Зи вагъуэр нуру блэ

ЗэрытщIэщи, дэтхэнэ зы цIыхуми нэхъ лъапIэ дыдэу иIэр дамэ къытезыгъакIэ и унагъуэращ, мывэ къыру и щIыбагъ къыдэт, гуфIэгъуэхэр къыдэзыгуэш, гузэвэгъуэхэр къыдэзыгъэпсынщIэ и адэ-анэмрэ къыдалъхуахэмрэщ. Ди жагъуэ зэрыхъунщи, языныкъуэхэм щхьэусыгъуэ зэмылIэужьыгъуэхэм къыхэкIыу я бынхэр Сабий унэхэм къыщыщIанэ дрохьэлIэ. Апхуэдэу нобэ нэхъ гъунэгъуу фэдгъэцIыхуну ди мурадщ адэ-анэм пэIэщIэу, абыхэм я хуабагъ хуэныкъуэу къэхъуа, НТВ каналымкIэ екIуэкI «Ты супер» проектым щытекIуа, урысейпсо, дунейпсо макъамэ зэхьэзэхуэхэм мызэ-мытIэу Гран-при къыщызыхьа зэфIэкI зиIэ уэрэджыIакIуэ ныбжьыщIэ Анкудиновэ Дианэ.

         Дианэ КъуэкIыпIэ Жыжьэм хыхьэ Арсеньевэ къалэм 2003 гъэм щIышылэм и 28-м къыщалъхуащ. Хъыджэбз цIыкIум къызэриIуэтэжымкIэ, къэзылъхуа анэр абы къыхуэгущIыIэт, удын къыщытрилъхьи щыIэу. Илъэсищ щрикъум Дианэ сабий унэм къыщыхутащ. Абы щылажьэ Поник Иринэ сабий дыгъэм и гур кIэрыпщIащ икIи ар ипIыну къыIихащ. Ауэ, Дианэ лей къезыхыу щыта и анэр зэманми щыщимыгъэгъупщэм щIэлъэIуащ нэгъуэщI щIыпIэ псэупIэ ящIыну. 2012 гъэм унагъуэр Тольятти Iэпхъуащ. Дианэ зэрыжиIэмкIэ, къэзылъхуа и анэр зыхэт пщIыхь Iейхэр иджыри къыздэсым елъагъу. Апхуэдэхэм деж хъыджэбз цIыкIум психологыр къыдоIэпыкъу. Хъыджэбзым анэу къилъытэр ар зыпIыжа, лъагъуныгъэкIэ, гулъытэкIэ, гуапагъкIэ къыхуэупса Иринэщ.

Унагъуэр Тольятти щыIэпхъуа 2012 гъэм Дианэ и анэм ишащ къалэм ЩэнхабзэмкIэ и унэм щылажьэ «Мелодия» студием. Хъыджэбз цIыкIур и гъэсэн хъуащ Вовк Светланэ. Дианэ макъамэм щиIэ зэфIэкIхэр къызэкъуихынымкIэ, Тхьэр къызэрыхуэупса зэфIэкIыр и фIэщ хъунымкIэ и егъэджакIуэр къыдэIэпыкъуащ. Хъыджэбз цIыкIум япэщIыкIэ къалэм и уэрэджыIакIуэ ныбжьыщIэхэм я зэпеуэхэм, иужькIэ урысейпсо зэхьэзэхуэхэм, иджы дунейпсо зэхыхьэхэм и зэфIэкI щеплъыж хъуащ. Хъыджэбз цIыкIум и макъ гуакIуэр зэхэзыххэмрэ къэпщытакIуэхэмрэ телъыджэ ящыхъурт. Аращ абы и анэ Иринэрэ и егъэджакIуэ Светланэрэ япэ каналым и «Голос. Дети» программэм Дианэ и зэфIэкI щеплъыжыну и чэзууэ 20I6 гъэм  къыщIалъытар. Къыхалъхьа Iуэхум Дианэ занщIэу арэзы техъуащ, сыту жыпIэмэ къэрал псом и цIэ щигъэIунымкIэ ар IэмалыфIт. Ауэ, хъыджэбз цIыкIур проектым пхыкIатэкъым… ИужькIэ, наIуэ къэхъуащ Дианэ проектым и къэпщытакIуэхэм къыщIыхамыхам и щхьэусыгъуэр. Меладзе Валерий зэрыжиIамкIэ, апхуэдиз зэфIэкI зыбгъэдэлъ уэрэджыIакIуэ ныбжьыщIэм адэкIэ ахэр зэрыдэлэжьэнум теухуа упщIэм и жэуапым игъэгузэвауэ арат псори. Дауэ хъуами, Дианэ къызэрыхамыхар и жагъуэ хъуауэ зыми закъригъэлъэгъуакъым, атIэ псоми гукъинэж ящыхъуат ар къахуэгуфIэу къазэрыхэплъамкIэ.

2018 гъэм Дианэ и зэфIэкI щеплъыжащ адэ-анэхэм я нэIэм щIэмытыжу къэна ныбжьыщIэхэм НТВ телеканалымкIэ зыкъыщагъэлъагъуэ «Ты супер!» проектым. Абы жиIащ франджы уэрэджыIакIуэ Индилэ и «Derniere danse» уэрэдыр. Дианэ и утыку итыкIэмрэ и макъ дахэмрэ ятхьэкъуат къэпщытакIуэхэу Лазарев Сергей, Карауловэ Юлианнэ, Дробыш Виктор, Крутой Игорь сымэ. Iэнкун хъуа артистхэр къэтэджри щыту Дианэ Iэгу хуеуащ. Апхуэдэу Дианэ и вагъуэр къэунэхуащ икIи быдэу мурад ищIащ макъамэм и гъащIэр ирипхыну.

Макъамэм къыдэкIуэу зэфIэкI зиIэ хъыджэбз Iущыцэр сурэт щIынми дехьэх, театр гупжьейм хэтщ. 2017 гъэм Дианэ урысейпсо щIалэгъуалэ  Дельфий джэгухэм дыщэ медалыр къыщихьащ. Ар пашэ щыхъуащ «Эстрадэ уэрэдхэр жыIэн» унэтIыныгъэм. 2017 гъэм Тольятти Нюшэ концерт щитам Анкудиновэ Дианэ сценэм иригъэблагъэри «Я твой ангел» уэрэдыр зэдыжаIащ. КърихьэлIахэм ар гукъинэж ящыхъуащ.

Дианэ Тольятти къалэм куэд щIауэ щыцIэрыIуэщ, щIэх-щIэхыу концертхэр щет, тIысыпIэ имыIэжу цIыхухэр зэхуишэсу. Крутой Игорь зэрыжиIэмкIэ, «Детская новая волна» зэпеуэм Дианэ Урысейм и цIэкIэ зыкъыщигъэлъэгъуэнущ икIи продюсерым хъыджэбз цIыкIур хуабжьу игъэгушхуащ Москва фэтэр тыгъэ къыщыхуищIри.

Хэт ищIэнт зэгуэр зи гъащIэр егъэзыхыгъуэу къыщIидза хъыджэбз цIыкIум и вагъуэр къэунэхуну икIи апхуэдэу нуру цIыхухэм яхуэблэну! Дианэ и гъащIэмрэ и ехъулIэныгъэхэмрэ анэ псори къыхуриджэ пэлъытэщ сабийхэр хыфIамыдзэну зыщIигъэгупсысыжыну.