Узыншагъэм ехьэлIа Iуэху щхьэпэ

 КъБР-м щыIэ УФСИН-м щызэхалъхьэжащ републикэм Узыншагъэр хъумэнымкIэ и министерствэм дэщIыгъуу ирагъэкIуэкIа «Узыншагъэм и марафон» Iуэхум кърикIуахэр.

 «Узыншагъэм и марафон» программэм ипкъ иткIэ Къэбэрдей-Балъкъэрым Узыншагъэр хъумэнымкIэ и министерствэм и дохутыр-IэщIагъэлIхэр еплъащ КъБР-м щыIэ УФСИН-м тезырыр щрахьэкI и IуэхущIапIэхэмрэ Следственнэ изоляторымрэ (СИЗО) щаIыгъхэм я узыншагъэр зыхуэдэм, абыхэм еIэзэн папщIэ зэфIэхыпхъэхэм. НэгъуэщI унэтIыныгъэхэми гулъытэ хуащIащ, къищынэмыщIауэ, чэнджэщхэри иратащ.
Узыншагъэм тещIыхьа Iуэхум хэтащ Республикэ клиникэ сымаджэщым, Онкологие диспансерым, СПИД-мрэ уз зэрыцIалэхэмрэ пэщIэтынымкIэ центрым, «Налшык и ДэIэпыкъуэгъу псынщIэ №1 къалэ клиникэ сымаджэщым», Прохладнэ, Шэджэм район сымаджэщхэм я IэщIагъэлIхэр.
«Узыншагъэм и марафон» махуэм КъБР-м Узыншагъэр хъумэнымкIэ и министерствэм и дохутыр-IэщIагъэлIхэр якIэлъыплъащ кардиологие, психиатрие неврологие, хирургие, урологие, ревматологие, эндокринологие, офтальмологие, травматологие, онкологие, узыфэ зэрыцIалэ, наркологие, акушер-гинекологие, оториноларингологие я лъэныкъуэкIэ. Iуэхур щрагъэкIуэкIым Урысей ФСИН-м и Медико-санитар часть-7 (МСЧ-7) и къудамэхэу Къэбэрдей-Балъкъэр Республикэм и пенитенциар IуэхущIапIэхэм щыIэхэм щакIэлъыплъащ цIыху 341-м.
- «Узыншагъэм и марафоныр» сэбэпщ икIи дызыхуейщ медицинэ практикэм ехьэлIауэ (еIэзэн, я узыншагъэм ехьэлIауэ зыхуеину IэщIагъэлхэр къегъэплъын), апхуэдэуи щхьэпэщ щIыналъэм щыпсэухэм, абы пенитенциар IэнатIэри хыхьэу, я узыншагъэр хъумэнымкIэ я зэхуэдэ къалэнхэр зыгъэзащIэ КъБР-м щыIэ УФСИН-м и медицинэ IуэхущIапIэхэмрэ КъБР-м Узыншагъэр хъумэнымкIэ и министерствэмрэ я дохутырхэр зэдэлэжьэныр зэтеухуэнымкIэ, - жиIащ Урысей ФСИН-м и Медико-санитар часть-7-м и унафэщI Тэтэр Заирэ.
 
 

КъБР-м щыIэ УФСИН-м и пресс-IуэхущIапIэ.
Поделиться: