Дунейм щыхъыбархэр

Кърымыр зыIэрыгъэхьэжыныр
Украинэм и лъэпкъ гупсысэу къонэж

Age of Crimea дунейпсо зэхуэсым вэсэмахуэ къыщыпсалъэу къэралым и президент Зеленский Владимир жиIащ Кърымыр зыIэрыгъэхьэжыныр Украинэм и лъэпкъ гупсысэу къызэрынэжыр.

«Иджыпсту Украинэр ерыщу хущIокъу Донбассым зауэр щыгъэувыIэным, ауэ абы къикIыркъым Кърымым ехьэлIа Iуэхухэр IэщIыб тщIауэ, - къыхигъэщащ Зеленскэм. – ХытIыкъу ныкъуэр хъуфынукъым мамырыгъэм щIэттыну уасэ лъапIэ».
Абы ипэ махуэм, мазаем и 25-м, Украинэм Лъэпкъ шынагъуэншагъэмрэ зыхъумэжыныгъэмкIэ и советым и секретарь Данилов Алексей жиIащ Кърымыр зыIэрыгъэхьэжынымкIэ Iуэхугъуэ пыухыкIахэр зэрызэхалъхьар икIи мыгувэу ахэр зэрагъэзэщIэнур.

Эрдоган Идлиб хуодалъэ

Тыркум и президент Эрдоган Реджеп жиIащ и дзэхэр Сирием и Идлиб щIыпIэм къызэрыримышыжынур, атIэ ебгъэрыкIуэныгъэхэм зэрыпищэнур.

Абы ягу къигъэкIыжащ курдхэм я хэщIапIэ нэхъыщхьэ Идлиб Сирием и дзэхэм щабгынэн хуейуэ хуагъэува пIалъэр зэрикIыр икIи тырку армэм ар къанэ щымыIэу зэIэригъэхьэну зэримурадыр.
REGNUM хъыбарегъащIэ агентствэм къызэритамкIэ, нэхъ пасэIуэу Эрдоган жиIащ Сирием и президент Асад Башар зэремыпсэлъэнур. Апхуэдэ жэрдэм къыхилъхьат тырку оппозицэм и пашэ Къылычдароглу Кемаль. Абы къыхигъэщащ нэхъапэм Асад гурыIуэну зэрыхэтар, ауэ «ар напэншэу къыщIэкIащ».

Кхъухьлъатэхэр къраудыхыну хуит ящI

Урысей Федерацэм и Правительствэм и УнафэщI Мишустиным Iэ щIидзащ граждан кхъухьлъатэхэм ди къэралым и гъунапкъэхэр хабзэм къемызэгъыу къызэпаупщIмэ, къраудыхыну хуит зыщI унафэм.

КъызэрагъэлъэгъуамкIэ, граждан е IэщэкIэ зэщIэузэда кхъухьэлъатэхэм Урысейм и къэрал гъунапкъэхэр къызэпаупщIауэ, ягъэзэжыну зэрыхуагъэувар уэим ящIурэ адэкIэ кIуэцIрыкIмэ, залымыгъэкIэ ягъэтIысынущ. Ар къаймыхъулIэмэ, къраудыхыну хуитыныгъэ дяпэкIэ яIэщ.
 
Мазаем и 28, мэрем

♦1555 гъэм Нострадамус и тхылъ цIэрыIуэр къыдэкIащ. Абы дунейм къыщыхъунухэр къыщигъэлъэгъуауэ къалъытэ.
♦1990 гъэм Урысей Федерацэм и Кинематографистхэм я зэгухьэныгъэр къызэрагъэпэщащ.
♦1996 гъэм Урысейр Европэм и Советым хыхьащ, цIыхум и судыр укIкIэ мыщIэным арэзы техъуэри.
♦Къызэралъхурэ илъэс 83-рэ ирокъу усакIуэ-уэрэдус цIэрыIуэ Къанкъул ФIыцIэ.
♦УсакIуэ, КъБР-м щэнхабзэмкIэ щIыхь зиIэ и лэжьакIуэ Сонэ Абдулчэрим къызэралъхурэ илъэс 78-рэ ирокъу.
♦И ныбжьыр илъэс 65-рэ ирокъу КъБР-м щIыхь зиIэ и дохутыр, медицинэ щIэныгъэхэм я кандидат, гу узыфэхэм щеIэзэ республикэ центрым и дохутыр нэхъыщхьэ, Къэбэрдей-Балъкъэрым и Жылагъуэ палатэм хэт Щэрдан Нодар.
♦УэрджыIакIуэ, КъБР-м щIыхь зиIэ и артист Уэтэр МуIэед и ныбжьыр илъэс 63-рэ ирокъу.
♦Къызэралъхурэ илъэс 62-рэ ирокъу Мэкъумэш щIэныгъэхэм я доктор, профессор, КъБКъМУ-м и ректору щыта, КъБР-м щIэныгъэхэмкIэ щIыхь зиIэ и лэжьакIуэ Жэрыкъуэ Борис.
Дунейм и щытыкIэнур
«pogoda.yandex.ru» сайтым зэритымкIэ, Налшык пшэр техьэ-текIыу щыщытынущ. Махуэм хуабэр градус 16 - 18, жэщым 5 - 7 щыхъунущ.

Лъэпкъ Iущыгъэ:

Псэм фIэIэфIыр, нэм фIэдахэщ.