Министрым ирегъэблагъэ

КъБР-м спортымкIэ и министр Хьэсанэ Ислъам щригъэблэгъащ республикэм ММА спорт лIэужьыгъуэм нэхъ ехъулIэныгъэшхуэ щызиIэ Мырзэкъан Азэмэт.

ЗэIущIэм щытепсэлъыхьащ IэпщэрызауэмкIэ плIэнейрэ дунейпсо чемпионым адэкIэ и мурадхэм ехьэлIа Iуэхугъуэхэм. Къыхэдгъэщынщи, Мырзэкъан Азэмэт и профессионал рекордщ зэи къыхамыгъащIэу текIуэныгъипщI къызэрихьар, абыхэм ящыщу 8-м зэIущIэм и япэ раундым и хьэрхуэрэгъухэр нокауткIэ къриудащ.

Спорт IуэхущIапIэм и унафэщIымрэ хьэщIэмрэ  я гугъу ящIащ илъэс ныкъуэм щIигъуауэ ди лъэпкъэгъум Америкэм и Штат Зэгуэтхэм щригъэкIуэкI зыгъэсэныгъэхэм, зэман гъунэгъум зыхуигъэувыжа къалэнхэмрэ илъэсыщIэм къыпэщылъ зэIущIэмрэ. Ди лъэпкъэгъум хьэрхуэрэгъу къыхуэхъунур мы зэманым зэхэкIащ, ауэ ар хэтми къыщытщIэнур нэхъ иужьыIуэкIэщ.

Фигу къэдгъэкIыжынщи, щэкIуэгъуэм и 20-м Америкэм и Штат Зэгуэтхэм и Лас-Вегас къалэм щызэхэтын хуея Къэбэрдей-Балъкъэрым щыщ Мырзэкъан Азэмэтрэ Польшэм и лIыкIуэ Прачнио Марчинрэ я зэIущIэр щымыIэну траухуэжащ. Щхьэусыгъуэр ди лъэпкъэгъум и хьэрхуэрэгъум зэримыдарщ абы къезэуэну.

Адыгэ щIалэм ММА зэхьэзэхуэшхуэм къыкIэлъыкIуэу япэу зэIущIэ щригъэкIуэкIыну щытраухуар дыгъэгъазэм и пэщIэдзэхэрат, арщхьэкIэ ари зэхэтакъым. ЯпэщIыкIэ ар зэзэуэн хуея бразил спортсменыр хэкIащ зэIущIэм. КъыкIэлъыкIуэу, абы и пIэкIэ ди щIалэм къыпагъэува  США-м щыщ Вандер  Джаред и узаншагъэм дохутырхэр арэзы къызэримыщIым къыхэкIыу ари зэIущIэм хагъэхьакъым.

Мы махуэхэм Мырзэкъан Азэмэт зыхуегъэхьэзыр UFC щригъэкIуэкIыну япэ зэIущIэшхуэм.