухэм яIурылъыпхъэ гуэру къыщIэслъытэр, сыт и мыхьэнэр?» - жысIэу, сызэупщIыжмэ, жэуапитI схуэтынущ. Япэрауэ, таурыхъым уи бзэр егъэлеяуэ къулей ещI, зы Iуэхум лъэныкъуэ зыбжанэкIэ уеплъыфу урегъасэ. Сэ сыкъэзыцIыхухэм къызжаIэ зэпытщ си адыгэбзэр шэрыуэу къазэрыщыхъур. Ар, япэрауэ, си анэшхуэм и фIыщIэщ. Бзэ дахэкIэ псалъэ къудей мыхъуу, ар щIагъыбзэми хуэIэзэт, псалъэжьхэр къыжьэдэщэщу. ЕтIуанэрауэ, си бзэм и къулеягъыр нэхъыбэу къызыхэкIар мис мы таурыхъхэрщ. Абыхэм еджэм адыгэм ди хьэлри ди гупсысэкIэри нэхъ нэгъэсауэ къагурыIуэнущ». 

ЗэрымыщIэкIэ хъуами, ящIэу трагъэхуами, «Таурыхъищэм» я къызэIухыгъуэр мэлыжьыхьым и 2-м ягъэлъапIэ «Сабий тхылъхэм я дунейпсо махуэм» ирихьэлIауэ къыщIэкIащ. Андерсен Ганс и цIэр зезыхьэ тыгъэр сабийхэм папщIэ тхылъ нэхъыфI дыдэ зытхам щрат пIалъэщ 1967 гъэм къаIэта а махуэшхуэр. «Таурыхъищэм» хуэфэщэн пщIэ хуэпщIыфынумэ, ар зыгъэхьэзырауэ щыта Нало Зауррэ абы и нэIэ щIэта IуэрыIуатэджхэмрэ саугъэтым я нэхъ иныр яхуэфащэт. ЖытIэм и щыхьэтщ Равидэ иригъэкIуэкIа клубым и зэIущIэм щытепсэлъыхьыж напэкIуэцIым къыкIэщIэтхыхьахэм я сабиигъуэ гукъэкIыжхэр. «Дэнэ а тхылъыр къыздисхынур? Сыт хуэдэ уасэ жыфIэми, фэстынущ», - жызыIэм ирата жэуапыр щIэттхыр тхылъ къыдэзыгъэкIхэм папщIэщ: «Ди жагъуэ зэрыхъущи, мы тхылъыр афIэкIа къыдагъэкIыжыркъым». Сыт ягъэ кIын, къыдагъэкIыжмэ?!