КъызэтеувыIэнукъым

КIуэкIуэ Казбек Москва щыIущIащ «ЭКО-культура» агропромышленнэ холдингым и президент Рудаков Алек­сандр. Ахэр тепсэлъыхьащ ди республикэм щащI, Кавказ Ищхъэрэм щынэхъ ин хуа­бэщ зэхэтым и Iуэхур здынэсам.

«ДифI зезымыхуэ, къыдэныкъуэкъу къэ­ралхэм къытхуагъэува дэкъузэныгъэхэм къашэ щытыкIэм емылъытауэ, ­хуабэщхэм я ухуэныгъэр зэраубзыхуа жыпхъэм тету йокIуэкI икIи зытраухуа пIалъэм яухынущ. Абы щагъэкIыну ха­дэхэкIхэр Урысейм и хэгъэгухэм я мызакъуэу, хамэ къэралхэми едгъэшэфынущ. Къэбэрдей-Балъкъэрым Iэмал псори иIэщ хадэхэкIхэр зыхуей хуэзэу игъэкIыну», - щитхащ КIуэкIуэм и телеграм-каналым.
Хуабэщхэм илъэс хъурейм къриубы-дэу бэдрэжанхэмрэ мэракIуэхэкIхэмрэ щагъэкIынущ. Ухуэныгъэ псори зэфIэгъэкIыным, хуабэщхэм я лэжьыгъэр зэ­теухуэным сом мелард 18,4-рэ текIуэдэнущ. ЯпэщIыкIэ гектар 40-м щащIынущ (сом меларди 7,6-рэ). Абы цIыху 648-м лэжьапIэ щагъуэтынущ. ЕтIуанэ Iыхьэу гектар 62,5-м щаухуэнущ - ар 2024 гъэм яухынущ. Псори зэхэту къапщтэмэ, Шэджэм щIыналъэм щаухуэ хуабэщхэм цIыху минитI щылэжьэфынущ.
Мы проектым и инвесторыр «ЭКО-культура» агропромышленнэ холдингырщ. Абы нэхъыщхьэ дыдэу зыхуигъэувыж ­къалэныр къыщIигъэкI ерыскъыхэкIхэм я фIагъыр лъагэу щытын зэрыхуейрщ. Инвесторым и мурадщ и проектхэм нэхъри зригъэужьыну, абыкIэ дэIэпыкъуэгъу ­хъунущ республикэ унафэщIхэр.
Нэгъабэ КIуэкIуэ Казбек щыIащ хуа­бэщхэр щащIыну щIыпIэм япэ мывэр щыщагъэтIылъым. ИджыкIэ щIыналъэм иращIыхьыну я мурадхэр ягъэпсащ, дя­пэкIэ ухуэныгъэ лэжьыгъэхэм щIадзэну аращ. Мы гъэм япэ хадэхэкIхэр хасэну я мурадщ.
«Къэбэрдей-Балъкъэрым и экономикэм дежкIэ мыхьэнэшхуэ яIэщ инвестицэхэм. Мы проект инри ди щIыналъэм и экономикэм зиужьынымкIэ лъэба­к­ъуэш­хуэщ, ар нобэ хуабжьу дызыхуэны­къуэщ», - итхащ КIуэкIуэм.