Нобэ

♦Палестинэ лъэпкъыр дэIыгъыным и дунейпсо махуэщ. 1947 гъэм щэкIуэгъуэм и 29-м ООН-м и Ассамблее Нэхъыщхьэм резолюцэ къищтащ Палестинэр Инджылызым и унафэм къыщIэгъэкIыным теухуауэ. Апхуэдэуи абы щыубзыхуат Палестинэм къэралыгъуитI – журтхэм ейрэ хьэрыпхэм ейрэ – къыщызэгъэпэщыныр.

♦ Албаниер нэмыцэ зэрыпхъуакIуэхэм къыщыIэщIагъэкIыжа (1944 гъэм) махуэщ
♦1783 гъэм Урысейм ЩIэныгъэхэмкIэ и академием и зэхуэсым абы и унафэщI Дашковэ Екатеринэ къыщыхилъхьащ урысей азбукэм «ё» хьэрфыр хагъэхьэну, алъандэрэ къагъэсэбэпа «io»-м и пIэкIэ.
♦1899 гъэм Испанием «Барселона» футбол клубыр къыщызэрагъэпэщащ. Иджыпсту дунейм и топджэгу гуп нэхъ лъэщхэм ящыщщ ар. 
♦1917 гъэм Цагъуэ Нурийрэ Дым Iэдэмрэ «Адыгэ макъ» газетым и япэ номерыр къыдагъэкIащ.
♦1920 гъэм Армян ССР-р къызэрагъэпэщащ.
♦1924 гъэм къызэрагъэпэщащ Дыкъэзыухъуреихь дунейр хъумэнымкIэ Урысейпсо зэгухьэныгъэр.
♦1932 гъэм Франджымрэ СССР-мрэ Iэ традзащ зыр адрейм темыуэным теухуа зэгурыIуэныгъэм.
♦1941 гъэм Петрищевэ къуажэм (Москва область) нэмыцэ фашистхэм партизанкэ Космодемьянская Зое (Таня) щхьэпылъэ щащIащ. Партизан гупым и хэщIапIэр кърагъэIуэтэну хъыджэбз цIыкIум сыт хуэдиз бэлыхь фашистхэм трамыгъэлъами, ар къахуэдзыхакъым. Къигъэлъэгъуа хахуагъэм папщIэ Совет Союзым и ЛIыхъужь цIэр Космодемьянскэм зэрымыпсэужу фIэщыным теухуа унафэр СССР-м и Совет Нэхъыщхьэм и Президиумым I942 гъэм мазаем и I6-м къищтауэ щытащ.
♦1945 гъэм Югославие Федеративнэ ЦIыхубэ Республикэ къызэрыунэхуам теухуа унафэ къащтащ. Абы и унафэщIу ягъэуват Иосиф Броз Титэ.
♦1930 гъэм къалъхуащ совет актрисэ, УФ-м щIыхь зиIэ и артисткэ Гребешковэ Нинэ.
♦1932 гъэм къалъхуащ политик, Франджым и президенту (1995 - 2007 гъэхэм) щыта Ширак Жак.
♦1953 гъэм къалъхуащ УФ-м щIыхь зиIэ и ухуакIуэ, техникэ щIэныгъэхэм я доктор Хьэмхъуокъуэ Руслан.
♦1966 гъэм къалъхуащ урысей актёр, УФ-м и цIыхубэ артист, Урысей Федерацэм и Къэрал саугъэтыр тIэунейрэ зыхуагъэфэща, Лъэпкъхэм я къэрал театрым и художественнэ унафэщI Миронов Евгений.
♦1977 гъэм къалъхуащ совет фигуристкэ цIэрыIуэ, дунейпсо, европэпсо зэпеуэхэм мызэ-мытIэу щытекIуа Петровэ Марие.

Дунейм и щытыкIэнур

«pogoda.yandex.ru» сайтым зэритымкIэ, Налшык пшэр техьэ-текIыу щыщытынущ. Хуабэр махуэм градуси 14 – 16, жэщым градуси 9 – 11 щыхъунущ.

Лъэпкъ Iущыгъэ:
ШыфIыр ныбжьэгъуфIым хуэдэщ.