CурэтыщI ныбжьыщIэхэр утыку къохьэ

1 мая, 2024 - 08:18

Ткаченкэ Андрей и цIэр зе­зыхьэ СурэтыщI гъуазджэ­хэмкIэ музейм щагъэлъагъуэ ­Минводы къалэм и «Бетельгейзе» дзэ-хэкупсэ сабий художес­твеннэ арт-студием и гъэсэнхэм я лэжьыгъэхэр. Выставкэмрэ концертымрэ къы­зэрагъэпэщащ дзэ Iуэху хэхам щыIэ зауэлIхэм я щIыхькIэ.

IуэхущIапIэм и унафэщI, художник, егъэджакIуэ, тхы­дэдж Павловэ Светланэ и псалъэм къы­хи­гъэщащ Налшык къызэ­рырагъэблэгъамрэ я ­гъэ­сэнхэм я IэдакъэщIэкIхэр ягу зэрыды­хьам­рэ гуапэ зэращыхъуар.
Студием и гъэсэнхэм я лэ­жьыгъи 100-м нэблагъэ гъэлъэгъуэныгъэм къашащ. Абыхэм щы­болъагъу кхъухьлъатэхэр, танкхэр, нэгъуэщI дзэ Iэмэпсы­мэхэмрэ Iэщэхэмрэ. Сурэтхэм ящыщхэр траухуащ дзэ Iуэху ­хэхам щыIэ зауэлIхэм. СурэтыщI ныбжьыщIэхэм я лэжьыгъэхэм  мамырыгъэм, зэ­ныбжьэгъугъэм, зэкъуэтыныгъэм,  хэку лъагъуныгъэм  укъы­хураджэ. КъыжыIапхъэщ, студием екIуалIэхэм дзэ Iуэху хэхам щыIэ ­зауэлIхэр зыхуеину хьэп­шыпхэр ягъэхьэзырурэ зэ­рыхуагъашэр.
«Бетельгейзе» студием екIуа­лIэхэм зауэм, хэкум теухуа уэ­рэдхэр жаIащ. Абы ирагъэблэгъащ Налшык балигъыпIэ имыувахэм я узыншагъэр щрагъэфIакIуэ «Нэмыс»  центрым щыIэ ныбжьы­щIэ­хэр. Студием и гъэсэн,  илъэсибгъу хъу  хъы­джэбз цIыкIум и   Iэдакъэ къы­щIэкIа лэжьыгъэ центрым тыгъэ хуищIащ. ­Хабзэ хъуауэ,  я IэдакъэщIэкIхэмкIэ ­сабий  унэ­­хэм, ­сыма­джэщхэм, дзэ частхэм зэ­рыхуэупсэри къы­хэ­гъэ­щыпхъэу къыдолъы­тэ.
- Сабийхэр соущий дэнэ щIы-пIэ дыкIуэми, я сурэтхэр бы­сымхэм, хьэщIэхэм тыгъэ хуа­щIыну, псапэ зыпылъ Iуэхухэм хэтыну. Абы утетмэ, гуапагъэм  къегъэзэж!  -  жеIэ Павловэ Светланэ. - ТекIуэныгъэ Иным и махуэшхуэ къэб­лагъэмкIэ сы­нывохъуэхъу! Мамырыгъэрэ гуа­пагъэрэ фы-­щы­мыщIэну!
КъыжыIапхъэщ, Урысейм и ­ЛIыхъужь, генерал-майор ­Шай­муратов М. М. и цIэр зе­зыхьэ ­«Бетельгейзе» студиер илъэс пщы­кIутху и пэкIэ Минводы къалэм къызэрыщызэ­Iуахар. А зэманым къриубыдэу Iуэ­хущIапIэм сурэт щIыным  зи ныбжьыр илъэситхум щыщIэ­дзауэ илъэс пщыкIух хъу са-      бий мини 2-м щIигъу щы­хуагъэсащ. Хабзэ хъуауэ, абы екIуалIэхэм Кавказ Ищхъэрэм хыхьэ къалэхэм я лэжьыгъэхэр щагъэлъагъуэ, концертхэр щат.
ТЕКIУЖЬ Заретэ.
Сурэтхэр 
КЪАРЕЙ  ЭЛИНЭ трихащ.

  • 186 просмотров
Поделиться: