КIуэкIуэ Казбек дыгъэгъазэм и 20-м IущIащ Ахъшэхэр хъумэнымрэ къэгъэсэбэпынымкIэ федеральнэ IуэхущIапIэм (казначействэм) и республикэ къудамэм и унафэщI IутIыж Шумахуэ.
Зэхуэзахэр тепсэлъыхьащ федеральнэ IуэхущIапIэм и щIыналъэ къудамэм 2021 гъэм къриубыдэу и лэжьыгъэр зэрекIуэкIам, дызэрыхьэ илъэсым къыпэщылъхэм, хэгъэгум налог къыщыхахынымкIэ щыIэ щытыкIэр зыхуэдэм.
IутIыж Шумахуэ къызэрыхигъэщамкIэ, илъэсым и мазэ 11 блэкIам кърикIуахэр щызэхалъхьэжым, наIуэ къэхъуащ Ахъшэхэр хъумэнымрэ къэгъэсэбэпынымкIэ федеральнэ IуэхущIапIэм (казначействэм) пхыкIыу, бюджетым и IэнатIэ псоми сом мелард 88-м щIигъу зэраIэрыхьар (нэгъабэ и апхуэдэ лъэхъэнэм - сом мелард 81-рэ).
Къыхэбгъэщ зэрыхъунумкIи, Къэбэрдей-Балъкъэрыр ящыщщ лъэпкъ проектхэр пхыгъэкIынымкIэ Кавказ Ищхъэ- рэм федеральнэ щIыналъэм и мызакъуэу, УФ-м япэ щищахэм.
КIуэкIуэ Казбек IуэхущIапIэм Iутхэм фIыщIэ яхуищIащ я лэжьыгъэм зэрыхуэIэижьым папщIэ. Абы къыдэкIуэуи, республикэм и Iэтащхьэм и псэлъэгъур къыхуриджащ зи пашэ IэнатIэм къыщаIэт Iуэхухэм Iулъхьэ щызэIэпызыххэм ерыщу щапэщIэтыну, апхуэдэуи, лъэпкъ проектхэр, федеральнэ, хэгъэгу, муниципальнэ мыхьэнэ зиIэ программэхэр щыпхагъэкIкIэ, финанс-юридическэ зэIэпыхыкIэхэм хуэгъэзауэ хабзэр къызэпызыудхэм япэщIэувэнымкIэ зэрызэдэлэжьэну щIыкIэхэми я гугъу ящIащ.
А махуэ дыдэм КъБР-м и Iэтащхьэ КIуэкIуэ Казбек республикэм и Къэзыпщытэ-къэзыбж палатэм и унафэщI КIасэ Динэ зыщыхуигъазэм къыхигъэщащ лъэпкъ проектхэр щагъэзащIэкIэ, бюджетым къыхэкI ахъшэр къызэрагъэсэбэп щIыкIэм кIэлъыплъынымкIэ зи гугъу ящI IуэхущIапIэм лэжьыгъэ ин дыдэхэр зэрыригъэкIуэкIыр.
КIасэ Динэ зэрыжиIэмкIэ, 2021 гъэм къриубыдэу, властым и гъэзэщIакIуэ органхэм я пщэ къыдэхуэ къалэнхэр зэрызэфIах Iэмалхэм теухуауэ къэпщытэныгъэхэр ирагъэкIуэкIащ, а лъэныкъуэмкIэ ныкъусаныгъэу наIуэ къащIахэри зэрагъэзэхуэжащ.
Республикэм и Iэтащхьэм апхуэдэуи жиIащ къэрал IуэхущIапIэхэм Iутхэм лэжьыгъэ IуэхукIэ мылъкур зэрызэIэпах щIыкIэм щыуагъэрэ ныкъусаныгъэу къыщыхагъэкIхэр и чэзум гъэзэкIуэжыным лъэныкъуэ псори зэрегугъупхъэр, лъэпкъ проектхэр гъэзэщIэным хухаха ахъшэр, жылагъуэри щыгъуазэрэ фIагъ лъагэ зиIэу, къызэрагъэсэбэпым мыхьэнэ ин дыдэ зэриIэр.
«Абы къыхэкIыуи, ныкъусаныгъэхэмрэ щыуагъэхэмрэ къыщIэгъэщынымрэ апхуэдэхэр и чэзум гъэзэкIуэжынымрэ хуэгъэзауэ, къэрал властым и къудамэ псоми ди къалэн нэхъыщхьэхэм ящыщ зыщ КъБР-м Къэзыпщытэ-къэзыбж и палатэм къызыхуэтыншэу дыдэлэжьэныр», - игъэбелджылащ республикэм и Iэтащхьэм.