Лъэсу къэфкIухь

Сэ куэд къысщощI. ЦIыхухэм зэрыжаIэщи, гъуни нэзи иIэкъым щIэщхъу мыфэмыцу къысщыщIым. КъызыхэкIри къысхуэщIэркъым. Сызэремыгупсыса лъэныкъуи къэзгъэнакъым, итIани нэхъ кIащхъэ хъуркъым. Псалъэм папщIэ, сыт хэлъ Налшык гъущI гъуэгу станцым деж автобусым укъыщитIысхьэу Советхэм я унэм нэс укIуэну? Зыри. ИтIысхьэ, талон пхыуд, къэувыIэгъуитI дэкIым, автобусым къебэкъуэхи, лэжьапIэм щIыхьэ. Аращ зэрщытын хуейри. Ауэ…
- Тэдж, - зэхызох сэ щхьэгъусэм и макъ. - Телефоныр къоджэ.
Сыкъотэдж. Си нэхэм сыщIэIуэтыхьурэ сыхьэтым соплъ: сыхьэтибл хъуа къудейщ. Трубкэр къызощтэ. Редакцэм къопсэлъыкI.
- Тхыгъэ гуэрым сатырэ щэ ныкъуэ хурикъуркъым, - жи жэуап зыхь секретарым и къуэдзэм. - ПсынщIэу къакIуи зыгуэр къэгупсыс.
ПсынщIэу зызотхьэщI, шей тIэкIу схуэзэхащIар сIыгъыу Iэ лъэныкъуэмкIэ зызохуапэ. Си бгырыпхыр щIэскъузэурэ дэкIуеипIэм сыкъожэх, пщIантIэм сыкъыдолъадэ - сыкъыдэлъэда иужь стэканыр зэрысIыгъыр сигу къокIыжри, жэрыгъэкIэ ещанэ къатым сыдожеиж. Си щхьэгъусэр къежэхыу сыхуозэ.
- Вакъэ лъэныкъуэр къэбгъэнауэ дэнэ уздэкIуэр? - жи, игъэщIагъуэу.
Стэканыр IэщIызогуэри, вакъэр лъыпызоIу, жэрыгъэкIэ автобус къэувыIэпIэм сыкъожэ. «Икарус» кIыхьыжьыр хущхьэ-щатэу, зэфIэщIэжу къос. И бжэхэр гущIыхьэу мэкIыргъри, ерагъкIэ зэIуокI. ЦIыхухэр зэрытогуэри, щIым семыIусэу срахьэ. Автобус кIуэцIым сынахьэса иужь, си нэхэр мэункIыфI, си бэуэкIэр нэхъ кIэщ мэхъу, си бгъэм «хъырхъ» къещтэ.
- Илъэс пщIей мыгъуэ къэзгъэщIат, си лIэгъуэр къызэрысри сщIэжырт, - щотхьэусыхэ си бгъумкIэ зы фызыжь макъ, - ауэ си ажалыр мы автобусым илъу хэт и гугъэнт?
Сэ ерагъкIэ си щхьэр изоIуэнтIэкIри, макъыр къыздиIукIымкIэ соплъэ. Фызыжьыр дапIытIэ: и нэхэр утхъуащ, пщIэнтIэпсыр къожэх. Иджы псэлъэжыфыркъым, и Iупэхэр пIэжьэжьэж къудейщ. Къарууэ сиIэр хызолъхьэри, си Iэ ижьыр хуит къэсщIыну сыкъуокъу, фызыжьым сыдэIэпыкъуну. «ЦIытхъытхъ» апщий, си Iэгъуапэр бгъуэтмэ, къащтэ! ФIатхъри йожьэж. Апхуэдэу щыта фIэкIа умыщIэну. Тхьэмахуэ хъуакъым тумэн пщыкIуий есту кIэстумыр къызэрысщэхурэ. ЕтIуанэ зыгъэхъеигъуэм кIэстумым и щIыбагъымкIэ къыщызэфIатхъри, IыхьитIри сщахащ. Джанэри дагъакIуэу!
«Майкэ тIэкIур тщыгъыу дынэсащэрэт лэжьапIэм», - тхьэ солъэIу сэ.
- Зыпхъуэу ущымыт! - къысщIогуауэ бэуапIэ къызимыуту сяпэ итым сыкIэрызыпIытэ жьакIацэ щхьэ фэкъу лIышхуэр. – ЗыщIэбукIыжыр сыт?
- Си кIэстумри джанэри… - къызогъажьэ сэ.
- Сэ си вакъитIым фIэкIа сщыгъыжкъыми зыри жысIэркъым, - среIулI абы сяпэ итым. ИтIанэ сыкIэреупIащIэ. СызыкIэриупIэщIар къокъугъыкIри, укIытэм плъыжь ещI. И плIэ хужьыпсым Iэбгъу хэлъыжкъым. Езыр щэхуу, ауэ гущIыхьэу магъ.
Толстой и уэрамым деж иIэ къэувыIэпIэм дыкъэса иужь, бэзэрым шхын нэхъ жьыуэ къыщызыщэхуа гуп къызэрогуэ. «Мис иджыщ!» - жысIэну сигу къэкIа къудейуэ, «тIампIэщ», си гъуэншэджым щIэлъ бгырыпхыр зэпоуд. ЩIыIухэр мэлъей.
- Си джэдыкIэр! - мэкIий зыгуэр. - Тумэн есту къэсщэхуа джэдыкIэ тIэкIур зэхэфпIытIащ.
- Мы уи лъэгуажьэр Iух!- къысхуолъ зи жьакIэ пхъашэкIеймкIэ си пщэдыкъыр зыхэзыIуха абрагъуэр.
Си лъакъуэр къыIузгъэкIуэтыну сыкъокъури - дэнэ щыIэт! ЕтIуанэу сыщеIэм, «хъыщт» жиIэу си вакъэ лъэгур щIатхъ.
- Фи талоныр вгъэхьэзыр! - къытщIогубжьэ радиокIэ щоферыр. - Ар зимыIэм сомищкIэ детхьэкъунущ.
«Тумэн пщыкIуийкIэ укъызэтхьэкъуащ, - сегупсысащ сэ. - Иджы си вакъитIыр хэслъхьэжмэ, стадионым сыкъикIыж фIэкIа ямыщIэу проспектымкIэ сежэхыжынщ».
ДыкъыщикIыну къэувыIэпIэм дыкъызэрысу, автобусыр зэуэ къэувыIэри, цIыхухэр ипэкIэ ещIащ. «Ой!» макъым автобус кIуэцIыр зэщIищтэри, «Икарус иныр игъэщэнэуащ, игъэщэIуащ. Сяпэ ит сызыкIэраупIэщIамрэ сэрэ дыкърахьэжьэри, дыкърахащ. Щхьэж къыщына тIэкIур зэдгъэзэхуэжу дыщызэбгрыкIыжым, лIыжь блэкIым сыкъигъэувыIащ:
- Мыр сыт, тIу? - къызэупщIащ ар. - Хьэм пщичын къыпщынакъым. Хэт мыпхуэдэу узыфыщIар?
- Автобусым, - къыпыспIытIыкIащ сэ си бзэгупэм.
- А-а, - ищIащ и щхьэр лIыжьым, - гурыIуэгъуэщ. Лъэсу къэфкIухьым хъуркъэ, унэжын. НэгъуэщI мыхъуми, фшхыр фщыкIуэнт. Фи щхьэри нэхъыфIу лэжьэнт, зиунагъуэрэ.
Абы жиIарат сэ иджыпсту си щхьэм итыр?
 

ШэджыхьэщIэ Хьэмыщэ.
Поделиться:

Читать также:

25.03.2024 - 15:30 Си жэнэт
21.03.2024 - 11:30 Ахъмэт и фо изщ