Гъатхэпэм и 5, махуэку
•1711 гъэм Урысейм и пащтыхь Пётр Езанэм и унафэкIэ Сенатыр - хабзэубзыху, къэрал Iуэхухэр зэкIэлъызыгъакIуэ IэнатIэ нэхъыщхьэр - къызэрагъэпэщащ.
•1953 гъэм дунейм ехыжащ Сталин (Джугашвили) Иосиф. Абы и унафэм щIэту Совет Союзыр Хэку зауэшхуэм щытекIуащ икIи фашистхэм леишхуэ щызэрахьа ди къэралыр зэман кIэщIым зэфIагъэувэжащ.
•1970 гъэм Ядернэ Iэщэм земыгъэубгъуным теухуа зэгурыIуэныгъэм къару игъуэтащ. Абы Iэ щIадзащ дунейм и къэрал щхьэхуит псоми, Израилым, Индием, Пакистаным, Корее Ищхъэрэм къищынэмыщIа.
•1848 гъэм къалъхуащ адыгэхэм я псэукIэмрэ зэхэтыкIэмрэ куэдрэ тетхыхьа тхыдэдж, жылагъуэ лэжьакIуэ Фелицын Евгений.
•1911 гъэм къалъхуащ КъШР-м и къэрал лэжьакIуэ, СССР-м и Совет Нэхъыщхьэм и депутату щыта, Къэрэшей-Шэрджэс автоном округым и Адыгэ -Хьэблэ щIыналъэм и унафэщIу лэжьа Къардэн Iэдэм.
• Полковник, жылагъуэ лэжьакIуэ, Израилым щыIэ Рихьэние къуажэм и Адыгэ хасэм и тхьэмадэу щыта Гъыш Самир и ныбжьыр илъэс 70 ирокъу.
•1953 гъэм къалъхуащ физико-математикэ щIэныгъэхэм я доктор, УФ-м и Къэрал саугъэтыр зрата, ЩIДАА-м и академик Бэвыжь Мухьэмэд.
Дунейм и щытыкIэнур
«pogoda.yandex.ru» сайтым зэритымкIэ, ди республикэм пшэр техьэ-текIыу щыщытынущ. Махуэм хуабэр градус 16-18, жэщым градуси 3-4 щыхъунущ.
Гъатхэпэм и 6, мэрем
• Дзэ дохутырым и дунейпсо махуэщ
• Глаукомэ нэ узыфэм ебэныным и дунейпсо махуэщ
•1899 гъэм Германием щыщ химик Хоффман Феликс аспирин хущхъуэр зэрызэхилъхьам щыхьэт техъуэ патент къратащ. Нобэми цIыхухэм нэхъыбэ дыдэрэ къагъэсэбэпхэм ящыщщ ар.
•Абхъаз тхакIуэ, СССР-м и Къэрал саугъэтыр зрата Искандер Фазиль къызэралъхурэ илъэс 90 ирокъу.
•КъШР-м щIыхь зиIэ и журналист, Къэрэшей-Шэрджэсым къыщыдэкI «Черкес хэку» газетым и редактор нэхъыщхьэм и къуэдзэ Езауэ Маринэ къыщалъхуа махуэщ.
Дунейм и щытыкIэнур
«pogoda.yandex.ru» сайтым зэритымкIэ, республикэм пшагъуэу щыщытынущ. Махуэм хуабэр градуси 9-10, жэщым градуси 4-5 щыхъунущ.
Лъэпкъ Iущыгъэ:
Хуэмыху и Iуэху блэкIыркъым.
