ХъуэпсапIэхэр нахуапIэ мэхъу

Къэралым и дэтхэнэ щIыналъэми хуэдэу, ди республикэми мы махуэхэм щокIуэкI дызэрыхьэну 2022 Илъэсы­щIэм хуэгъэпса гуфIэгъуэ Iуэхугъуэхэр. Абыхэм я мурад нэхъыщхьэр, псом япэрауэ, сабийхэр гъэгуфIэнырщ, ныбжьыщIэхэм я гукъыдэжыр къэIэ­ты­нырщ. Апхуэдэ мурад дахэ иIэу, КъБР-м и Iэтащхьэ КIуэкIуэ Казбек махуэ зыбжанэ ипэкIэ Налшык щиублащ «Хъуэ­псапIэхэм я псей» къэралпсо акцэр. 

ИлъэсыщIэм ирихьэлIэ а Iуэхугъуэр къызэгъэпэщыныр хабзэ дахэ Къэбэрдей-Балъкъэрым зэрыщыхъуар къыхигъэщу, абы щыгъуэ КIуэкIуэм фIыщIэ ин яхуищIауэ щытащ апхуэдэ жэрдэм гуапэ къызыбгъэдэкIахэм. «Си фIэщ мэхъу: щытыкIэ гугъум ихуа сабийхэм яIэрыхьэнущ зыщIэхъуэпса илъэсыщIэ тыгъэ гуа­пэхэр», - жиIат республикэм и Iэтащхьэм, Iуэхугъэр щиублэм икIи «ХъуэпсапIэхэм я псейм» фIэлъ лъэIу тхылъ цIыкIуи 9 къыфIихат. 
Мы махуэхэм КIуэкIуэ Казбек егъэзащIэ сабийхэм къабгъэдэкIа а лъэIу тхылъ цIыкIухэм ита я хъуэпсапIэхэр. Апхуэдэ ­гулъытэ япэ зылъысахэм ящыщщ Прохладнэ къалэм щыпсэу Ислъам, илъэс ­15-м ит ныбжьыщIэр. ЩIалэ цIыкIум нэ­хъа­пэIуэкIэ письмо къыхуитхат КIуэкIуэм, я унагъуэм, и анэмрэ и анэкъилъху нэхъыщIэ цIыкIухэмрэ ятеухуауэ, апхуэдэуи «ХъуэпсапIэхэм я псейм» кIуэну и нэ къызэрикIри къыхигъэщу. Республикэм и Iэтащхьэм Ислъамрэ абы и анэмрэ гъубж махуэм иригъэблэгъащ Правительствэм и Унэм. ЩIалэ цIыкIум гуапэу еуэршэрылIа нэужь, абы илъэсыщIэ тыгъэхэр яхуищIащ ныбжьыщIэми абы и анэ­къилъху цIыкIухэми. КъыкIэлъыкIуэу КIуэ­кIуэ Казбек и лъэIукIэ Ислъам пыIэбащ псей цIыкIум икIи фIэлъ лъэIу тхылъхэм ящыщ зы къыфIихащ. Абы къыщыгъэ­лъэгъуат Рустам зи цIэ ныбжьыщIэм илъэ­­сыщIэм хуиIэ хъуэпсапIэр. «Уэрэ сэ­рэ зэгъусэу хуэдгъэзэщIэнщ ­Рустам и хъуэ­псапIэр икIи а тыгъэр мыгувэу Iэ­рыдгъэхьэжынщ», - жиIащ щIыналъэм и Iэтащхьэм икIи Ислъами и анэми ­гуапэу ехъуэхъуащ къэблэгъа Илъэсы­щIэм­кIэ. 
Прохладнэ къалэм щыпсэу Ислъам хуэдэу, КIуэкIуэ Казбек мы махуэхэм ­игъэгуфIащ зи лъэIу тхылъхэр илъэсыщIэ псейм къыфIихахэр. Апхуэдэу Евэрэ Алия­рэ тыгъэ яхуищIащ а пщащэ цIыкIу­хэр зыхуэныкъуэу жаIа планшетхэр, Егор иритащ сурэт зэращI хьэпшып зэхэлъ, Тимур игъэгуфIащ футбол зэрыджэгу топкIэ, Русланрэ Имранрэ яхуэупсащ пульткIэ лажьэ роботхэмкIэ. 
ИлъэсыщIэр хъуэпсапIэхэр нахуапIэ щыхъу зэман телъыджэщи, республикэ псей цIыкIум зи лъэIу тхылъхэр фIэлъа ­сабийхэм, щытыкIэ гугъум ихуа, бынуна­гъуэшхуэхэм къахэкIахэм, мы махуэхэм яIэрыхьэнущ зыхуея тыгъэхэр. Гулъытэн­шэу къэдвмыгъэгъанэ ди гулъытэ хуэныкъуэ дэтхэнэ сабийри.