Къэбэрдей-Балъкъэрым и Iэтащхьэ КIуэкIуэ Казбек хэтащ УФ-м и Къэрал Советым «Транспорт» унэтIыныгъэмкIэ и комиссэм онлайн щIыкIэу иригъэкIуэкIа зэIущIэм.
Урысей Федерацэм и Правительствэм мы лъэхъэнэм щыхоплъэ щIыналъэхэм жылагъуэ транспорт IэнатIэм зыщегъэужьыным хуэгъэзауэ ягъэхьэзыр зэзыгъэуIу проектым.
Зи гугъу тщIы зэхыхьэм щызэрихьэлIахэр щыгъуазэ ящIащ «ФIагъ лъагэ зиIэ гъуэгу шынагъуэншэхэр» лъэпкъ проектым и гъэзэщIэным хыхьэу, щIыналъэхэм жылагъуэ транспортым зыщегъэужьыным хуэгъэзауэ мы зэманым зэхагъэува Iуэху еплъыкIэхэр зыхуэдэм.
ЗэIущIэр къызэIуихащ УФ-м и Президентым и дэIэпыкъуэгъу Левитин Игорь. ЩIыналъэхэм я Iэтащхьэхэмрэ Iуэхур зэгъэщIылIа министерствэхэмрэ хъуэхъу псалъэкIэ захуигъэзащ УФ-м и Правительствэм и УнафэщIым и къуэдзэ Хуснуллин Марат.
Урысей Федерацэм и Къэрал Советым и Президиумым зи гугъу тщIы Iуэхум ехьэлIауэ 2021 гъэм жэпуэгъуэм и 19-м зэIущIэ иригъэкIуэкIат. Абы зыщытепсэлъыхьахэм япкъ иткIэ, УФ-м и Президент Путин Владимир ищIа унафэр я тегъэщIапIэу, къэралым и Правительствэм щIидзащ щIыналъэхэм жылагъуэм къигъэсэбэп транспортым зыщегъэужьыным хуэгъэза зэзыгъэуIу проектыр гъэхьэзырыным.
Онлайн-зэхыхьэм мызэкIэ нэхъыбэу зи гугъу щащIар жылагъуэ транспортым и къэгъэщIэрэщIэжыным мылъкушхуэ хэлъхьэн, абы папщIи инвесторхэр къыдэхьэхын зэрыхуейрщ. КъищынэмыщIауэ, зэIущIэм хэтахэм къыхагъэщащ къалэхэмрэ къуажэхэмрэ автобусхэр нэхъ къыщыувыIэпхъэу къалъытэр социальнэ ухуэныгъэхэр здэщыIэхэмрэ цIыхухэр нэхъыбэу щыпсэу щIыпIэхэмрэ арауэ зэрыщытри.
Къэбэрдей-Балкъэрыр къэтщтэнщи, зи гугъу тщIы Iуэхум ехьэлIауэ республикэм къыщызэрагъэпэща комиссэм хэтхэр КIуэкIуэ Казбек и унафэкIэ хэплъащ жылагъуэ транспортым щыщу муниципальнэ къызэгъэпэщыныгъэр зыхуеину бжыгъэр зыхуэдэми.
«Автобусхэм я теплъэмрэ инфраструктурэмрэ зегъэхъуэжыныр нэхъыбэу зыхуэунэтIар, хабзэм къызэригъэуву, я лэжьыгъэр щызэблэу къэмыхъурэ шынагъуэншэу цIыхухэр къешэкIынырщ, уэрамхэри нэхъ щызекIуэгъуафIэ щIынырщ. Зи гугъу тщIы лэжьыгъэр Iыхьэ-Iыхьэу зэпыгъэщхьэхукIащи, и гъэзэщIэным 2023 гъэм щIэддзэнущ», - къыхигъэщащ КIуэкIуэ Казбек, онлайн-зэхыхьэм кърикIуахэм щыхэплъэжым.