Дунейм щыхъыбархэр

Нобэ

Литвам щагъэлъапIэ Урысеймрэ Германиемрэ я унафэм къыщIэкIыу я къэралыгъуэр щызэфIагъэувэжа (1918 гъ.) махуэр

1571 гъэм Грозный Иван Iэ тридзащ «Плъырхэм, гъунапкъэхъумэ IэнатIэхэм я IуэхукIэ» унафэм. Аращ Урысейм и дзэм теухуа япэ хабзэу къалъытэр.

1722 гъэм Пётр Езанэм къыдигъэкIащ «Пащтыхьыгъуэр зылъысынум теухуауэ» унафэр. Пащтыхьыр текIа нэужь абы и пIэ и къуэ нэхъыжьыр иувэу зэрыщыта хабзэр икъутэжащ а унафэм. Иджы къэрал унафэр зыIэщIэлъынур зыгъэувынур пащтыхьырт.

1946 гъэм ООН-м Экономикэ, социальнэ IуэхухэмкIэ и советым и унафэкIэ къызэрагъэпэщащ ЦIыхум и хуитыныгъэхэмкIэ комиссэ.

1943 гъэм советыдзэхэм Харьков къалэр хуит къащIыжащ.

1976 гъэм СССР-м и Камскэ автомобиль заводым КамАЗ автомобиль лIэужьыгъуэщIэр къыщыщIагъэкIащ.

1893 гъэм къалъхуащ совет дзэ къулыкъущIэ, Совет Союзым и Маршал Тухачевский Михаил. 1937 гъэм, пцIы тралъхьэри, яукIауэ щытащ ар.

1906 гъэм къалъхуащ урысей шахматисткэ, цIыхубзхэм я дунейпсо зэпеуэм япэу чемпион щыхъуа Менчик Верэ.

1941 гъэм къалъхуащ Корее ЦIыхубэ-Демократие Республикэм и унафэщIу (1994 - 2011 гъэхэм) щыта Ким Чен Ир.

1940 гъэм къалъхуащ Кубаным ЛэжьыгъэмкIэ и ЛIыхъужь, Краснодар крайм и губернатору, УФ-м и Федеральнэ Зэхуэсым и сенатору, Къэрал Думэм и депутату щыта Кондратенкэ Николай.

1956 гъэм къалъхуащ тхыдэ щIэныгъэхэм я кандидат, ЩIДАА-м и член-корреспондент, жылагъуэ лэжьакIуэ Болэ Ильзитэ.

Дунейм и щытыкIэнур

«pogoda.yandex.ru» сайтым зэритымкIэ, Налшык уфауэ щыщытынущ. Махуэм хуабэр градуси 3 - 5, жэщым щIыIэр градуси 3 - 1 щыхъунущ.

Лъэпкъ Iущыгъэ:

Мыщащхьэ плъагъуу мыщэ лъэужь умылъыхъуэ.