ЗэрагъэлъэпIэнум зыхуагъэхьэзырБэрбэч ХьэтIутIэ и цIэр зезыхьэ Къэбэрдей-Балъкъэр къэрал университетыр илъэс 90 щрикъум ирихьэлIэу ирагъэкIуэкIыну дауэдапщэхэр зи нэ1э щ1этыну къызэгъэпэщакIуэ гупым и чэзу зэIущIэр иджыблагъэ зэхэтащ. КъБКъУ-м и къудамэхэм я лIыкIуэхэм я зэхуэсым псом япэ щытепсэлъыхьащ махуэщI къакIуэм ирихьэлIэу ягъэхьэзырын хуей «КъБКъУ-р илъэс 90 ирокъу: цIыхухэмрэ къэхъукъащIэхэмрэ» зи фIэщыгъэ тхылъым и зэхэлъыкIэ-ухуэкIэу щытынум, абы ихуэну тхыгъэхэр зэрызэкIэлъагъэкIуэнум, еджапIэм и лэжьыгъэр къызэрызэригъэпэщ щIыкIэм ехьэлIа буклетым и гъэпсыкIэр зыхуэдэнум, нэгъуэщI Iуэхугъуэхэми. Зэрыуниверситету къызэщIиубыдэу екIуэкIыну гуфIэгъуэ дауэдапщэхэм къищынэмыщIауэ, къудамэхэми щIэныгъэ, щэнхабзэ, еджэныгъэ унэтIыныгъэ зиIэ щIэнIуатэхэр, зэхуэсхэр, Iэнэ хъурейхэр щекIуэкIынущ. А псоми нэгузегъэужь концертхэр хэтынущ, къудамэм къикIуа тхыдэ гъуэгуанэр къызыхэщыж гъэлъэгъуэныгъэхэр къыхузэрагъэпэщынущ. Мы лэжьыгъэм тегъэщIапIэ хуащIыну Iуэху еплъыкIэхэмкIэ зэдэгуэшащ зэIущIэм хэтхэр. КъБКъУ-м и ветеран зэгухьэныгъэм егъэщIылIа Iуэхугъуэхэм щхьэхуэу ирипсэлъапхъэу икIи гулъытэ лей хуэщIыпхъэу къалъытащ. Зэгухьэныгъэм и унафэщI, зауэ хуэIухуэщIэхэм ятеухуа къулыкъум и ветеран, полковник Шурдым Хьэсэн къыхилъхьа гупсысэм ипкъ иткIэ, зи лэжьыгъэрэ гуащIэдэкIкIэ пщIэрэ Iулыджрэ къэзылэжьа ветеранхэм трахауэ щыта сурэт нэхъыф1хэр къыщыхахыну зэхьэзэхуэ ирагъэкIуэкIынущ. Сурэт нэхъыфIу къалъытахэр къыхахынурэ махуэшхуэм ирихьэлIэу «БлэкIам дрогушхуэ - къэкIуэнур ди фIэщ мэхъу» фIэщыгъэр зиIэ альбому къыдагъэкIыжынущ. Университетым кадрхэмрэ лэжьыгъэр къызэгъэпэщынымкIэ и проректор ГъукIэпщокъуэ Мурат зэрыжиIамкIэ, къудамэхэмрэ колледжхэмрэ я щIэныгъэ советхэм къыщыхалъхьэщ, къабыл щащIри, КъБКъУ-м и щIэныгъэ советым къагъэхьыжащ еджапIэр илъэс 90 щрикъум ирихьэлIэу къэрал IуэхущIапIэхэмрэ къулыкъущIапIэхэмрэ ягъэлъэпIэну нэхъ зыхуэфащэу къалъытэхэм я цIэ-унэцIэхэр зэрыт унафэхэр. «Апхуэдэу махуэшхуэм ирихьэлIэу дауэдапщэхэм щызэрахьэну дамыгъэ зэмылIэужьыгъуэхэр хьэзыр хъуауэ щыIэщ. Ахэр хъыбарегъащIэ Iуэхущ1ап1эхэм, тхылъ е нэгъуэщI Iэмэпсымэу университетым игъэхьэзырхэм традзэнущ, утыкухэм ирахьэнущ», - жиIащ ГъукIэпщокъуэ Мурат. Проректорым зэIущIэм кърихьэлIахэм иджыри зэ ягу къигъэкIыжащ гуфIэгъуэр дауэдапщэ къудейм къыщымынэу, урысейпсо икIи дунейпсо утыкушхуэхэм зэрихьэн щхьэусыгъуэ зэрыхъунур.
Поделиться:
Читать также:
04.05.2024 - 09:00 →
Егъэджэныгъэм и мардэщIэхэм хуокIуэ
30.04.2024 - 11:00 →
Унагъуэр - жылагъуэр зэтезыIыгъэщ
13.04.2024 - 15:23 →
Махуэшхуэм зыхуагъэхьэзыр
13.04.2024 - 10:08 →
Зэгухьэныгъэм зэфIигъэкIар
06.04.2024 - 10:26 →
Театрхэм я ехъулIэныгъэ, я гугъуехь
|