КIуэкIуэ Казбек иригъэкIуэкIа «щIыналъэ сыхьэтым» щытепсэлъыхьащ республикэм и эпидемиологие щытыкIэм, лъэпкъ проектхэр зэрагъэзащIэм, нэгъуэщI Iуэхугъуэхэми. Абыхэм ятеухуа я еплъыкIэхэр зэIущIэм къыщаIуэтащ КъБР-м и Правительствэм и УнафэщI Мусуков Алий, абы и япэ къуэдзэ Къуныжь МуIэед, республикэм узыншагъэр хъумэнымкIэ и министр Къалэбатэ Рустам сымэ.
«Дызэрыгугъауэ, къэпщытакIуэхэм жаIахэмрэ нэхъапэкIэ узыфэм зэрызиубгъуам теухуауэ диIэ еплъыкIэхэм тещIыхьауэ, мы зэманым коронавирус узыфэ зэрыцIалэр зыпкърытхэм я бжыгъэр мин ныкъуэм нэблагъэу аращ, абыхэм я нэхъыбэм амбулаторэ кIэлъыплъыныгъэм щIэту загъэхъуж. Мазаем и 6-м щегъэжьауэ сымаджэхэм я бжыгъэм зэрыхэхъуэшхуэ щыIэкъым, апхуэдэу щытми, щытыкIэр иджыри гугъущ. Дэ апхуэдэ Iуэхум дыхуэхьэзырт. Узыр къызэрахутэ тест-системэхэр, хущхъуэхэр нэхъ пасэу къэтщэхуащ, сымаджэхэр зыхуэныкъуэ чэнджэщхэр щрат «122» контакт-центр ин къызэIутхащ. Курыт школхэм щеджэхэр загъэпсэхуну зэрыдутIыпщам и фIыгъэкIэ узыфэм зэрызиубгъур нэхъ кIащхъэ хъуащ. Тест-къэпщытэныгъэхэр цIыху нэхъыбэм я деж щедгъэкIуэкIыу щIэддзащ, хущхъуэхэр зэпэубыдауэ щытами, махуэ куэдкIэ щызэпыу къэмыхъуу сымаджэхэр зыхуэныкъуэхэмкIэ къызэдгъэпэщыфащ. КъищынэмыщIауэ, контакт-центрым и лэжьакIуэхэр нэхъыбэ тщIащ. Узыфэ зэрыцIалэм щеIэзэ госпиталхэм щылажьэхэм я улахуэхэм яхущIыдгъуащ. ЩытыкIэм дыполъэщ», - жиIащ Къэбэрдей-Балъкъэр Республикэм и Iэтащхьэм.
Мы зэманым ОРВИ, коронавирус узыфэ зэрыцIалэр япкърыту амбулаторэ кIэлъыплъыныгъэм щIэтщ цIыху 13 659-рэ. КъБР-м узыншагъэр хъумэнымкIэ и министрым къызэрыхигъэщамкIэ, мазае мазэм апхуэдэ сымаджэу мин 20-м щIигъу хущхъуэкIэ къызэрагъэпэщащ. Зы жэщ-махуэм къриубыдэу «ДэIэпыкъуэгъу псынщIэр» сымаджэ миным нэблагъэм ираджэ.
Махуэ къэс тест къэпщытэныгъэу мини 4 ирагъэкIуэкI, абыхэм ящыщу 500-м нэблагъэм коронавирус узыфэ зэрыцIалэр япкърыту къахутэ. Госпиталхэм гъуэлъыпIэ 1285-рэ щIэтщ, сымаджэу 1031-рэ щIэлъщ. КислородкIэ ягъэбауэхэр 417-рэ мэхъу. Зы жэщ-махуэм къриубыдэу госпиталхэм щIагъэгъуалъхьэ сымаджи 110-м нэблагъэ, апхуэдиз дыдэ хъужауэ щIатхыкIыж. Реанимацэхэм щIэлъщ цIыху 95-рэ, абыхэм ящыщу 11-р ИВЛ аппаратым пыщIащ.
Къалэбатэ Рустам тепсэлъыхьащ коронавирусым зэрыпэщIэт вакцинэр зыхезыгъэлъхьахэм узыр зэрырахьэкIым. Мы зэманым госпиталхэм щIэлъ сымаджэхэм ящыщу мастэр зыхаIуар цIыхуи 160-рщ. Узыр хьэлъэу езыхьэкI сымаджэхэр 27-рэ мэхъу. Вакцинэр зыхалъхьауэ сымаджэхэм ящыщу 20-м ар зэрырахьэлIэрэ мазихым щIигъу дэкIащ. ЗэрызыхрагъэIурэ куэд мыщIахэм узыр нэхъ тыншу ящхьэщокI. Дзэлыкъуэ, Iуащхьэмахуэ, Прохладнэ районхэм, Прохладнэ къалэм вакцинэр цIыхухэм халъхьэныр нэхъ къызэгъэпэщауэ щокIуэкI.
Республикэм и Iэтащхьэм хэкъузауэ къыхигъэщащ цIыхухэм вакцинэр зыхрагъэлъхьэным къыхуеджэным мыхьэнэшхуэ зэриIэр. «Бжыгъэхэм къагъэлъагъуэ а мастэр сэбэп зэрыхъур. ЩIыналъэ унафэщIхэр жыджэру а Iуэхум иужь итын хуейщ. Пандемием дызэрыпэщIэтыфынур вакцинэращ», - жиIащ КIуэкIуэ Казбек.
Апхуэдэу «щIыналъэ сыхьэтым» щытепсэлъыхьащ республикэм лъэпкъ проектхэр зэрыщагъэзащIэм, абы хыхьэуи кхъахэ хъуа унэхэм цIыхухэр къыщIэгъэкIыным теухуауэ ирагъэкIуэкI Iуэхухэм. Мусуков Алий и гугъу ищIащ 2022 гъэм лъэпкъ проектхэм хыхьэу «Дэтхэнэ зы сабийми и ехъулIэныгъэ», «Щэнхабзэ», «ЗэфIэкI зыбгъэдэлъ цIыхухэр», «Къалэ зэIузэпэщ» щIыналъэ проектхэр зэрагъэзэщIэнум. Абыхэм псоми мылъку хухахащ икIи ахэр щагъэзэщIэну щIыналъэхэм яIэрыхьащ. Гъатхэпэм и 1 пщIондэ абы и лъэныкъуэкIэ ирагъэкIуэкIыну зэпеуэхэр зэфIэкIауэ щытын хуейщ.
Республикэм и Iэтащхьэм щIыпIэ администрацэхэм я унафэщIхэм пщэрылъ ящищIащ щIыналъэхэм лъэпкъ проектхэр зэрыщагъэзащIэм щIэгъэхуэбжьауэ кIэлъыплъыну икIи лэжьыгъэм и фIагъыр ткIийуэ къапщытэну, хуей хъумэ, жылагъуэ кIэлъыплъакIуэхэр Iуэхум къыхашэнуи къыхуриджащ. «Хабзэм къызэригъэувым дытетыпхъэщ. Лэжьыгъэр зыщIэхэм къагурыгъэIуэн хуейщ хьэрэмыгъэншэу я къалэныр зэрагъэзэщIапхъэр, пIалъэ ягъэувар къызэпауд зэрымыхъунур. ВжызоIэ: зэгурыIуэныгъэм къыщыгъэлъэгъуар фIагъ иIэу икIи и чэзум зымыгъэзащIэр жэуапым ешэлIа хъунымкIэ схузэфIэкI къэзгъэнэнукъым, хабзэхъумэ IэнатIэ псоми захуэзгъэзэнущ. Дэ дыщIэлажьэр ди цIыхухэращ. Зыгуэр фпэдубыдынуи хуитыныгъэ диIэщ: фи фейдэ къыхэвгъэкIын папщIэ цIыхухэм я гъащIэм фи зэран евмыгъэкI. Iуэхум и ужь фихьэрэ, и кIэм фхунэмыгъэсу проектыр зэхэвгъэзэрыхь нэхърэ лэжьыгъэр щIэвмыдзэххэмэ нэхъыфIщ. Ар сэ си еплъыкIэщ!» - жиIащ КIуэкIуэ Казбек.
Республикэм и Iэтащхьэм район унафэщIхэр къыхуриджащ, дунейм и щытыкIэр къалъытэу, гъатхэпэ мазэми емыжьэу, я щIыналъэхэр зэщIэкъуэн, гъэкъэбзэн лэжьыгъэм щIадзэну.
