ЛIыхъужьыгъэм и орденыр зыхуагъэфэщахэр

КIуэкIуэ Казбекрэ Урысей Федерацэм и Лъэпкъ гвардием Кавказ Ищхъэрэ округым щиIэ дзэ гупым и унафэщI генерал-лейтенант Захаров Сергейрэ Къэбэрдей-Балъкъэрым щыщу Донбассым щыпсэухэр хъу­мэным ехьэлIауэ я къулыкъур ягъэзащIэу хэкIуэдахэм хуагъэфэща къэрал дамыгъэхэр иратащ зауэлIхэм я Iыхьлыхэм.

Урысей Федерацэм и Президент Путин Владимир гъатхэпэм и 14-м къыдигъэкIа Унафэм ипкъ иткIэ, дзэ къулыкъум пэрыту лIыгъэ къызэрагъэлъэгъуам папщIэ ЛIыхъужьыгъэм и орденыр хуагъэфэщащ цIыхуихым: полицэм и сержант нэхъыщIэ Бачиев Алим (Кёнделен къуажэ), полицэм и сержант нэхъыжь Джэху Альберт (Налшык къалэ), полицэм и лейтенант нэхъыжь Къэлэжьокъуэ Ренат (Бахъ­сэнёнкэ къуажэ), полицэм и подпол­ковник КIэщт Аслъэн (Кэнжэ), полицэм и майор Къудей Ратмир (Акъбащ Ипщэ), прапорщик Этезов Аныуар (Яны­къуей).
КIуэкIуэ Казбек захуигъэзащ зауэлI­хэм я благъэ-Iыхьлыхэм: «Ди къуэш­хэм пщIэ пылъу, лIыхъужьыгъэ яхэлъу урысей къэралыгъуэм и Iуэху еплъы­кIэмрэ ди щIэблэм я къэкIуэнумрэ ­яхъумащ. Ар ауэ псалъэ хэIэтыкIа къудейкъым. Абыхэм лIыгъэ къалъы­къуэмыкIамэ, Украинэм щекIуэкI Iуэхугъуэхэр Урысей Федерацэми ще­кIуэкIынкIэ хъунут. Дэтхэнэми щIыхь хуэфащэщ. Ди щхьэр яхудогъэщхъ апхуэдэ быныфIхэр зыгъэса адэ-анэхэм. Си фIэщ мэхъу Къэбэрдей-Балъ­къэрми Урысей къэралыгъуэми я тхыдэм ди лъэпкъэгъухэм я цIэр къы­зэрыхэнэнур».
Захаров Сергей тепсэлъыхьащ зауэлI­хэм я лIыгъэм. Абы жиIащ ахэр япэу зауэ IэнатIэм зэрыIухьар икIи я псэ емыблэжу зэрызэуар. «Хэкум папщIэ абыхэм я гъащIэр ятащ. ФIы­щIэшхуэ яхузощI икIи я гуауэр ядызогуэш щIалэхэм я адэ-анэхэм, щхьэ­гъусэхэм, хэкIуэдахэм я бынхэм. Ахэр зэи тщы­гъупщэнукъым», - къыхигъэщащ абы.
.