Псы ежэххэм я щытыкIэм кIэлъыплъынущ

«ЩIыуэпс» лъэпкъ проектым хиубыдэу «Росводресурсы» IуэхущIапIэм Урысейм и щIыналъэхэм сом меларди 2,5-м нэс яхуиутIыпщынущ. Ар трагъэкIуэдэнущ псы ежэххэр гъэкъэбзэным.

2019 гъэм къыщыщIэдзауэ ягъэзащIэ лъэпкъ проектым и фIыгъэкIэ псы Iуфэу километр 200 - м нэс, псы ежэхыу 10 ягъэкъэбзащ, псы хъумапIэу гектар мин 13 зэрагъэпэщыжащ. А Iэхухэр зэгъусэу кърахьэлIащ псы ежэххэмкIэ федеральнэ агенствэмрэ «Росводресурсы» IуэхущIапIэм и щIыналъэ къудамэхэмрэ.

2022 гъэм къриубыдэу псы ежэххэмрэ псы хъумапIэхэмрэ гъэкъэбзэным теухуа лэжьыгъэ зэмылIэужьыгъуэу 50-м нэс зэфIагъэкIын хуейуэ къапэщылъщ. Абыхэм ящыщу къагъэлъэгъуащ Бахъсэныпсри. Зэман и пэкIэ федеральнэ къэпщытакIуэхэм ди республикэм и щIыпIэ щхьэхуэхэм къыщыщIагъэщауэ щытащ дыкъэзыухъуреихь дунеймрэ щIыуэпс щытыкIэмрэ зэраныгъэ езых Iуэхугъуэ зыбжанэ икIи абыхэм хуагъэуват пIалъэ кIэщIым къриубыдэу щыуагъэ псори ягъэзэкIуэжыну. Бахъсэн псы ежэхыр зи цIэр къраIуахэм щIахэхуар фIеипс къыхагъэлъадэу къызэрыщIагъэщарт.

Зэлэжьыну урысейпсо псыежэххэм я лъащIэм щызэтрихьа кIэрыхубжьэрыхумрэ псыщIагъ удзхэмрэ къыщIагъэкъэбзыкIынущ, псым хэлъыпхъэ минерал пкъыгъуэхэм я мардэр здынэсыр пIалъэ пыухыкIам тету къапщытэнущ. Урысейр узэфэн хъун псы къабзэкIэ къызэзыгъэпэщ Кавказ щIыналъэ пэрытхэм ящыщщ Къэбэрдей - Балъкъэрри. Псы къабзэм теухуауэ дуней псом нобэ щекIуэкI хьэлэбэлыкъхэр къэплъытэмэ, ди псы ежэххэм дяпэкIэ гулъытэ лей зэрагъуэтынум шэч хэлъкъым.