КъБР-м и Iэтащхьэ КIуэкIуэ Казбек видеоконференц мардэм тету Оперативнэ штабым и зэIущIэ иригъэкIуэкIащ. Абы щытепсэлъыхьащ республикэм и эпидемиологие щытыкIэмрэ ар зыхуэкIуэнкIэ хъунумрэ.
ЗэIущIэм хэтащ КъБР-м и Парламентым и УнафэщI Егоровэ Татьянэ, КъБР-м и Правительствэм и УнафэщI Мусуков Алий, «Роспотребнадзор»-м и къудамэу КъБР-м щыIэм и тхьэмадэ Пагуэ Жыраслъэн, республикэм узыншагъэр хъумэнымкIэ и министр Къалэбатэ Рустам, щIыналъэ властым и гъэзэщIакIуэ органхэм, хабзэхъумэ IэнатIэхэм я унафэщIхэр, районхэмрэ къалэ округхэмрэ я Iэтащхьэхэр.
Республикэм и Iэтащхьэр къытеувыIащ иджыблагъэ Москва щекIуэкIа зэIущIэхэм щыхэтам УФ-м и Президент Путин Владимир къигъэува къалэнхэмрэ УФ-м и Правительствэм и Iэтащхьэ Мишустин Михаил пщэрылъ къащищIахэмрэ. Коронавирусым и штамм лIэужьыгъуэщIэм зэрызиужьым къыхэкIыу, КIуэкIуэ Казбек къыхигъэщащ узыфэм щIыналъэм зыщемыгъэубгъуным хуэунэтIауэ Iуэхухэр зэрырагъэкIуэкIым кIэлъыплъ оперативнэ штабым и къару псори зэщIэгъэуIуэным, узыншагъэр хъумэнымкIэ IэнатIэм и лэжьыгъэр къэзылъахъэ щымыIэнымкIэ и чэзум зэфIэгъэкIыпхъэхэр щIэным мыхьэнэшхуэ зэриIэр.
И гугъу ящIащ коронавирус узыфэ зэрыцIалэр зыпкърытхэр къэхутэнымкIэ ирагъэкIуэкI тест-къэпщытэныгъэхэм республикэм и цIыху нэхъыбэ къызэщIегъэубыдэн зэрыхуейм. Мы зэманым махуэ къэскIэ апхуэдэ къэпщытэныгъэу минитIым щIигъу ирагъэкIуэкIри, абы и процент 89-м узыфэр япкърыту къахутэ. Пагуэ Жыраслъэн къызэрилъытэмкIэ, а бжыгъэр и щыхьэтщ сымаджэ куэд зэрыщыIэм, абыхэм я процент 97-м япкърытыр коронавирусым и «дельта» штаммырщ. Абы жиIащ щIыналъэм узыфэ зэрыцIалэм и «омикрон» штаммыр пкърыту хуагъэфащэу зы сымаджэ зэрыщыIэр. Республикэм и санитар нэхъыщхьэм къигъэлъэгъуащ узым зэрыпэщIэт вакцинэр зыхезыгъэлъхьахэм я бжыгъэр зыхуэдэми. Къэбэрдей-Балъкъэрым щIышылэм и 10-м ирихьэлIэу мастэм и япэ пкъыгъуэхэр зыхезыгъэлъхьахэр мин 272-рэ мэхъу, тIури зэзыхьэлIахэр мини 180-м щIегъу. Республикэм вакцинэр щыхалъхьэ пункт 85-м, махуэ къэс пщэдджыжьым щегъэжьауэ пщыхьэщхьэм сыхьэти 8 хъуху.
Къалэбатэ Рустам зэрыжиIамкIэ, коронавирус узыфэ зэрыцIалэр зыпкърытхэм щеIэзэ госпиталу республикэм 4 щолажьэ, псори зэхэту гъуэлъыпIэ 710-рэ щIэту. Иджыпсту госпиталхэм щагъэхъуж сымаджэ 568-рэ, абыхэм ящыщу 83-р реанимацэм щIэлъщ, амбулаторэ кIэлъыплъыныгъэм щIэтхэр 3710-рэ мэхъу. Къэрал медицинэ IуэхущIапIэу 4-м КТ-къэхутэныгъэхэр щрагъэкIуэкI Iэмэпсымэу 7 щыIэщ, зы жэщ-махуэм къриубыдэу абыхэмкIэ я щытыкIэр къапщытэ цIыху 450-м. Министрым къыхигъэщащ амбулаторэхэмрэ поликлиникэхэмрэ я лэжьыгъэр нэхъыбэ зэрыхъунур, абыхэм Iуэхур къыщагъэпсынщIэн папщIэ КъБКъУ-м и медицинэ къудамэм и ординаторхэр Iуэхум къыхашэну зэрамурадыр.
Мусуков Алий тепсэлъыхьащ нэхъапэкIэ республикэм и Iэтащхьэм пщэрылъ къащищIахэм япкъ иткIэ, УФ-м Узыншагъэр хъумэнымкIэ и министерствэм къигъэлъэгъуа чэнджэщыщIэхэм тету къэкIуэну мазищым тещIыхьауэ коронавирус узыфэ зэрыцIалэр зыпкърыту амбулаторэ кIэлъыплъыныгъэм щIэт сымаджэхэр хущхъуэкIэ къызэгъэпэща хъун папщIэ республикэ бюджетым абы трагъэкIуэдэну ахъшэр къызэрыхагъэкIыну Iэмалхэр къызэрагъуэтам. Апхуэдэу узы-фэр зыпкърытхэр нэхъ пасэу къахутэн щхьэкIэ ар нэхъ псынщIэу къозыгъащIэ экспресс-тестхэр къызэращэхун мылъкуи бюджетым къыхагъэкIынущ.
КъБР-м и Iэтащхьэ КIуэкIуэ Казбек зэIущIэм хэтхэм пщэрылъ зыбжанэ яхуищIащ коронавирус узыфэ зэрыцIалэм республикэм зыщемыгъэубгъуным теухуауэ. «Оперативнэ штабым и зэIущIэр едгъэкIуэкIын хуей щIэхъуам и щхьэусыгъуэр коронавирус узыфэ зэрыцIалэм и «омикрон» штамм лIэужьыгъуэщIэм игъэсымаджэхэм я бжыгъэр дуней псоми ди къэралми зэрыщыхэхъуэрщ. Иджыпсту ди республикэм узым и гуащIэгъуэр нэхъ щыужьыхауэ щытщ. Ауэ дыхуэхьэзыру дыщытын хуейщ къэкIуэнум. «Омикроным» куэдкIэ нэхъ псынщIэу зеубгъу, абы къыхэкIыуи, сымаджэхэр нэхъыбэу щытынущ. Ди республикэм махуэм къриубыдэу цIыху 500-м нэблагъэм узыр япкърыту къахутэнкIэ хъунущ, абы ипкъ иткIэ сымаджэхэм я бжыгъэм хуэди 5 - 6-кIэ хэхъуэнущ. Iуэхум теухуа унафэ щхьэхуэхэр къэдгъэлъэгъуащ. Ди мурадщ узыр зыпкърытхэр къэхутэнымкIэ ирагъэкIуэкI лэжьыгъэм зедгъэубгъуну, цIыху куэд щызэхыхьэ щIыпIэхэм тест-къэпщытэныгъэхэр щрагъэкIуэкI ягъэIэпхъуэ пунктхэр къыщызэIутхыну. Узыфэ лIэужьыгъуэщIэр нэхъ къатемыхьэлъэу цIыхухэр игъэсымаджэу къызэралъытэм щхьэкIэ амбулаторэ кIэлъыплъыныгъэм щIэтхэм я бжыгъэм зэрыхэхъуэныр къэтлъытэри, ахэр зыхуеину хущхъуэхэмкIэ къызэдгъэпэщын щIэддзащ. Коронавирус узыфэ зэрыцIалэр зыпкърытхэм дэIэпыкъуэгъу яхуэхъу медицинэ лэжьакIуэхэм я улахуэм худыщIагъуу щыта ахъшэхэр еттын щIэддзэжынущ. Ар къыхэдгъэкIынущ щIыналъэ бюджетым. Апхуэдэу Iуэхум къыхэтшэну медицинэ еджапIэхэм я ординаторхэмрэ студентхэмрэ лэжьыгъэм тезыгъэгушхуэ гулъытэ яхуэтщIэну ди мурадщ. Нобэ пандемием пэщIэт IэнатIэр и къару къызэрихькIэ лэжьэнущ, ар къэзылъахъэ щыIэн хуейкъым, Iуэхум и пIалъэр зыхуэдэм фIыуэ дыщыгъуазэщ. Госпиталхэм гъуэлъыпIэ 710-рэ щIэтщ, дыхуэныкъуэ хъумэ, ар нэхъыби тхуэщIынущ. Коронавирус узыфэ зэрыцIалэм и «омикрон» штаммым зыщиубгъуа къэралхэм къикI хъыбархэм ятепщIыхьмэ, мы узыфэр цIыхухэм нэхъ тыншу ящхьэщокI, ауэ абыкIэ дигу дгъэфIу зыщIедгъэх хъунукъым. Абыхэм цIыху бжыгъэшхуэм коронавирус уз зэрыцIалэм укъезыгъэл иммунитет зрагъэгъуэтащ, ди дежкIэ вакцинэр зыхезыгъэлъхьахэм я бжыгъэр иджыри мащIэ дыдэщ. ЦIыху нэхъыбэ а Iуэхум къызэрызэщIедгъэубыдэнми дыхущIэкъуэн хуейщ. Дэтхэнэри ихь жэуаплыныгъэр къыгурыIуэу икIи коронавирус узыфэ зэрыцIалэ лIэужьыгъуэщIэм зэрызиубгъуным хуэхьэзыру щытыпхъэщ», - жиIащ КIуэкIуэ Казбек.